Read სბს–2013 ესაია 3 Bible Online

ესაია 3 - სბს–2013 bible

ესაია 3

¹რადგან, აჰა, მეუფე, ცაბაოთ უფალი, წაართმევს იერუსალიმსა და იუდას არძალსა პურისასა და ძალსა წყლისასა,

²მამაც მეთაურსა და მებრძოლს, მსაჯულსა და წინასწარმეტყველს, მისანსა და უხუცესს,

³ორმოცდაათის თავსა და დიდებულს, მრჩეველს, ბრძენ გრძნეულსა და ოსტატ ჯადოქარს.

⁴და დავაყენებ ყმაწვილებს მათ მეთაურებად და ბავშვები იბატონებენ მათზე.

⁵ხალხი ერთმანეთს დათრგუნავს, თითოეული – თავის მოყვასს, გაუთავხედდება ყმაწვილი მოხუცს და უღირსი – პატივდებულს.

⁶დაიჭერს კაცი თავის ძმას თავისი მამის სახლში და ეტყვის: „სამოსელი გაქვს, გახდი ჩვენი უფროსი და იყოს ეს ნანგრევები შენს ხელთ!“

⁷ხოლო ის მაშინათვე უპასუხებს ფიცით: „ვერ ვიქნები მე ხალხის მკურნალი, როცა ჩემს სახლში არც პურია და არც სამოსელი, ნუ დამაყენებთ მე ხალხის მთავრად!“

⁸რადგან წაბორძიკდა იერუსალიმი და დაეცა იუდა, რაკი მათი სიტყვა და საქმე უფლის წინააღმდეგაა, უპატიებელი მისი დიდების თვალში.

⁹მათი სახის გამომეტყველება მოწმობს მათ წინააღმდეგ, და თავიანთ ცოდვებს ღიად აცხადებენ, როგორც სოდომელნი, არ ფარავენ; ვაი, მათ სულს, რადგან თავს ბოროტება მიაგეს!

¹⁰უთხარით მართალს, რომ სიკეთეს ეწევა, რადგან თავის შრომის ნაყოფს შეჭამს.

¹¹ვაი ურჯულოს, რადგან მოიმკის თავისი ხელის ნამოქმედარს!

¹²ბავშვები არიან ჩემი ხალხის მჩაგვრელნი, ქალები ბატონობენ მათზე; ჩემო ხალხო, შენი მეგზურები გაცდუნებენ და გზა-კვალს გირევენ.

¹³აღდგა უფალი სამსჯავროზე – და დგას ხალხთა განსასჯელად.

¹⁴უფალი მსჯავრს სდებს მისი ხალხის უხუცესებს და მთავრებს: თქვენ ააოხრეთ ვენახი; ღარიბ-ღატაკთა ნაძარცვით სავსეა თქვენი სახლები.

¹⁵რატომ ავიწროებთ ჩემს ხალხსა და ჩაგრავთ ღარიბ-ღატაკთ? – ამბობს მეუფე, ცაბაოთ უფალი.

¹⁶და თქვა უფალმა: „რადგან გამედიდურდნენ სიონის ასულნი და დადიან ყელმოღერებით და ურცხვი მზერით, გამოდიან ცუნდრუკით და ფერხთა რგოლების ჟღარუნით,

¹⁷თხემებს გაუქაჩლებს უფალი სიონის ასულთ და გაუშიშვლებს სარცხვინელს.“

¹⁸იმ დღეს შემოაცლის მათ უფალი ფეხსამკაულ შიბებს, შუბლსაკრავებსა და ყელსაბამებს,

¹⁹საყურეებს, სამაჯურებსა და პირბადეებს,

²⁰თავსაბურავებს, ხელსამკაულებს და სარტყლებს, სუნამოს ჭურჭლებს და ავგაროზებს,

²¹ბეჭდებსა და ნესტოს რგოლებს,

²²მოხდენილ ტანსაცმელსა და მოსასხამებს, ხელმანდილებსა და ქისებს,

²³სარკეებს, პერანგებს, დოლბანდებსა და ხალათებს.

²⁴და იქნება სუნამოს ნაცვლად – სიმყრალე, სარტყლის ნაცვლად – ჯვალო, კულულთა ნაცვლად – სიქაჩლე, მშვენიერი მოსასხამის ნაცვლად – ჯვალო, სილამაზის ნაცვლად – დაღი.

²⁵შენი ვაჟკაცები მახვილით დაეცემიან და შენი მამაცები – ბრძოლის ველზე.

²⁶და მოჰყვებიან მოთქმას და გოდებას მისი ბჭენი; თავად კი მტვერსა და ნაცარში იჯდება იავარქმნილი.