Read სბს–2013 ქებათა-ქება სოლომონისა 5 Bible Online

ქებათა-ქება სოლომონისა 5 - სბს–2013 bible

ქებათა-ქება სოლომონისა 5

¹მოვდივარ ჩემს ბაღში, პატარძალო ჩემო და დაო ჩემო; ვკრებ მურსა და ჩემს სურნელებას. მივირთმევ ფიჭას ჩემსას და თაფლს ჩემსას, ვსვამ ღვინოს ჩემსას და რძეს ჩემსას. მიირთვით, მოყვასნო, სვით და დათვერით სიყვარულით!

²მე მეძინა, ჩემს გულს კი ეღვიძა. აჰა, მესმის ხმა ჩემი საყვარელისა, კარზე კაკუნი: „გამიღე კარი, დაო ჩემო, სატრფოვ ჩემო, მტრედო ჩემო, სრულქმნილო ჩემო! რადგან თავი ცვარმა ამივსო და თმები – ღამის წვეთებმა.“

³გახდილი მაქვს სამოსელი, როგორღა ჩავიცვა? დაბანილი მაქვს ფეხები, როგორღა დავისვარო?

⁴ჩემმა საყვარელმა შემოყო ხელი კარის ღრიჭოში და შემეძრა შიგნეული.

⁵ავდექი, რომ გამეღო ჩემი საყვარლისათვის; ხელებიდან წვეთავდა მური, თითებიდან ეწვეთებოდა მური კარის სახელურს.

⁶გავუღე კარი ჩემს საყვარელს, მაგრამ გაბრუნდა ჩემი საყვარელი და წავიდა. სული დამელია მის ხმაზე. ვეძებდი მას და ვერ ვპოულობდი; ვუხმობდი და არ მაგონებდა.

⁷შემომხვდნენ მცველნი, ქალაქის შემომვლელნი. მცემეს და დამჭრეს. მომხადეს მოსასხამი ზღუდის მცველებმა.

⁸გაფიცებთ, ასულნო იერუსალიმისანო, თუ იპოვით ჩემს საყვარელს, რას ეტყვით მას? უთხარით, რომ დავსნეულდი სიყვარულით.

⁹რითი სჯობს საყვარელი შენი სხვათა საყვარლებს, უმჯობესო ასულთა შორის? რითი სჯობს საყვარელი შენი სხვათა საყვარლებს, ასე რომ გვაფიცებ?

¹⁰თეთრ-ყირმიზია საყვარელი ჩემი, 10 ათასთაგან გამორჩეული.

¹¹თავი მისი ოქროა რჩეული, მისი კულულები შავი ყორანივითაა.

¹²თვალები მისი მტრედებია წყლის ნაკადულებთან, რძეში განბანილნი, კოხტად რომ სხედან ბუდეში.

¹³ღაწვები მისი სურნელოვან მცენარეთა კვლებია, საამო სურნელის მფრქვევნი; მისი ბაგეები შროშანებია, წვეთავს მათგან მდინარი მური.

¹⁴ხელები მისი თლილი ოქროა, იაგუნდებით მოოჭვილი; მუცელი მისი სპილოს ძვლის ჭურჭელია, საფირონებით მოჭედილი.

¹⁵წვივები მისი მარმარილოს სვეტებია, ოქროს კვარცხლბეკზე დაფუძნებული. მისი სახე ლიბანის მსგავსია, და დიდებული, როგორც კედარი.

¹⁶მისი სასა სიტკბოებაა, თავად კი – ყოვლად სანატრელი. ეს არის საყვარელი ჩემი, ეს არის სატრფო ჩემი, ასულნო იერუსალიმისანო!