Read სბს–2013 ესაია 13 Bible Online

ესაია 13 - სბს–2013 bible

ესაია 13

¹წინასწარმეტყველება ბაბილონზე, რომელიც იხილა ესაიამ, ამოცის ძემ.

²შიშველ ბორცვზე აღმართეთ ბაირაღი, ხმამაღლა გასძახეთ, მათ; ხელი დაუქნიეთ: დაე, შემოვიდნენ მთავართა კარიბჭით.

³მე ვუბრძანე ჩემს განწმედილთ, აღეგზნო ჩემი რისხვა, და მოვუხმე ჩემს გმირებს, ჩემი სიამაყით მოზეიმეთ.

⁴დიდი გუგუნია მთებში – მსგავსად მრვალრიცხოვანი ხალხისა, ერთად შეკრებილთა, ხალხთა და სამეფოთა, ცაბაოთ უფალი ათვალიერებს საბრძოლო ლაშქარს.

⁵მოდიან შორეული ქვეყნიდან, ცის კიდიდან უფალი და მისი რისხვის იარაღი მთელი ქვეყნის დასაქცევად.

⁶ღაღადებდით, რადგან მოახლოებულია უფლის დღე, ყოვლადძლიერის ნებით გამოგზავნილი ეს დღე, განადგურებას მოიტანს.

⁷ამიტომ ყოველი მარჯვენა დაუძლურდება და ყოველი კაცის გული დადნება.

⁸შიში დაეცემა ყველას, ტანჯვა და ტკივილები შეიპყრობს მათ, მშობიარესავით გაწამდებიან, განკრთომილნი შეხედავენ ერთმანეთს, აეჭარხლებათ სახეები.

⁹აი, მოდის უფლის დღე – სასტიკი, გულისწყრომითა და რისხვით, რათა იავარჰყოს ქვეყანა, მოსპოს მისი ცოდვილნი.

¹⁰ცის ვარსკვლავები და თანავარსკვლავედნი აღარ გამოსცემენ ნათელს, ჩაბნელდება ამომავალი მზე და მთვარე არ მოაფენს ნათელს.

¹¹მე დავსჯი ქვეყნიერებას ცოდვებისათვის, უკეთურთ – მათი დანაშაულებისათვის, ბოლოს მოვუღებ ბოროტისმზრახველთა ზვიადობას და მტარვალთა ამპარტავნებას დავცემ.

¹²ისე ვიზამ, რომ კაცი ბაჯაღლოზე იშვიათი იყოს და ადამიანი – ოფირის ოქროზე.

¹³ვაიძულებ ცას, შეიძრას, და დედამიწა შეზანზარდება თავისი ადგილიდან ცაბაოთ უფლიის წყრომის გამო, მისი მძვინვარე რისხვის დღეს.

¹⁴და მაშინ ადამიანები გაიქცევიან დამფრთხალი ქურციკებივით, მეცხვარის გარეშე დარჩენილი გაფანტული ცხვრებივით, და თითოეული თავის ხალხს მიაშურებს და თითოეული თავის ქვეყანას.

¹⁵ყოველი, ვისაც წამოეწევიან, ხანჯლით განიგმირება, და ყოველი, ვისაც დაიჭერენ, მახვილით დაეცემა.

¹⁶მათ ჩვილებს თვალწინ დაუხოცავენ, სახლებს გაუძარცვავენ, და მათ ცოლებს ნამუსს ახდიან.

¹⁷აჰა, მე აღვძრავ მათზე მიდიელთ, რომელთაც ვერცხლი არაფრად უღირთ და ოქრო არ ახარებთ.

¹⁸ჭაბუკებს მშვილდით შემუსრავენ; და მუცლის ნაყოფს არ შეიბრალებენ, და ყმაწვილებს არ დაზოგავს მათი თვალი.

¹⁹და ბაბილონს, სამეფოთა მშვენებას, ქალდეველთა სიამაყის სახელსა და დიდებას, დაამხობს ღმერთი, ვითარცა დაამხო სოდომი და გომორა.

²⁰აღარასოდეს დასახლდება იგი და თაობიდან თაობამდე არავინ იცხოვრებს იქ, არაბნი არ გაშლიან იქ კარვებს, და მწყემსები არ დაყრიან იქ თავიანთ ფარებს.

²¹ბუნაგს გაიჩენენ იქ უდაბნოს მხეცები, მათი სახლები ბუკიოტებით გაივსება, სირაქლემები დაიდებენ ბინას და ჭინკები იხტუნავებენ იქ.

²²აფთრები იჩხავლებენ მის კოშკებში, და ტურები იკივლებენ დიდებულ სასახლეებში. ახლოს არის მისი ჟამი და მისი დღეები დათვლილია.