Read სბს–2013 ესაია 43 Bible Online

ესაია 43 - სბს–2013 bible

ესაია 43

¹მაგრამ ახლა, ასე ამბობს უფალი, შენი შემქმნელი, იაკობ, და შენი გამომსახველი, ისრაელ: „ნუ გეშინია, რადგან მე გამოგისყიდე, მოგიწოდე შენი სახელით; ჩემი ხარ შენ.

²როდესაც გაივლი წყლებში, მე შენთანა ვარ, მდინარეებში გატოპავ და ვერ წაგლეკავენ ისინი. ცეცხლში გაივლი და არ დაიწვები, მისი ალი არ მოგედება.

³რადგან მე ვარ უფალი შენი ღმერთი, ისრაელის წმიდა, შენი მხსნელი; შენს გამოსასყიდში ეგვიპტე მივეცი, ქუში და სება – შენს სანაცვლოდ.

⁴ძვირფასი ხარ შენ ჩემს თვალში, შეუფასებელი და მე შეგიყვარე შენ, სხვა ადამიანებს გავიღებ შენს სანაცვლოდ და სხვა ხალხებს შენი სიცოცხლის ფასად.

⁵ნუ გეშინია, მე შენთანა ვარ; აღმოსავლეთიდან მოვიყვან შენს თესლ-ტომს და დასავლეთიდან შემოგიკრებ შენ.

⁶ჩრდილოეთს ვეტყვი: ‘მომეცი ისინი!’ და სამხრეთს: ‘ნუ დამიკავებ მათ!’ მოიყვანეთ ჩემი ძენი შორეთიდან და ჩემი ასულნი – ქვეყნის კიდეებიდან,

⁷ყოველი, ჩემი სახელით წოდებული, ვინც ჩემი დიდებისათვის გავაჩინე; ვინც გამოვსახე და შევქმენი!“

⁸გამოიყვანეთ ხალხი, რომელთაც არც თვალი აკლიათ და არც ყური, მაგრამ ბრმანი და ყრუნი არიან.

⁹ყველა ხალხები ერთად უნდა შეიკრიბნენ და უნდა შეერთდნენ ტომები; მათგან წინასწარ ვინ გვითხრა, ვინ გვაუწყა ის, რაც აღსრულდა? წარმოადგინონ მოწმენი, რომ თავი იმართლონ, რათა მათმა მსმენელმა თქვას: „მართალია!“

¹⁰„თქვენ ჩემი მოწმენი ხართ! – ამბობს უფალი, – და ჩემი მორჩილი, რომელიც მე ამოვარჩიე, რათა იცოდეთ და მერწმუნოთ მე, და გაიგოთ, რომ ეს მე ვარ: ჩემამდე არ ყოფილა სხვა ღმერთი და ჩემს შემდეგაც არ იქნება.

¹¹მე ვარ უფალი და არ არის ჩემს გარდა სხვა მხსნელი.

¹²მე ვთქვი და გიხსენი, და გამოგიცხადე, რომ არ არის თქვენს შორის უცხო ღმერთი, თქვენა ხართ ჩემი მოწმენი! – ამბობს უფალი, – რომ მე ვარ ღმერთი;

¹³და ძველთაგან – ეს მე ვარ! და ვერავინ იხსნის ჩემი ხელიდან. რაც მე მოვიმოქმედე, ვინ შეცვლის მას?“

¹⁴ასე ამბობს უფალი, თქვენი გამომხსნელი, ისრაელის წმიდა: „თქვენი გულისათვის გავგზავნი მე ბაბილონში და დავუმტვრევ საკეტურებს და დავამხობ ქალდეველებს, თავიანთი ხომალდებით რომ მედიდურობდნენ.

¹⁵მე, ვარ უფალი, თქვენი წმიდა, ისრაელის გამჩენი, თქვენი მეფე.“

¹⁶ასე ამბობს უფალი, ზღვაზე გზის გამხსნელი და ძლიერ წყლებზე – ბილიკისა,

¹⁷რომელმაც გამოიტყუა ეტლები და ცხენები, ძლიერ მეომართა ურდოები; ერთიანად ჩაწვნენ ისინი, ვეღარ ადგნენ, დაიშრიტნენ, პატრუქივით ჩაქრნენ.

¹⁸ნუ გაიხსენებთ წარსულს და მომავალზე ნუ იფიქრებთ!

¹⁹რადგან მე შევქმნი ახალს, ახლა გამობრწყინდება იგი, ნუთუ ვერ შეამჩნევთ? უდაბნოში გავიყვან გზას, ტრამალებზე წყლის ნაკადებს ვადენ.

²⁰თვით ველის მხეცნიც კი განმადიდებენ – ტურები და სირაქლემები, როცა მივუშვებ უდაბნოში წყალს და ტრამალებზე წყლის ნაკადებს ამოვახეთქინებ, რათა წყალი ვასვა ჩემს რჩეულ ხალხს.

²¹ეს ხალხი მე ჩემთვის შევქმენი, რათა თქვას ჩემი სადიდებელი.

²²მაგრამ შენ არ მოგიხმივარ, იაკობ, ჩემთვის არ დაქანცულხარ, ისრაელ!

²³არ მოგიყვანია ჩემთვის კრავები სრულადდასაწველად და მსხვერპლებით არ გიცია პატივი; ძღვნით არ მიმსახურებიხარ და არც გუნდრუკის კმევით მომიღლიხარ.

²⁴ოქროზე არ გიყიდია ჩემთვის სურნელოვანი ლერწამი, და შენი სამსხვერპლოს ლურთებით არ გაგიძღვივარ, შენ კი მამსახურებდი შენი ცოდვებით, მქანცავდი შენი დანაშაულებებით.

²⁵მე ვარ, მე ის ვარ, ვინც ჩემი გულისათვის წარვხოცავ შენს დანაშაულებებს, და შენს ცოდვებს არ გავიხსენებ.

²⁶მომაგონე, განვიკითხოთ ერთმანეთი! ილაპარაკე, რათა გამართლდე!

²⁷შენმა მამამთავარმა შესცოდა და შენი შუამავლები გადამიდგნენ.

²⁸შენმა მთავრებმა შეაგინეს ჩემი საწმიდარი და მივეცი იაკობი წარსაწყმედელად, და ისრაელი – საგინებლად.