Read სბს–2013 ესაია 40 Bible Online

ესაია 40 - სბს–2013 bible

ესაია 40

¹ანუგეშეთ, ანუგეშეთ ჩემი ერი! – ამბობს თქვენი ღმერთი. –

²გული მოუოხეთ იერუსალიმს და აუწყეთ, რომ დასრულდა მისი ტყვეობა, რომ გამოსყიდულია მისი ცოდვები, რადგან ორმაგად მიუზღო უფალმა ყველა მისი ცოდვების გამო.

³ხმა მღაღადებლისა: „უდაბნოში განუმზადეთ გზა უფალს, ბილიკები მოუსწორეთ ტრამალებზე ჩვენს ღმერთს!

⁴ყოველი ხევი ამოივსება და ყოველი მთა და ბორცვი დადაბლდება, ფერდობები დავაკდება და მთაგრეხილები – დასწორდება.

⁵გამოჩნდება უფლის დიდება და იხილავს ამას ყოველი ხორციელი ერთად, რადგან უფლის ბაგემ თქვა ეს.“

⁶ხმა ამბობს: „უქადაგე!“ მე ვკითხე: „რა ვუქადაგო?“ – „უქადაგე, რომ ყოველი ხორციელი ბალახია და მთელი მისი მშვენება – მინდვრის ყვავილი.

⁷ხმება ბალახი, ჭკნება ყვავილი, როდესაც უფალი დაუბერავს მას. ასეა, ბალახია ხალხი!

⁸ხმება ბალახი, ჭკნება ყვავილი, ჩვენი ღმერთის სიტყვა კი მარად რჩება.“

⁹მაღალ მთაზე ადი, სიონო, მაცნეო სიხარულისა! იერუსალიმ, მაცნეო სიხარულისა, დაიგრგვინე! აღიმაღლე, ნუ ძრწი! დასძახე იუდას ქალაქებს: „აჰა, თქვენი ღმერთი!“

¹⁰აჰა, მოვა უფალი ღმერთი, ძლიერია იგი, და იხელმწიფებს მისი მარჯვენა! აჰა, მასთანაა მისი ჯილდო და მისი გარჯის ნაყოფი მის წინაშეა.

¹¹ის დამწყემსავს თავის ფარას, როგორც მწყემსი; თავისი მარჯვენით შეკრებს კრავებს და უბით ატარებს, წინ წაუძღვება ბატკნის დედებს.

¹²ვის ამოურწყავს ზღვა მუჭით და გადაუზომია ცა მტკავლით, ვის ჩაუტევია საწყაოში ქვეყნიერების ქვიშა და სასწორის პინებით ვის აუწონია მთები და ბორცვები?

¹³ვის წარუმართავს უფლის სული? და ვის დაუმოძღვრავს იგი თავისი რჩევით?

¹⁴ვისთვის უთხოვია მას რჩევა და ვინ განაბრძნო იგი? ვინ დააყენა ის სიმართლის გზაზე? ვინ აღჭურვა ის ცოდნით, და ვინ მიუთითებს გონიერების გზისაკენ?

¹⁵აჰა, მთელი ხალხები, ისე არიან უფალთან, როგორც ერთი წვეთი სავსე კოკასთან, როგორც სასწორის პინაზე დარჩენილი მტვერი; აჰა, კუნძულებს მტვერივით ახვეტავს უფალი.

¹⁶ლიბანის ტყეები არ ეყოფა სამსხვერპლო ცეცხლად და მისი პირუტყვი – სრულადდასაწველად.

¹⁷მთელი ხალხები არარაობაა მის წინაშე, ფუჭად და ამაოდ შეირაცხებიან მის თვალში.

¹⁸მაშ ვის მიამგვანებდით ღმერთს? რა მსგავსებას მოუძებნიდით მას?

¹⁹კერპი ხომ ხელოსნის ჩამოსხმულია, ოქრომჭედელი ოქროთი ჭედავს მას და ვერცხლის შიბებით ამკობს.

²⁰ვინც ვერ გასწვდება ასეთ შესაწირავს, ულპობელ ხეს ირჩევს, გამოცდილ ხელოსანს ეძებს, რათა გამოახარატებინოს ისეთი კერპი, ურყევად რომ იდგება.

²¹ნუთუ არ იცით? ნუთუ არ გსმენიათ? ნუთუ არ გეუწყათ დასაბამიდან? ნუთუ ვერა სცანით დედამიწის საფუძვლები?

²²უფალი ზის დედამიწის კამარაზე, ხოლო დედამიწის მკვიდრნი კალიებს ჰგვანან მის წინაშე. მან გაფინა ცა მსუბუქი ქსოვილივით და საცხოვრებელი კარავივით გაშალა.

²³ის მეუფეებს არაფრად აქცევს და ქვეყნის მსაჯულთ – არარაობად.

²⁴ის იყო დაინერგნენ, ის იყო დაითესნენ, ის იყო მიწაში გაიდგეს ფესვი, და როგორც კი დაჰქროლა უფალმა მათ, გახმნენ და ქარიშხალმა ბზესავით წაიღო ისინი.

²⁵„ვის მიმამსგავსებთ მე, ვინ შემედრება მე?“ – ამბობს წმიდა.

²⁶აღაპყრეთ თვალი ზეცაში და იხილეთ – ვინ შექმნა ისინი? მან, ვისაც სათვალავით გამოჰყავს ეს ციური მხედრობა, ყველას მათი სახელით მოუხმობს. ყველა გამოდის – ერთიც არ დააკლდება – ასეთია მისი ძალა და ძლევამოსილება.

²⁷რატომ ამბობ, იაკობ, და ლაპარაკობ, ისრაელ: დაფარულიაო ჩემი გზა უფლისაგან, და ჩემი სამართალი განუკითხავიაო ღვთისაგან?

²⁸განა არ იცი? განა არ გსმენია, რომ მარადიული უფალი ღმერთი, შემქმნელი ქვეყნიერების კიდეებისა, არ იღლება და არ იქანცება? მიუწვდომელია მისი გონება.

²⁹ის აძლევს ძალას დაღლილს და დაქანცულს სიმტკიცეს მატებს.

³⁰იღლებიან ჭაბუკნი და იქანცებიან, ყმაწვილნი ეცემიან,

³¹ხოლო უფლის მოსავნი ძალას განიახლებენ; ფრთებს გაშლიან ორბებივით, მორბენალნი არ დაიქანცებიან, მავალნი არ დაიღლებიან.