Read სბს–2013 ესაია 32 Bible Online

ესაია 32 - სბს–2013 bible

ესაია 32

¹აჰა, სამართლიანად იმეფებს მეფე და მთავარნი სიმართლით იმთავრებენ.

²ყოველი მათგანი იქნება, როგორც საფარი ქარში და თავშესაფარი გრიგალში; როგორც წყლის ნაკადები ნაგვალ მიწაზე, როგორც ჩრდილი მაღალი კლდისა მოღალულ მიწაზე.

³აღარ დაებინდებათ მხილველთ თვალები და მსმენელთ აღარ დაეცმებათ ყურთ.

⁴და ქარაფშუტათა გული ცოდნას ეზიარება, და ენაბრგვილნი მკაფიოდ ამეტყველდებიან.

⁵უგუნურს აღარ დაერქმევა ღირსეული და გაიძვერაზე არ იტყვიან პატიოსანიაო,

⁶რადგან უგუნური სისულელეს როშავს და სიავეს განიზრახავს; უკეთურია მისი საქციელი და უკუღმართად ლაპარაკობს უფალზე. მშიერს ლუკმას უქრობს და მწყურვალს წყალს ართმევს.

⁷გაიძვერას იარაღი ბოროტეულია; ვერაგობას განიზრახავს, რომ უპოვარი ცრუ სიტყვით დაღუპოს, თუნდაც ის უპოვარი მართალი იყოს.

⁸ქველი კი სიქველეზე ფიქრობს, და თავის სიქველეზე დგას.

⁹წამოდექით უზრუნველო ქალებო, ისმინეთ ჩემი ხმა! უდარდელო ასულნო, ყური მოაპყარით ჩემს სიტყვებს!

¹⁰წელიწადი და რამდენიმე დღე და შეძრწუნდებით, უდარდელნო: რადგან აღარ იქნება რთველი, ალოობა აღარ დადგება.

¹¹გეშინოდეთ, უზრუნველნო, შეძრწუნდით, უდარდელნო, გაიხადეთ და გაშიშვლდით და ჯვალო შემოირტყით წელზე.

¹²ძუძუები გამოითქვიფეთ გულით სასურველი ხოდაბუნებისა და ნაყოფიერი ვენახების გამო.

¹³ჩემი ხალხის ველ-მინდვრები გაივსება ეკალ-ნარით, და ზეიმით სავსე ქალაქის სიხარულით სავსე სახლებიც;

¹⁴რადგან დაიცლება სასახლეები, ობლად დარჩება ხმაურიანი ქალაქი, ბორცვი და საგუშაგო კოშკი გავერანდება უკუნისამდე – კანჯართა სალაღობოდ და ფარების სადგომებად,

¹⁵სანამ არ მოგვეფინება სული მაღლიდან და უდაბნო ბაღნარად არ იქცევა, და ბაღნარი ტყედ არ შეირაცხება.

¹⁶და დაივანებს უდაბნოში სამართალი და სამართლიანობა – ნაყოფიერ მიწაზე.

¹⁷და იქნება სიმართლის საქმე იქნება მშვიდობა, და სამართლიანობის ნაყოფი – სიმშვიდე და უსაფრთხოება უკუნისამდე.

¹⁸მაშინ ჩემი ხალხი დამკვიდრდება მშვიდობიან სავანეებში, უსაფრთხო დაბებსა და მშვიდ ნავთსაყუდლებში.

¹⁹გამანადგურებელი სეტყვა დაატყდება ტყეს და ქალაქი მიწასთან გასწორდება.

²⁰ნეტარება გელით წყლის პირას მთესველთ, ყველგან დამწყემსავთ თქვენს ხარსა და სახედარს.