Read სბს–2013 ესაია 31 Bible Online

ესაია 31 - სბს–2013 bible

ესაია 31

¹ვაი მათ, ვინც ეგვიპტეში ჩადიან შემწეობისთვის, ცხენებისა და ეტლების იმედით, რამეთუ მრავლადაა ის, და იმედით მხედრებისა, რადგან მძლავრნი არიან ისინი, ისრაელის წმიდა ღმერთს კი არ უყურებენ, უფალს არ ეკითხებიან რჩევას.

²მაგრამ ის ბრძენია; და მოაწევს უბედურებას, და თავის სიტყვებს არ გააუქმებს; წინ აღუდგება ბიწიერთა სახლს და ავისმოქმედთა შემწეთ.

³მაგრამ ეგვიპტელნი ადამიანები არიან და არა ღმერთები, და მათი ცხენები ხორცია და არა სული; უფალი ხელს მოუღერებს და წაბორძიკდება შემწე, დაეცემა შეწევნილიც, და ყველანი ერთად დაიღუპებიან.

⁴რადგან ასე მითხრა მე უფალმა: როგორც ლომი და როგორც ლომის ბოკვერი ბრდღვინავენ თავის ნადავლზე, თუნდაც მთელი მწყემსობა დაჰკიოდეს, მათი ხმებისაგან არ დაფრთხებიან და მათ სიმრავლეს არ შეუშინდებიან, ასე ჩამოვა ცაბაოთ უფალი საომრად სიონისთვის და მისი მთისთვის.

⁵როგორც ფრინველი – ბარტყებს, ისე გადაეფარება ცაბაოთ უფალი იერუსალიმს, დაიცავს და უშველის, დაინდობს და გადაარჩენს.

⁶ისრაელიანებო, მიუბრუნდით იმას, ვისაც ისე ჯიუტად განუდექით.

⁷რადგან იმ დღეს გადაყრის ყოველი კაცი თავის ვერცხლისა და ოქროს კერპებს, თქვენმა ხელებმა რომ გააკეთეს თქვენივე ცოდვისათვის.

⁸აშურელნი დაეცემიან მახვილით, მაგრამ არა კაცის მახვილით! მახვილი მოსრავს მათ, მაგრამ არა ადამიანის მახვილი! – ის გაექცევა მახვილს, მისი ჭაბუკები კი ტყვედ ჩაცვივიან.

⁹შიში შეაზანზარებს მის სიმაგრეებს და ჩამოიშლებიან ისინი: მისი მთავარნი საბრძოლო ბაირაღების დანახვაზე დაფრთხებიან, – ამბობს უფალი, ვისი ცეცხლიც სიონზე გიზგიზებს და სახმილი – იერუსალიმში.