Read სბს–2013 ესაია 38 Bible Online

ესაია 38 - სბს–2013 bible

ესაია 38

¹იმ დღეებში სასიკვდილოდ დასნეულდა ხიზკია. და მივიდა მასთან წინასწარმეტყველი ესაია, ამოცის ძე, და უთხრა: „ასე ამბობს უფალი: ანდერძი დაუტოვე შენს სახლს, რადგან მოკვდები, ვერ გადარჩებიო.“

²მაშინ ხიზკიამ პირი კედლისაკენ ქნა და შეევედრა უფალს;

³„გაიხსენე, უფალო, რომ შენს წინაშე ჭეშმარიტებით და ერთგულებით დავდიოდი, და იმას ვაკეთებდი, რაც შენ მოგწონდა.“ და მწარედ ატირდა ხიზკია.

⁴და იყო უფლის სიტყვა ესაიას მიმართ:

⁵„მიდი და უთხარი ხიზკიას: ასე ამბობს-თქო უფალი, დავითის, მამაშენის ღმერთი: მე ვისმინე შენი ვედრება, დავინახე შენი ცრემლები, და, აჰა, მე ვუმატებ შენი სიცოცხლის დღეებს კიდევ თხუთმეტ წელიწადს.

⁶აშურის მეფის ხელიდან გიხსნით მე – შენცა და ამ ქალაქსაც.

⁷და ეს იყოს იმის ნიშნად უფლისაგან, რომ იგი შეასრულებს იმ სიტყვას, რომელიც მან თქვა:

⁸აჰა, ათი საფეხურით უკან დავაბრუნებ ჩრდილს, რომელიც ახაზის კიბის საფეხურებზე ჩავიდა.“ და დაბრუნდა მზე უკან: ჩრდილმა ათი საფეხურით აიწია, იმავე საფეხურებით, რომლებზეც ის იყო ჩამოსული.

⁹ლოცვა ხიზკიასი, იუდას მეფისა, როდესაც განიკურნა ავადმყოფობისაგან:

¹⁰ვთქვი: ჩემი დღეების შუაძალზე მივადექი შავეთის კარიბჭეებს, მომაკლდება დანარჩენი წლები.

¹¹ვთქვი: ვეღარ ვიხილავ უფალს, უფალს ცოცხალთა ქვეყანაზე! ვეღარც ადამიანს ვიხილავ წუთისოფელში.

¹²ჩემი სავანე აყრილი და წაღებულია, როგორც მწყემსის კარავი; ჩემი სიცოცხლე ავახვიე, როგორც მქსოველმა მოქსოვილი ტილო; დგიმის ძირშივე მომკვეთს უფალი. დღითა და ღამით მიღებდა ბოლოს.

¹³განთიადამდე ვითხოვდი შველას, მაგრამ უფალი ლომივით მილეწავდა ძვლებს, დღითა და ღამით მიღებდა ბოლოს.

¹⁴მერცხალივით ვჟიოდი, წეროსავით ვყიოდი, მტრედივით ვკვნესოდი, დაღლილი თვალებით შევყურებდი ზეცას: უფალო, გამიჭირდა, მომეშველე!

¹⁵რა მეთქმის? – როგორც მითხრა, ისე აღასრულა. სულგამწარებული ვიხეტიალებ მთელი ჩემი სიცოცხლის წლები.

¹⁶უფალო! ასე ცოცხლობენ ადამიანები და ასეთია ჩემი სულის სიცოცხლე. შენ განმკურნავ მე და შენ მაცოცხლებ მე.

¹⁷კეთილდღეობა არა მხვდომია მე წილად, არამედ სიმწარე, დიდი სიმწარე. შენ იხსენი ჩემი სული სიკვდილისა და გახრწნის სამარიდან, შენ მოისროლე ჩემი ცოდვები ზურგს უკან.

¹⁸შავეთი არ გაქებს შენ, სიკვდილი არ შეგასხამს ხოტბას, სამარხებში ჩასულნი არ სასოობენ შენი ჭეშმარიტებით.

¹⁹ცოცხალი! მხოლოდ ცოცხალი გადიდებს შენ, როგორც მე გადიდებ დღეს. მამა მოუყვება შვილებს შენს ჭეშმარიტებას.

²⁰უფალი მიხსნის მე! და სიმღერებს ვიმღერებთ სიმთა ჟღერით უფლის ტაძარში მთელი ჩვენი სიცოცხლე.

²¹და თქვა ესაიამ: „მოუტანონ ლეღვის ტყლაპი, წყლულზე დაადონ და გადარჩება.“

²²თქვა ხიზკიამ: „რა ნიშნით ვინიშნებ, რომ კვლავ ავალ უფლის ტაძარში?“