Read სბს–2013 ესაია 51 Bible Online

ესაია 51 - სბს–2013 bible

ესაია 51

¹მისმინეთ მე, სიმართლის მწყურვალნო, უფლის მაძიებელნო! შეხედეთ კლდეს, რომლისგანაც ხართ გამოკვეთილნი, და ნაპრალის სიღრმეს, რომლისგანაც ხართ ამოყვანილნი.

²შეხედეთ აბრაამს, თქვენს მამას, და სარას, თქვენს გამჩენს; რადგან იმ ერთს მოვუხმე, ის ვაკურთხე და ის გავამრავლე.

³რადგან უფალი ანუგეშებს სიონს, ანუგეშებს მის ყველა ნანგრევს; ედემივით აქცევს მის უდაბნოს და მის ტრამალს – უფლის წალკოტივით, სიხარული და მხიარულება იქნება მასში, სამადლობელი და გალობის ხმები.

⁴მისმინე, ჩემო ერო, და ჩემო ტომო, ყური მიგდე! რადგან ჩემგან გამოვა რჯული და ჩემს სამართალს ხალხებს სინათლედ დავუდგენ.

⁵ახლოვდება ჩემი სიმართლე; მოაწია ჩემმა ხსნამ და ჩემი მარჯვენა განსჯის ხალხებს. მე დამენდობიან კუნძულები და ჩემი მკლავის იმედი ექნებათ.

⁶მაღლა ზეცას მიაპყარით თვალი და დაბლა დედამიწას დახედეთ, რადგან ზეცა კვამლივით გაიფანტება და დედამიწა სამოსელივით დაიძენძება, და მისი მცხოვრებნიც მკბენარივით გაწყდებიან, ჩემი ხსნა კი საუკუნოდ იქნება, და ჩემი სიმართლე არ შეწყდება.

⁷მისმინეთ მე, სიმართლის მცოდნენო, ხალხო, რომელთაც ჩემი რჯული გულში გაქვთ. ნუ გეშინიათ კაცთაგან შეურაცხებისა და მათი ლანძღვა-გინება ნუ დაგაფრთხობთ.

⁸რადგან, როგორც ტანსაცმელს, ჩრჩილი შეჭამს მათ, და როგორც მატყლს – მატლი, ჩემი სიმართლე კი საუკუნოდ იქნება, და ჩემი ხსნა – თაობიდან თაობაში გადავა.

⁹გაიღვიძე, გაიღვიძე, ძალი შეიმოსე, უფლის მარჯვენავ! გაიღვიძე, როგორც ძველ დროში, შორეულ თაობებში! განა შენ არ შემუსრე რაჰაბი, შენ არ განგმირე ურჩხული?

¹⁰განა შენ არ ამოაშრე ზღვა, წყლები დიდი უფსკრულისა? ზღვის სიღრმენი გზად არ აქციე გამოხსნილთა გასავლელად?

¹¹და დაბრუნდებიან უფლის მიერ გამოსყიდულნი და მოვლენ სიონში სიმღერით, და საუკუნო სიხარული იქნება მათ თავს. შვებას და სიხარულს ეწევიან ისინი: ოხვრა და ვარამი განქარდება.

¹²მე ვარ, მე თავად თქვენი ნუგეშისმცემელი. ვინ ხარ შენ, რომ გეშინია მოკვდავი კაცისა? და ადამის ძისა, რომლის სიცოცხლეც ბალახივითაა?

¹³დაგვიწყებია უფალი, შენი შემქმნელი, ცათა გარდამრთხმელი და დედამიწის დამფუძნებელი. და დღენიადაგ გეშინია შემაჭირვებლის რისხვისა, რომელიც შენს მოსასპობად ემზადებოდა. მაგრამ სადღაა შენი შემაჭირვებლის რისხვა?

¹⁴მალე გათავისუფლდება დატყვევებული, არ მოკვდება დილეგში, არ მოაკლდება პური.

¹⁵მე ვარ უფალი, შენი ღმერთი, ის ვინც ზღვას დაატეხს ქარიშხლებს და აღმუვლებს მის ზვირთებს; ის, ვისი სახელიც ცაბაოთ უფალია.

¹⁶მე ჩავდებ ჩემს სიტყვებს შენს ბაგეებში და ჩემი ხელების ჩრდილით დაგფარავ შენ, რათა მოვაწყო ზეცა და დავაფუძნო დედამიწა, და ვუთხრა სიონს: „ჩემი ერი ხარ შენ!“

¹⁷გამოიღვიძე, გამოიღვიძე, ადექი, იერუსალიმ, შენ, რომელმაც შესვი უფლის ხელიდან მისი რისხვის თასი! თრობის თასი ბოლომდე გამოცალე.

¹⁸არა ჰყავდა მას წინამძღოლი მის ნაშობ ძეთა შორის; არა ჰყავდა ხელის შემშველებელი ძეთა შორის, რომლებიც მან დაზარდა.

¹⁹ეს ორივე შენ გეწია – ვის დაენანები? – ძარცვა და დაქცევა, შიმშილი და მახვილი – ვინ განუგეშოს შენ?

²⁰შენი ძენი დაუძლურდნენ, ყოველი ქუჩის კუთხე-კუნჭულებში ყრიან, როგორც ბადეში გაბმული არჩვები, სავსენი უფლის რისხვით, შენი ღმერთის მუქარით.

²¹ამიტომ ისმინე ეს, წამებულო და უღვინოდ მთვრალო!

²²ასე ამბობს შენი მეუფე, უფალი და ღმერთი შენი, მოსარჩლე თავისი ხალხისა: „აჰა, ხელიდან გართმევ თრობის თასს, ჩემი რისხვის ფიალას, რომ მეტჯერ აღარ შესვა იგი.

²³და ხელთ მივცემ მას შენს მტანჯველთ, რომლებიც გეუბნებოდნენ: პირქვე დაემხე, რათა შენს ზურგზე გადავიაროთო! და შენ შენი ზურგი მიწასავით დააგე, და ქუჩასავით – გამვლელ-გამომვლელთათვის.“