Read სბს–2013 ესაია 27 Bible Online

ესაია 27 - სბს–2013 bible

ესაია 27

¹იმ დღეს დასჯის უფალი თავისი სასტიკი, დიდი და მაგარი მახვილით ლევიათანს, მოსრიალე გველს, ლევიათანს, დაკლაკნილ გველს, და მოკლავს ზღვის ურჩხულს.

²იმ დღეს იმღერებთ მასზე – მშვენიერ ვენახზე:

³მე, უფალი, მისი მცველი ვარ, ყოველ წამს ვრწყავ მას; დღითა და ღამით ვიცავ მას, რათა არავინ შემოიჭრას.

⁴რისხვა არ არის ჩემში, მაგრამ თუ ვინმე ნარ-ეკალს დაყრის ჩემს წინ, შევებრძოლები მას, ერთიანად გადავბუგავ.

⁵უკეთესია, დაცვა ეძებოს ჩემგან და მშვიდობის პირობა დადოს ჩემთან, დამიზავდეს.

⁶დადგება დღე და ფესვს გაიდგამს იაკობი, გაიფურჩქნება და გაიკვირტება ისრაელი, და გაავსებს ქვეყნიერებას თავისი ნაყოფით.

⁷თუ უგვემია უფალს ისრაელიანები, როგორც გვემდა მათს მგვემელთ? თუ დაუხოცავს მას იმდენი ისრაელიანი, რამდენიც მათი მტრებისგანაა დახოცილი?

⁸მიბრუნდი მათ წინააღმდეგ და მიუვლინე უბედურება – გაძევება. შორს გაიტაცა უფლის მძვინვარე ქროლვამ, აღმოსავლეთის ქარის მსგავსმა.

⁹ამით წარიხოცება იაკობის ურჯულოება; და ეს იქნება ნაყოფი მისი ცოდვის მიტევებისა: როცა სამსხვერპლოთა ლოდებს იგი კირქვასავით დაფშვნის, როცა აღარ იქნება აშერები და მზის კერპები.

¹⁰რადგან გამაგრებული ქალაქი დაიცლება, საცხოვრებლები მიტოვებული და მიგდებული იქნება უდაბნოსავით. ხბო დაიწყებს იქ ძოვნას და იქ დაიდებს ბინას, და დაიწყებს ყლორტების კორტნას.

¹¹როდესაც გახმება მისი ამონაყარი, მოამსხვრევენ, ქალები მოვლენ და დაწვავენ მას; რადგან ეს ხალხი უგონოა. ამიტომაც მათი შემოქმედი არ შეიბრალებს მათ, მათი შემქმნელი არ შეიწყალებს მათ.

¹²და იქნება იმ დღეს, რომ გალეწავს უფალი მთელ ძნას, დიდი მდინარიდან ეგვიპტის ნაღვარევამდე, და თქვენ, ისრაელიანებო, სათითაოდ აიკრიფებით.

¹³და იქნება იმ დღეს, რომ ბუკს დასცემენ და მოვლენ აშურის ქვეყანაში დაკარგულნი და ეგვიპტის ქვეყანაში გაძევებულნი, და თაყვანს სცემენ უფალს იერუსალიმის წმიდა მთაზე.