Read სბს–2013 ესაია 47 Bible Online

ესაია 47 - სბს–2013 bible

ესაია 47

¹ჩამოდი და ჩაჯექი მტვერში, ქალწულო, ბაბილონის ასულო! დაჯექი მიწაზე უტახტოდ, ქალდეველთა ასულო, რადგან მეტად აღარ გიწოდებენ შენ ნაზსა და სათუთს.

²აიღე დოლაბი და დაფქვი ფქვილი, მოიხადე პირბადე, აიკრიფე კალთები, გაიშიშვლე წვივები, გადაიარე მდინარეები.

³გამოჩნდება შენი სიშიშვლე და დანახულ იქნება შენი სირცხვილი. შურს ვიძიებ და ვერავინ დამაბრკოლებს, –

⁴ჩვენი მხსნელი ისრაელის წმიდა ღმერთია. ცაბაოთ უფალია მისი სახელი.

⁵უხმოდ იჯექი და ჩაიძირე წყვდიადში, ქალდეველთა ასულო, რადგან აღარ გიწოდებენ სამეფოთა დედოფალს.

⁶მე განვურისხდი ჩემს ხალხს, გავანადგურე ჩემი სამკვიდრებელი და შენ ჩაგიგდე ხელში ისინი, მაგრამ შენ არ მოიღე მათზე წყალობა, მოხუცს მეტისმეტად დაუმძიმე უღელი.

⁷შენ ამბობდი: საუკუნოდ ვიქნებიო დედოფალი! არ მიიტანე ეს ამბები შენს გულთან, არ გიფიქრია, ბოლო რა იქნებოდა.

⁸ახლა კი, ისმინე, ფუფუნების მოყვარულო, უზრუნველად რომ ცხოვრობ და გულში ფიქრობ: „სხვა არავინაა ჩემს გარდა; არ დავქვრივდები და შვილები არ დამეკარგებიან.“

⁹მაგრამ გეწვევა ეს ორივე ერთ დღეს, უეცრივ: ძეთა დაკარგვაცა და სიქვრივეც; სრულად დაგატყდება თავს, ვერ გიშველის შენი ურიცხვი გრძნეულებები, შენი მაგარი ჯადოები.

¹⁰რადგან დაიმედებული ხარ ბოროტის ქმნაზე, შენ გაიძახი: „ვერავინ მხედავს!“ შენმა სიბრძნემ და შენმა ცოდნამ გაცდუნა; შენ ამბობ გულში: „მე ვარ და არავინ არის ჩემს გარდა!“

¹¹თავს დაგატყდება საშინელება, შენ ვერ გაიგებ, საიდან მოდის ის; და დაგეცემა უბედურება, ვერ შეძლებ მის უკუგდებას; უეცრივ მოვა შენს თავს განადგურება, რასაც არ ელი.

¹²იდექი ახლა შენს გრძნეულებებზე და შენს უამრავ ჯადოქრობაზე, რაზეც ზრუნავდი შენი სიყმაწვილიდან; იქნებ გიშველოს, იქნებ გაუმაგრდე.

¹³დაქანცული ხარ მრავალი თათბირებით; დაე, მოდგნენ ცისმზომელნი, ვარსკვლავთმეტყველნი, ახალმთვარეთა მაუწყებელნი, და გიხსნან იმისგან, რაც უნდა დაგატყდეს თავს.

¹⁴აჰა, ჩალასავით გახდნენ, ცეცხლმა შთანთქა ისინი, თავი ვერ დააღწიეს ალს, ნაკვერჩხალიც არ დარჩა გასათბობად, არც ცეცხლი – მის პირას ჩამოსაჯდომად.

¹⁵ასეთები გახდნენ შენთვის ისინი, რომლებთანაც შრომობდი, ვისთანაც ვაჭრობდი სიყმაწვილიდან; ყველა თავისი გზით წახეტიალდა; აღარავინაა შენი მხსნელი!