Read სბს–2013 ესაია 45 Bible Online

ესაია 45 - სბს–2013 bible

ესაია 45

¹ასე ეუბნება უფალი თავის ცხებულს, კიროსს: შენი მარჯვენა მე მიჭირავს, რათა დაგიმორჩილო ხალხები, სარტყლები შევხსნა მეფეებს წელზე, რათა გაიღოს შენს წინაშე ყველა კარი და კარიბჭენი აღარ დაიკეტოს.

²მე წაგიძღვები და მთებს დავავაკებ, ბრინჯაოს კარებებს შევლეწავ და რკინის ურდულებს დავამტვრევ.

³და მოგცემ შენ ბნელში დაცულ საუნჯეთ და საიდუმლოდ დამარხულ თვალ-მარგალიტს, რათა მიხვდე, რომ მე, უფალი, მოგიხმობ სახელით, მე, ისრაელის ღმერთი!

⁴ჩემი მონის, იაკობის, და ისრაელის, ჩემი რჩეულის გულისათვის მოგიხმე ჩემი სახელით, პატივი დაგდე, თუმცა შენ არ მიცნობდი მე.

⁵მე ვარ უფალი, და სხვა არავინაა, ჩემს გარდა არ არიან სხვა ღმერთები; თუმცა შენ მე არ მიცნობდი, მაგრამ მე მაინც შემოგარტყი სარტყელი,

⁶რათა იცოდნენ მზის აღმოსავლეთში და დასავლეთში, რომ არავინაა ჩემს გარდა; მე ვარ უფალი და სხვა არავინაა.

⁷მე გამვსახავ ნათელს და ვქმნი ბნელს, ვაგზავნი მშვიდობას და უბედურებას მოვავლენ; მე, უფალი, ვიქმ ყოველივე ამას.

⁸ჩამოასხურე, ზეცავ, მაღლიდან და ღრუბლებმა სიმართლე გადმოღვარონ; გაიხსნას მიწა და გამოიღოს ხსნა, და სამართალი აღმოცენდეს მასთან ერთად. მე, უფალმა, შევქმენი ეს ყოველივე.

⁹ვაი, თავის უფალთან მოშუღარს, ერთ ნატეხს თიხის ნამსხვრევთაგან! განა ეტყვის თიხა თავის გამომსახველს: რას აკეთებო? ან შენი ნაკეთობა თუ გეტყვის: ხელი არ გივარგაო?

¹⁰ვაი, მას, ვინც თავის მამას ეუბნება: რისთვის გამაჩინეო ქვეყანაზე? ან დედას: რისთვის ეწამეო ჩემი შობით?

¹¹ასე ამბობს უფალი, ისრაელის წმიდა ღმერთი, მისი გამომსახველი: „ჩემს მომავალ ძეებზე მეკითხებით და ჩემი ხელის ნაკეთებზე მიმითითებთ?

¹²მე შევქმენი მიწა და ადამი გავაჩინე მასზე; ჩემმა ხელებმა, გარდაართხეს ცა და მთელი მისი მხედრობა განვაწესე.

¹³მე აღვძარი კიროსი სიმართლით და მის ყველა გზებს მე მოვასწორებ. ის ააშენებს ჩემს ქალაქს და ჩემს დევნილთ ის გაუშვებს უსასყიდლოდ!“ – ამბობს ცაბაოთ უფალი.

¹⁴ასე ამბობს უფალი: „ეგვიპტის ჭირნახული, ქუშის ნავაჭრი და საბეანელნი – ტანადი ხალხი, შენთან გადმოვლენ და შენი იქნებიან; შენ შემოგიდგებიან, ბორკილასხმულნი წამოვლენ და შენ გცემენ თაყვანს, შენ მოგძახებენ: ‘მხოლოდ შენთან არის ღმერთი და სხვა ღმერთები არ არის!’“

¹⁵ჭეშმარიტად შენა ხარ დაფარული ღმერთი, ისრაელის ღმერთი, მხსნელი.

¹⁶შერცხვებიან და გაწბილდებიან ყველანი. ერთიანად ჩაცვივიან სირცხვილში კერპთა მკეთებელნი.

¹⁷უფალი იხსნის ისრაელს საუკუნო ხსნით; არ შერცხვებით და არ გაწბილდებით უკუნითი უკუნისამდე.

¹⁸რადგან ასე ამბობს უფალი, ცათა შემოქმედი, (ის არის ღმერთი, დედამიწის გამომსახველი და მისი შემქმნელი; მან დაამყარა იგი; იმად არ შეუქმნია, რომ უკაცრიელი ყოფილიყო, არამედ დასასახლებლად გამოსახა): – „მე ვარ უფალი, და სხვა არ არის!

¹⁹ფარულად არ მილაპარაკია დედამიწის ბნელ ადგილზე; არ მითქვამს მე იაკობის თესლ-ტომისთვის: ამაოდ მეძებეთ-მეთქი. მე ვარ უფალი, სიმართლის მთქმელი, ჭეშმარიტების გამომცხადებელი.

²⁰შეიკრიბეთ და მოდით, ერთად მოდექით, წარმართთაგან გადარჩენილნო! არაფერი იციან მათ, თავიანთ ხის კერპს რომ ატარებენ და ევედრებიან ღმერთს, რომელსაც არ შეუძლია მათი ხსნა.

²¹გამოაცხადეთ და თქვით, ითათბირეთ ერთმანეთში. ვინ გვასმინა მოსახდენი ძველთაგან, წინასწარ ვინ თქვა ეს? განა მე არა, უფალმა? და არ არის სხვა ღმერთი ჩემს გარდა, ღმერთი მართალი და მხსნელი ღმერთი არაა ჩემს მეტი.

²²მოიქეცით ჩემსკენ და გადარჩებით, დედამიწის ყოველო კიდევ, რადგან მე ვარ ღმერთი და არ არის სხვა ღმერთი.

²³ჩემს თავს ვიფიცებ: ჩემი პირიდან სიმართლე გამოდის, გადაუთქმელი სიტყვა, რომ ჩემს წინაშე მოიდრიკება ყოველი მუხლი და მე დამიფიცებს ყოველი ენა.

²⁴იტყვიან ჩემზე: მხოლოდ უფალშიაო სიმართლე და ძალა.“ შერცხვენილნი წარდგებიან უფლის წინაშე ისინი, ვინც მას მტრობდნენ.

²⁵უფლის წყალობით გამართლდება და განდიდდება ისრაელის მთელი მოდგმა.