Read სბს–2013 ესაია 48 Bible Online

ესაია 48 - სბს–2013 bible

ესაია 48

¹ისმინეთ, იაკობის სახლო, ისრაელის სახელით წოდებულნო და იუდას თესლიდან გამოსულნო; ისინი უფლის სახელს იფიცავენ და ისრაელის ღმერთს მოუხმობენ, მაგრამ შორს არიან ჭეშმარიტებისა და სიმართლისაგან,

²რადგან წმიდა ქალაქიდან წარმოშობილს უწოდებენ თავს და დანდობილნი არიან ისრაელის ღმერთზე, რომლის სახელია ცაბაოთ უფალი.

³რაც ადრე იყო, დიდი ხნით ადრე ვაცხადებდი; ჩემი პირიდან გამოვიდა ის, მე ვიტყოდი და უცბად ვიქმოდი, და ყოველივე სრულდებოდა.

⁴მე ვიცოდი, რომ ჯიუტი ხარ და რკინის ძარღვები გაქვს კისერში, ბრინჯაოსია შენი შუბლი.

⁵ამიტომაც ვიდრე ეს მოვიდოდა, დიდი ხნით ადრე გიცხადებდი, გაუწყებდი, რომ არ გეთქვა: „ჩემმა ქანდაკმა გააკეთა ეს, და ჩემმა ჩამოსხმულმა კერპმა მიბრძანა, რომ ასე იქნებოდა!“

⁶შენ მოგისმენია, – ახლა იხილე ეს ყველაფერი! ნუთუ არ აღიარებ ამას? ახლა მე გაუწყებ შენ ახალს და დაფარულს, რაც არ იცოდი.

⁷ახლა მოხდა ის, და არა დიდი ხნის წინ, და არა გუშინ; დღემდე არ გსმენია შენ ეს, ვერ იტყვი: „აჰა, მე ვიცოდი ეს!“

⁸არც გსმენია და არც იცოდი, არც უწინდლიდან იყო გახსნილი შენი ყური; რადგან ვიცოდი, მიღალატებდი, ვიცოდი, რომ დედის მუცლიდანვე შემცოდე გერქვა.

⁹ჩემი სახელის გულისათვის ვიცხრობდი რისხვას, და ჩემი დიდების გულისათვის ვიოკებდი თავს, რომ არ მომესპე.

¹⁰აჰა, მე გამოგადნე, მაგრამ არა როგორც ვერცხლი – წამების ბრძმედში გამოგცადე.

¹¹ჩემი თავისთვის, მხოლოდ ჩემი თავისთვის ვაკეთებ ამას, რადგან, როგორ უნდა შევალახვინო ჩემი სახელი? ჩემს დიდებას სხვას არ დავუთმობ.

¹²მისმინე მე, იაკობ და ისრაელ, ჩემგან წოდებულო: მე იგივე ვარ, მე ვარ პირველი და მე ვარ უკანასკნელი.

¹³ჩემმა ხელმა დააფუძნა დედამიწა, და ჩემმა მარჯვენამ გადაჭიმა ზეცა; მე მოვუხმობ მათ და ერთად დადგებიან.

¹⁴შეგროვდით ყველა და ისმინეთ! მათგან ვინ იწინასწარმეტყველა ეს? უფალმა შეიყვარა იგი; ის შეასრულებს უფლის ნებას ბაბილონზე, და მისი მკლავი ქალდეველებზე აღიმართება.

¹⁵მე, მე ვთქვი და მე მოვუხმე მას, მე მოვიყვანე ის და იგი გაიმარჯვებს.

¹⁶მომიახლოვდით მე, ისმინეთ ეს: მე თავიდანვე ფარულად არ ვლაპარაკობდი; იმ დროიდანვე, რაც ეს ხდებოდა, მე იქ ვიყავი. ახლა კი უფალმა ღმერთმა და მისმა სულმა აქ მომავლინა.

¹⁷ასე ამბობს უფალი, შენი მხსნელი, ისრაელის წმიდა ღმერთი: მე ვარ უფალი, შენი ღმერთი, სასიკეთოდ რომ გმოძღვრავს და მიგიძღვის იმ გზაზე, რომელზეც უნდა დადიოდე.

¹⁸ნეტავ ყურად გეღო ჩემი მცნებები! მაშინ მდინარესავით იდენდა შენი მშვიდობა, და შენი სიმართლე – ზღვის ტალღებივით.

¹⁹ქვიშასავით მრავალი იქნებოდა შენი თესლი, და შენი წიაღის ნაშიერნი მისი კენჭებივით. არ ამოიკვეთებოდა და არ წაიშლებოდა მისი სახელი ჩემს წინაშე.

²⁰გამოდით ბაბილონიდან, გაიქეცით ქალდეველთაგან! მხიარული ხმით გამოაცხადეთ, აუწყეთ ეს, გაავრცელეთ ქვეყნის კიდემდე, თქვით: გამოისყიდაო უფალმა თავისი მონა იაკობი!

²¹არ მოსწყურებიათ, როცა მიჰყავდა ისინი უდაბნოს გზით: კლდიდან უდინა მათ წყალი, გააპო კლდე და გადმოჩქეფა წყალმა.

²²„არ არის მშვიდობა ბოროტეულთათვის!“ – ამბობს უფალი.