Read სბს–2013 ესაია 50 Bible Online

ესაია 50 - სბს–2013 bible

ესაია 50

¹ასე ამბობს უფალი: სად არის გაყრილობის ბარათი, რომლითაც მე დედათქვენი გავუშვი? ან რომელი ჩემი მევახშისთვის მიმიყიდიხართ ვალში? არა, თქვენ თქვენი ურჯულოების გამო ხართ გაყიდულნი, და დედათქვენიც თქვენი დანაშაულის გამო არის გაშვებული.

²მოვედი და რატომ არავინ არის, ვიძახი და რატომ არავინ იძლევა პასუხს? განა დამოკლდა ჩემი ხელი გამოსყიდვისთვის, ნუთუ აღარ არის ჩემში ძალა ხსნისა? მე ხომ ჩემი მუქარით ზღვას ვაშრობ, უდაბნოდ ვაქცევ ველ-მინდვრებს, სადაც მდინარეები მიედინებოდნენ, თევზი იხოცება წყურვილით და ყროლდება უწყლობით.

³მე ზეცას წყვდიადით ვფარავ და ძაძებით ვბურავ.

⁴უფალმა ღმერთმა მომცა მე ბრძენთა ენა, რომ შევძლო დაღლილის გამხნევება სიტყვით. ყოველ დილით მაღვიძებს ის მე, აღვიძებს ჩემს ყურს, რომ მოვისმინო, როგორც ბრძენნი ისმენენ.

⁵უფალმა ღმერთმა გამიხსნა მე ყური, და მე არ გავუძალიანდი, უკან არ დავიხიე.

⁶ზურგი მივუშვირე ჩემს მგვემელთ და ყბები – ვინც წვერებს მაგლეჯდნენ. სახეს არ ვიფარავდი გინებისა და ფურთხისაგან.

⁷ცაბაოთ უფალი მეხმარება მე, ამიტომაც არ დავმცირებულვარ, ამიტომ გავიკაჟე სახე და ვიცი, რომ არ შევრცხვები.

⁸მიახლოვდება ჩემი გამამართლებელი: ვინ არის, რომ მედავება? ერთად დავდგეთ! ვინ არის ჩემი მომჩივანი? მოვიდეს ჩემთან.

⁹აჰა, ცაბაოთ უფალი მეხმარება მე: ვინ უნდა გამამტყუნოს? ყველა ისინი სამოსელივით დაიძენძებიან, ჩრჩილი შეჭამს მათ.

¹⁰ვინ არის თქვენგან, ვისაც ეშინია უფლისა, ვინც უსმენს მისი მსახურის ხმას? ვინ დადის ბნელში და ნათელს ვერ ხედავს, უფლის სახელს ესავს და მინდობილია თავის ღმერთს.

¹¹აჰა, ცეცხლის გამჩაღებელნო, ალმოდებული ისრებით აღჭურვილნო, იარეთ თქვენი ცეცხლის ალში და ხანძრებში, თქვენ რომ დაანთეთ! ჩემი ხელიდან მიიღებთ ამას; ტანჯვით დაიხოცებით.