Read სბს–2013 ქებათა-ქება სოლომონისა 2 Bible Online

ქებათა-ქება სოლომონისა 2 - სბს–2013 bible

ქებათა-ქება სოლომონისა 2

¹მე ვარ ნარგიზი შარონისა და შროშანი ველთა.

²როგორც შროშანი ეკალთა შორის, ისეთია ჩემი სატრფო ასულთა შორის!

³როგორც ვაშლის ხე ტყის ხეთა შორის, ისეთია ჩემი საყვარელი ჭაბუკთა შორის. დიდი სიამით დავჯექ მის ჩრდილში; ნაყოფი მისი ეტკბო ჩემს სასას.

⁴შემიყვანა მან ღვინის სახლში და სიყვარულის ალამი დამადგა თავზე.

⁵განმამტკიცეთ ყურძნით, გამომაცოცხლეთ ვაშლებით, რადგან დავსნეულდი სიყვარულისგან.

⁶ნეტავ თავქვეშ მედოს მისი მარცხენა და მისი მარჯვენა მეხვეოდეს!

⁷გაფიცებთ, ასულნო იერუსალიმისანო, ველის ნიამორებს და ირმებს გაფიცებთ. არ შეაშფოთოთ, არ გამოაფხიზლოთ სიყვარული, ვიდრე თავად არ ინებებს!

⁸აჰა, გაისმის ხმა ჩემი სატრფოსი, აჰა, მოდის იგი, მორბის მთებზე, მოხტის ბორცვებზე.

⁹ვამსგავსე საყვარელი ჩემი ქურციკსა და შვლის ნუკრს. აჰა, დგას იგი ჩვენი ზღუდის უკან, სარკმელში იჭვრიტება და დარაბებში ილანდება.

¹⁰მომმართავს სატრფო ჩემი და მეუბნება: ადექ, საყვარელო, მშვენიერო ჩემო, და წამომყევი,

¹¹რადგან, აჰა, მიიწურა ზამთარი, ჟამი ღვარებისა გარდავიდა, გაგვშორდა.

¹²ყვავილები ამოიწვერნენ მიწის პირზე, მოიწია ჟამი გალობისა და გვრიტის ღუღუნი ისმის ჩვენს მხარეში.

¹³ლეღვმა გამოიღო ყვავილი, ვაზის ყვავილი სურნელებას აკმევს; ადექი, სატრფოვ ჩემო, მშვენიერო ჩემო, და წამომყევი!

¹⁴კლდეებში შეხიზნულო ჩემო მტრედო! მიჩვენე შენი სახე, მასმინე შენი ხმა! რამეთუ ტკბილია შენი ხმა და სახე შენი მშვენიერი.

¹⁵დაგვიჭირეთ მელიები, პატარა მელიები, ვენახის გამჩანაგებლები, რადგან აყვავდა ჩვენი ვენახები.

¹⁶ჩემი საყვარელი ჩემია და მე მისი ვარ, ის მწყესავს შროშანთა ველებზე.

¹⁷სანამ დღე სუნთქავს და ჩრდილები გარბიან, მობრუნდი, საყვარელო ჩემო, მსგავსად ქურციკისა და შვლის ნუკრისა ნაპრალოვან მთებზე.