Read სბს–2013 ესაია 29 Bible Online

ესაია 29 - სბს–2013 bible

ესაია 29

¹ვაი, არიელ, არიელ, დავითის ქალაქო! დრო გაივლის წლითიწლობით, დღესასწაულს მოჰყვება დღესასწაული.

²მე შევაჭირვებ არიელს, და გამეფდება იქ ვაი და ვიში; და იქნება ის ჩემთვის არიელი.

³დავბანაკდები შენს ირგვლივ, გოდლებს ავაგებ შენს გარშემო, საალყო სიმაგრეებს აღგიმართავ წინ.

⁴დაბლა, მიწაში აღმოჩნდები, იქიდან ილაპარაკებ, მიწა-მტვრიდან გაისმება შენი ნათქვამი და, როგორც ხმა გარდაცვლილისა, მიწიდან გაისმება, ჩურჩულივით წამოვა შენი სიტყვები მიწა-მტვრიდან.

⁵მტვრის კორიანტელივით მრავალი მტერი მოგადგება და ბზესავით ურიცხვი – მრისხანე ურდო; უეცრად მოხდება ეს, წამიერად.

⁶ცაბაოთ უფალი გამოგეცხადება ქუხილით, მიწისძვრითა და დიდი ხმით, ქარიშხლით, გრიგალითა და შემჭმელი ცეცხლით.

⁷და, როგორც სიზმარი, როგორც ღამის მოჩვენება იქნება არიელთან მებრძოლი ხალხების სიმრავლე, და ყველა მის წინააღმდეგ გალაშქრებულის, მის სიმაგრეთა წინააღმდეგ გამოსულთა და მის შემავიწროებელთა,

⁸როგორც მშიერს ესიზმრება, რომ ვითომ ჭამს, მაგრამ როცა გამოიღვიძებს, ხედავს, რომ შია; როგორც მწყურვალს ესიზმრება, რომ ვითომ სვამს, მაგრამ როცა გამოიღვიძებს, ხედავს, რომ დაქანცულია და ყელი უშრება. ასე მოუვა ყველა ურდოებს, სიონის მთის წინააღმდეგ გალაშქრებულთ.

⁹შეყოვნდით და გაოცდით: მათ სხვებიც დააბრმავეს და თავადაც დაბრმავდნენ; მთვრალები არიან, მაგრამ არა ღვინით, – ბარბაცებენ, მაგრამ არა სასმელით.

¹⁰რადგან გადმოგაღვარათ უფალმა ძილქუშის სული და თვალი დაგიხუჭათ, წინასწარმეტყველნო, გონება დაგიხშოთ, მისნებო.

¹¹ყოველგვარი ხილვა თქვენთვის გახდა, როგორც სიტყვები ბეჭედდასმული გრაგნილისა, რომელსაც აძლევენ წერა-კითხვის მცოდნეს და ეუბნებიან: წაიკითხეო; მაგრამ ის პასუხობს: „არ შემიძლია, რადგან ბეჭედდასმულია.“

¹²და გადასცემენ იმ გრაგნილს წერა-კითხვის უცოდინარს და ეუბნებიან: წაიკითხეო; მაგრამ ის პასუხობს: არ ვიციო წერა-კითხვა.

¹³და თქვა უფალმა: ეს ხალხი მხოლოდ სიტყვით არის ჩემთან ახლოს, მხოლოდ სიტყვით მცემს პატივს, მათი გული კი შორს არის ჩემგან. მათი შიში ჩემს წინაშე – მხოლოდ მცნებაა, კაცთაგან რომ აუთვისებიათ.

¹⁴ამიტომ, აჰა, კვლავ მოვახდენ ამ ხალხზე გასაოცარ, არნახულ საქმეებს. და დაიკარგება მის ბრძენთა სიბრძნე, გონება არ შერჩებათ გონიერთ.

¹⁵ვაი მათ, ვინც ღრმად დამალვას ფიქრობენ, რათა უფალს დაუმალონ თავისი განზრახვა, წყვდიადში აკეთებენ თავის საქმეებს და ამბობენ: ვინ დაგვინახავსო?

¹⁶რა უგუნურებაა! განა მეთუნე და თიხა ერთია? განა ნაკეთობა იტყვის თავის გამკეთებელზე: არ გავუკეთებივარო? და ქმნილება იტყვის თავის შემქმნელზე: არაფერი გაეგებაო?

¹⁷ცოტაც, სულ ცოტაც და ლიბანი ბაღნარად იქცევა, და ბაღნარი, ტყედ არ დაფასდება.

¹⁸იმ დღეს ყრუები გაიგონებენ გრაგნილიდან ამოკითხულ სიტყვებს, და ბრმათა სიბნელითა და წყვდიადით დახშული თვალები იხილავენ.

¹⁹წამებულნი მეტად და მეტად გაიხარებენ უფალში, და ღარიბ-ღატაკნი ისრაელის წმიდაში იზეიმებენ.

²⁰რადგან აღარ იქნება მტარვალი, და ბოლო მოეღება მაგინებელს, და მოისპობიან ურჯულოებისთვის თავდადებულნი,

²¹სიტყვით რომ აცდუნებენ ადამიანს და კარიბჭესთან მოსულ მომჩივანს მახეს უგებენ, და მართალს დევნიან.

²²ამიტომ ასე ამბობს იაკობის სახლზე უფალი, აბრაამის გამომსყიდველი: აღარ მოუწევს იაკობს შერცხვენა და ამიერიდან აღარ გაუფითრდება მას სახე.

²³რადგან როცა თავისთან დაინახავს თავის შვილებს, ჩემს ხელთა ქმნილებას, – და ყველა ისინი წმიდა ჰყოფენ ჩემი სახელის სიწმიდეს, წმიდა ჰყოფენ იაკობის წმიდა ღმერთს, ისრაელის ღმერთის წინაშე შეშინდებიან.

²⁴სულით ცთომილნი გონს მოეგებიან და ჭირვეულნი დაიმოძღვრებიან.