Read სბს–2013 ქებათა-ქება სოლომონისა 7 Bible Online

ქებათა-ქება სოლომონისა 7 - სბს–2013 bible

ქებათა-ქება სოლომონისა 7

¹მობრუნდი, მობრუნდი, სულამით! მობრუნდი, მობრუნდი, რომ დავტკბეთ შენი ხილვით! რად უნდა უმზიროთ სულამითს, როგორც მახანაიმის ფერხულს?

²რა მშვენიერია შენი ფეხები სანდლებში, მთავართა ასულო! თეძოთა მოყვანილობა ყელსაბამს მიგიგავს, ოსტატის შექმნილს.

³ჭიპი შენი მრგვალი თასია სურნელოვანი ღვინით აღსავსე; შენი მუცელი ხორბლის ხვავია, შროშნებით გარემოცული.

⁴მკერდი შენი ტყუპი თიკანია ნიამორისა.

⁵შენი ყელი სპილოს ძვლის გოდოლია; შენი თვალები ხეშბონის ტბორებია ბათ-რაბიმის კარიბჭესთან; შენი ცხვირი ლიბანის გოდოლია, დამასკოს მიმართ მიქცეული.

⁶თავი შენი შენს ტანზე ქარმელის მთაა და ნაწნავნი შენნი ძოწეულია, მეფე კი მათი ტყვეა.

⁷რა მშვენიერი ხარ, რა სანატრელი, საყვარელო, შენი სიტკბოებით!

⁸შენი ტანი ფინიკის ხეა, შენი მკერდი – ვაზის მტევნები.

⁹ვთქვი: ავალ ფინიკზე და მის რტოებს მოვეჭიდები-მეთქი; შენი მკერდი ვაზის მტევნებივითაა და შენი ნესტოების სურნელი – ვით ვაშლის სურნელი.

¹⁰შენი კოცნა ღვინოა კეთილი, – ის ჩემი საყვარლისაკენ მიედინება, ბაგეთა დამატკბობელი.

¹¹მე ჩემი საყვარლისა ვარ და ჩემსკენ მოილტვის ისიც.

¹²მოდი, საყვარელო ჩემო, გავიდეთ ველად, სოფლად ვათიოთ ღამე.

¹³ავდგებოდით სისხამ დილით ვენახების მოსახილველად; ვნახავდით, თუ ყვავის ვაზი, თუ იშლებიან ვაზის კვირტები, თუ ყვავის ბროწეული; ჩემს ალერსს იქ მოგიძღვნიდი.

¹⁴სურნელებას დააფრქვევდნენ მანდრაგორები; ყოველგვარი ხილია ჩვენი კარის წინ – ახალი და ძველი. შენთვის მაქვს შენახული, საყვარელო ჩემო.