Read სბს–2013 ესაია 33 Bible Online

ესაია 33 - სბს–2013 bible

ესაია 33

¹ვაი შენ, მარბეველო, რომელიც არ დარბეულხარ, გამცემო, რომელიც არ გაცემულხარ! დაამთავრებ რბევას და შენც დაგარბევენ, ბოლო მოგეღება.

²უფალო! შეგვიწყალე, რამეთუ შენით ვსასოებთ; მკლავი განგვიმტკიცე ყოველ დილით და გვიხსენი გაჭირვების ჟამს.

³შენს მრისხანე ხმაზე გაიქცევიან ერები, შენს შემართვაზე გაიფანტებიან ტომები.

⁴აიკრიფება თქვენი ნადავლი, როგორც კრეფს ბოცომკალი, კალიების გუნდივით დაესხმიან მას თავს.

⁵მაღალია უფალი, რადგან მაღლის მკვიდრია, ის აავსებს სიონს სამართლითა და სიმართლით.

⁶და დადგება შენი უსაფრთხო ჟამი, სიუხვე ხსნისა, სიბრძნისა და ცოდნისა; უფლის შიში შენი საუნჯეა.

⁷აჰა, მათი რაინდები ყვირიან ქუჩებში; მშვიდობის მაცნენი მწარედ ტირიან.

⁸დაიცალა გზები; აღარ ჩანს მგზავრი; დაირღვა შეთანხმებები, მოწმე ათვალწუნებულია, პატივს აღარავის სცემენ.

⁹გლოვობს, მწუხარებს დედამიწა, ხმება; შერცხვენილია ლიბანი, ჩამოჭკნა; შარონი უდაბნოს დაემსგავსა, ფოთოლი დასცვივდა ბაშანსა და ქარმელს.

¹⁰„ახლა ავდგები, – ამბობს უფალი, – ახლა განვდიდდები, ახლა აღვზევდები.

¹¹თივით ორსულნო, ჩალას შობთ, თქვენი სუნთქვა თქვენვე გშთანთქავთ, როგორც ცეცხლი.

¹²და დაიწვებიან ადამიანები, კირივით გახდებიან, აკაფული ძეძვივით ჩაიფერფლებიან ცეცხლში.

¹³ისმინეთ, შორს მყოფნო, რას მოვიმოქმედებ მე; და თქვენ, ახლო მყოფნო, შეიცანით ჩემი ძალა.“

¹⁴სიონზე შეშინდნენ ცოდვილები; შიშის ზარი დაეცათ უკეთურთ: „რომელი ჩვენგანი დაუდგება შემჭმელ ცეცხლს? რომელი ჩვენგანი დაუდგება მარადიულ ხანძარს?“

¹⁵ის ვინც სიმართლით დადის და ჭეშმარიტებას ლაპარაკობს; ვისაც სძულს ძარცვით მონახვეჭი, ვინც ხელს არ ჰკიდებს ქრთამს, ყურს იცობს, რათა არ ესმოდეს სისხლისღვრის ამბები, და თვალს ხუჭავს, რათა არ ხედავდეს ბოროტებას;

¹⁶ის სიმაღლეებში დაივანებს; შეუმართებელი კლდეებია მისი თავშესაფარი; თავისი პური მიეცემა, თავისი წყალი არ შეუწყდება.

¹⁷შენი თვალები მეფეს იხილავენ მის ბრწყინვალებაში; შორეულ ქვეყანას იხილავენ.

¹⁸შენი გული გაიხსენებს მხოლოდ საშინელებებს და იტყვი: „სადაა ახლა ის, ვინც თვლიდა და სწონიდა? სადაა ის, კოშკებს რომ ითვლიდა?“

¹⁹გამძვინვარებულ ხალხს აღარ იხილავ, ხალხს, რომლის ლაპარაკიც მძიმე და გაუგებარია.

²⁰შეხედე სიონს, ჩვენი სადღესასწაულო შეკრებების ქალაქს! შენი თვალები იხილავენ იერუსალიმს, მყუდრო სავანეს, შეურყეველ კარავს; მისი პალოები არასოდეს მოირყევა და არც ერთი მისი საბელი არ გაწყდება.

²¹იქ ჩვენთან იქნება დიადი უფალი, მდინარეთა და ფართო არხების ნაცვლად, სადაც ნიჩბიანი ხომალდი არ შემოვა და დიდი გემი არ გაივლის მასში.

²²რადგან უფალია ჩვენი მსაჯული, უფალია ჩვენი რჯულმდებელი, უფალია ჩვენი მეფე; ის გვიხსნის ჩვენ.

²³მოეშვა შენი საბელები, ვეღარ აკავებენ თავის ფუძეზე ანძას, აფრას ვეღარ ჭიმავენ. მაშინ განაწილდება დიდი ნადავლი, ხეიბარნიც დაიწყებენ ალაფობას.

²⁴და აღარ იტყვის მკვიდრი: ავად ვარო! იქ მცხოვრებ ხალხს მიეტევება ცოდვები.