Read სბს–2013 ესაია 28 Bible Online

ესაია 28 - სბს–2013 bible

ესაია 28

¹ვაი, გვირგვინს, რომლითაც ამყობენ მთვრალი ეფრემელნი, დამჭკნარ ყვავილს, ეფრემის მშვენებასა და დიდებას, ყვავილს, რომელიც ამაღლებულა ღვინით ძლეულთა პოხიერი ველის თხემზე.

²აჰა, უფლის ძლიერი გოლიათი, მსგავსი თავსხმისა და სეტყვის თქეშისა, გამანადგურებელი ქარიშხლისა, აბორგებული მდინარეების წყლებისა, მიწაზე დაანარცხებს მას თავისი ხელით.

³ფეხით გაითელება მემთვრალე ეფრემელთა სიამაყის გვირგვინი,

⁴იგივე დაემართება მისი დიდებული მშვენიერების დამჭკნარ ყვავილს, პოხიერი ველის თხემზე რომ არის, რაც ზაფხულის ნაადრევ ლეღვს, რომელსაც მისი მნახველი მოწყვეტს და უმალ შეჭამს.

⁵იმ დღეს ცაბაოთ უფალი იქნება გვირგვინი და მშვენიერება, დიდების ჯიღა თავისი ერის ნატამალისთვის.

⁶უფალი იქნება სიმართლის სული სასამართლოში მჯდომისათვის, და სიმამაცე კარიბჭეზე მომწყდარი მტრის მომგერიებელთათვის.

⁷მაგრამ ესენიც ბარბაცებენ ღვინისგან და ფეხი ერევათ თაფლუჭისაგან. მღვდელიცა და წინასწარმეტყველიც ფეხზე ვეღარ დგანან მათრობელასგან, სძლიათ ღვინომ, გონება აურიათ თაფლუჭმა, ბანცალებენ ხილვებისას, ენა ებორკებათ განკითხვისას.

⁸რადგან ტაბლები სავსეა ნარწყევით, აღარ დარჩა სუფთა ადგილი.

⁹ამბობენ: ვინ უნდა დამოძღვროსო მაგისთანამ ცოდნით? ვის უნდა განუმარტოსო მოსმენილი? რძეს გადაჩვეულ ჩვილებს? ძუძუს მოწყვეტილთ?

¹⁰რადგან რჩევა რჩევაზე, რჩევა რჩევაზე, წესი წესზე, წესი წესზე, ცოტა აქ, ცოტა იქ.

¹¹ასევე გაურკვეველ ენაზე და უცხო კილოზე ილაპარაკებს უფალი ამ ხალხთან დღეიდან.

¹²უწინ ის ამბობდა: „აქ თქვენ დასვენება გელით, დაე დაღლილებმა დაისვენონ. აქ მშვიდი ადგილია.“ მაგრამ მათ არ სურდათ მოსმენა.

¹³და ასეთი იქნება მათთვის უფლის სიტყვა: რჩევა რჩევაზე, რჩევა რჩევაზე, წესი წესზე, წესი წესზე, ცოტა აქ, ცოტა იქ... და წავლენ ისინი, დაეცემიან, დაილეწებიან, მახეში გაებმებიან, ტყვეობა მოუწევთ.

¹⁴ისმინეთ უფლის სიტყვა, მოლაყბენო, იერუსალიმელთა განმგებელნო.

¹⁵თქვენ ამბობთ: ჩვენ კავშირი შევკარითო სიკვდილთან და სიკვდილის სამეფოსთან დავდეთო ხელშეკრულება. როდესაც წამლეკავი წარღვნა გადაივლის, ჩვენ ვერ მოგვეწევა, რადგან სიცრუე გავიხადეთო თავშესაფარად და ტყუილიაო ჩვენი საფარველი.

¹⁶ამიტომ ასე ამბობს უფალი ღმერთი: „აჰა, ქვა დავდე სიონში, საიმედო ქვა, ძვირფასი ქვაკუთხედი, მყარი საძირკველი, ვინც მას დაენდობა, არ შეირყევა.

¹⁷მე დავდებ სამართალს ლარად და სიმართლეს – შვეულად, და წარხვეტავს სეტყვა სიცრუის თავშესაფარს, და სამალავს წყალი წარღვნის.

¹⁸დაირღვევა თქვენი კავშირი სიკვდილთან და ხელშეკრულება სიკვდილის სამეფოსთან ვერ გაძლებს. და როდესაც წამლეკავი წარღვნა გადმოივლის, გზას გამოიკვლევს თქვენსკენ.

¹⁹როცა კი გადმოივლის, წაგიღებთ – დილა იქნება, შუადღე, თუ საღამო! როცა ამ ამბავს შეიტყობთ, კანკალი შეგიპყრობთ.“

²⁰რადგან მოკლე იქნება საწოლი, რომ ფეხი გაშალოთ, და საბანი – ვიწრო, რომ შიგ გაეხვიოთ.

²¹რადგან აღდგება უფალი და იბრძოლებს, როგორც ფერაციმის მთაზე და, როგორც გიბეონის ველზე. და, უჩვეულო საქმეებს სჩადის და არნახულ საქმეებს მოიმოქმედებს.

²²მაშ, ნუ მკრეხელობთ, რათა არ დამძიმდეს თქვენი ბორკილები, რადგან მე ცაბაოთ უფლისაგან მოვისმინე, რომ მთელ ქვეყანას განადგურება ელის.

²³ყური მომაპყარით და ისმინეთ ჩემი ხმა; ყურადღებით იყავით და შეისმინეთ ჩემი ნათქვამი.

²⁴განა მხვნელი, როცა თესვის დრო დგება, მაშინა ხნავს, მაშინა ფარცხავს თავის მიწას?

²⁵განა არ ასწორებს მის ზედაპირს, მიმოფანტავს სოინჯს და თესავს კვლიავს, ხორბალს და ქერს თავის ადგილზე და ასლს ყანის კიდეებზე?

²⁶ესა აქვს წესად დადებული, მისმა ღმერთმა დამოძღვრა ასე.

²⁷რადგან ზოგი ჯიში კევრითა და ურიკით არ ილეწება – სახრითა და ჯოხებით ბერტყავენ.

²⁸ხორბლისა და ქერის ძნას კევრით ლეწენ, მაგრამ ძნა რომ მობზევდება, კევრს აჩერებენ, რომ კევრის კოხებმა და ცხენის ფლოქვებმა მარცვალი არ დააზიანონ.

²⁹ესეც ცაბაოთ უფლისაგან გამოდის. საოცარია მისი რჩევა, დიდია მისი სიბრძნე.