Read სბს–2013 ესაია 19 Bible Online

ესაია 19 - სბს–2013 bible

ესაია 19

¹წინასწარმეტყველება ეგვიპტეზე. აჰა, უფალი დაბრძანებულა სწრაფ ღრუბლებზე და მიჰქრის ეგვიპტეში, და შეიძვრებიან ეგვიპტის კერპები მის წინაშე, და ეგვიპტის გული გაირინდება.

²მე ავამხედრებ ეგვიპტელს ეგვიპტელზე; და შეებრძოლება ძმა ძმას და მოყვასი მოყვასს, ქალაქი ქალაქს, სამეფო სამეფოს.

³დაიშრიტება ეგვიპტის სული მის წიაღში; ჩავშლი მის განზრახვას. კერპებს, მჩხიბავებს და გარდაცვლილთა სულებს დაუწყებს ძებნას სამკითხაოდ.

⁴მრისხანე მბრძანებლის ხელში ჩავყრი ეგვიპტელთ, სასტიკი მეფე იქნება მათი მბრძანებელი! – ამბობს ცაბაოთ უფალი.

⁵და ამოშრება წყალი ზღვაში, მდინარე დაიწრიტება და დაშრება.

⁶ამყრალდებიან მდინარეები, დაიწრიტებიან და დაშრებიან ეგვიპტის მდინარეები, ლერწამი და ჭილი დაჭკნება.

⁷გაშიშვლდება მინდვრები, მდინარის მთელი სანაპირო და მთელი ნათესები გადახმება, განიავდება და გაქრება.

⁸დაღონდებიან მებადურები: ცრემლად დაიღვრება მდინარეში ანკესის ყველა ჩამშვები, ქანცი გაუწყდება წყალზე ბადეების გამშლელს.

⁹დანაღვლიანდებიან სელის მრთველნი და თეთრი ტილოს მქსოველნი.

¹⁰დაიმსხვრევა მათი დაზგები, ქირის მუშები დამწუხრდებიან.

¹¹შეიშალნენ ცოყანის მთავრები: ფარაონის ბრძენ მრჩეველთა თათბირი გაცუდდა! როგორ ეტყვით ფარაონს: „მე ბრძენთა ძე ვარ, ძე უწინდელ მეფეთა?“

¹²სად არიან ისინი? სად არიან შენი ბრძენნი? ახლა გითხრან მათ და შეიტყონ, რა გადაუწყვიტა ცაბაოთ უფალმა ეგვიპტეს!

¹³გაბრიყვდნენ ცოყანის მთავარნი, მოტყუვდნენ ნოფის მთავარნი, გზა-კვალი აურიეს ეგვიპტეს მისი ტომების მთავრებმა.

¹⁴უფალმა დაუბნელა მათ გონება, და მათ მთლად გადარიეს ეგვიპტე: ახლა ეგვიპტე მთვრალსა ჰგავს, თავის ნარწყევში რომ დააბიჯებს.

¹⁵და არ იქნება ეგვიპტეში საქმე, რის გაკეთებასაც შეძლებს თავი და კუდი, ფინიკის ფოთოლი და ლერწამი.

¹⁶იმ დღეს ეგვიპტელები ქალებს დაემსგავსებიან, დაფრთხებიან და შეეშინდებათ ცაბაოთ უფლის მოღერებული ხელისა.

¹⁷და იქნება იუდას მიწა შიშის ზარი ეგვიპტისათვის; ყოველი, ვინც მას გაიხსენებს, აკანკალდება ცაბაოთ უფლის განაჩენით, რაც მან განაჩინა მასზე.

¹⁸იმ დღეს ეგვიპტის ქვეყანაში ხუთი ქალაქი ილაპარაკებს ქანაანის ენაზე და დაიფიცებს ცაბაოთ უფალს, ერთ მათგანს ყირ-ჰერესს უწოდებენ.

¹⁹იმ დღეს უფლის სამსხვერპლო ეგვიპტის ქვეყნის შუაგულში იქნება და უფლის სვეტი – მის საზღვრებთან.

²⁰და იქნება ის ნიშნად და მოწმობად ცაბაოთ უფალზე ეგვიპტის ქვეყანაში, რადგან შეჰღაღადებენ ისინი უფალს შემჭირვებელთა გამო, და ის გამოუგზავნის მათ მხსნელსა და ქომაგს და უშველის მათ.

²¹და გამოეცხადება უფალი ეგვიპტეს; და ეგვიპტელნი შეიცნობენ უფალს იმ დღეს, და მოიტანენ მსხვერპლსა და ძღვენს, და აღთქმას აღუთქვამენ უფალს და კიდეც აღასრულებენ.

²²და დაჰკრავს უფალი ეგვიპტეს; დაჰკრავს და განკურნავს; და მოიქცევიან ისინი უფლისაკენ, და ის შეისმენს მათ ვედრებას, და განკურნავს მათ.

²³იმ დღეს ეგვიპტიდან აშურისაკენ იქნება დიდი გზა, და ივლიან აშურელნი ეგვიპტეში და ეგვიპტელნი – აშურში; და ეგვიპტელნი აშურელებთან ერთად თაყვანს სცემენ უფალს.

²⁴იმ დღეს ისრაელი მესამე სახელმწიფო იქნება – გაუთანასწორდება ეგვიპტესა და აშურს. კურთხევა იქნება დედამიწის შუაგულში.

²⁵ცაბაოთ უფალი ასე აკურთხებს მათ: „კურთხეულ იყოს ჩემი ხალხი – ეგვიპტელნი და ჩემი ხელის ნაკეთები – აშური და ჩემი სამკვიდრებელი – ისრაელი.“