Read სბს–2013 ესაია 59 Bible Online

ესაია 59 - სბს–2013 bible

ესაია 59

¹აჰა, არ დამოკლებულა უფლის ხელი, რომ იხსნას; და არ დამძიმებულა მისი ყური, რომ ისმინოს.

²რადგან თქვენმა უკეთურებამ გაგმიჯნათ ერთმანეთისგან თქვენ და თქვენი ღმერთი, და თქვენმა ცოდვებმა დაფარეს მისი სახე თქვენგან, რომ არ ესმინა.

³რადგან თქვენი ხელები დასვრილია სისხლით და თქვენი თითები – უკეთურებით; თქვენი ბაგენი სიცრუეს ლაპარაკობენ, თქვენი ენა ტყუილს წარმოთქვამს.

⁴არავინ იმაღლებს ხმას სიმართლისთვის, არავინ იცავს ჭეშმარიტებას; ამაოთი იმედოვნებენ და სიცრუეს ლაპარაკობენ, ფეხმძიმდებიან სიავით და შობენ ბოროტებას.

⁵ასპიტის კვერცხებს ჩეკენ და ობობას ქსელს ქსოვენ. მათი კვერცხის მჭამელი მოკვდება, და თუ ვინმე გატეხს, იქედნე გამოძვრება.

⁶მათი ქსელი გამოუსადეგარია სამოსლად, და თავიანთი ნაკეთობით ვერ დაიფარავენ თავს. მათი საქმეები უსამართლო საქმეებია, და ძალმომრეობაა მათ ხელებში.

⁷ფეხები ბოროტებისაკენ გაურბით, და უდანაშაულო სისხლის დასაღვრელად ისწრაფიან; მათი ზრახვები უკეთური ზრახვებია, ნგრევა და გაპარტახებაა მათ ბილიკებზე.

⁸მშვიდობის გზები არ იციან მათ, და სამართალი არაა მათ ბილიკებზე; მათი გზები გამრუდებულია, და იმ გზებზე მავალმა არავინ იცის მშვიდობა.

⁹ამიტომაა რომ გაგვშორდა სამართალი და სიმართლე ვერ გვეწვევა ჩვენ; სინათლეს ველით, მაგრამ ბნელში ვართ, ველით გამობრწყინებას, მაგრამ წყვდიადში დავდივართ.

¹⁰ბრმებივით ხელის შეხებით მივყვებით კედელს და როგორც უთვალისჩინონი, ხელის ცეცებით დავდივართ; ვბორძიკობთ შუადღისას, როგორც ბინდში, ვართ ცოცხალთა შორის – როგორც მკვდრები.

¹¹დათვებივით ვღრიალებთ ყველანი და ვკვნესით მტრედებივით; მოველით სამართალს და არ ჩანს, მოველით ხსნას – და შორსაა ჩვენგან.

¹²რადგან გამრავლდა ჩვენი დანაშაული შენს წინაშე, და ჩვენი ცოდვები მოწმობენ ჩვენს წინააღმდეგ; რადგან ჩვენი დანაშაული ჩვენთანაა და ჩვენი შეცოდებანი ჩვენ ვიცით.

¹³ღალატი და თვალთმაქცობა ჩავიდინეთ უფლის წინაშე, და განვუდექით ჩვენს ღმერთს; ვლაპარაკობდით სიავესა და ღალატზე, ჩავისახავდით და გულიდან წარმოვთქვამდით ცრუ სიტყვებს.

¹⁴უკან დაიხია სამართალმა, და შორს განდგა სიმართლე, რადგან წაბორძიკდა ჭეშმარიტება მოედანზე, და პატიოსნება ვეღარ შემოდის.

¹⁵აღარ არის ჭეშმარიტება და ბოროტისაგან გამდგარი შეურაცხყოფილია. დაინახა უფალმა ეს და შესძაგდა მის თვალს, რომ არ არის სამართალი.

¹⁶დაინახა, რომ არ არის კაცი, და გაოცდა, რომ არ იყო დამცველი; და მიეშველა უფალს მისი მკლავი და მისი სიმართლე შეუდგა საყრდენად.

¹⁷და შეიმოსა უფალმა სიმართლე, როგორც ჯავშანი, და ხსნის მუზარადი თავის თავზე; და შეიმოსა შურისგების სამოსელი ტანსაცმლად და მრისხანება მოისხა მოსასხამივით.

¹⁸შურისგების მიხედვით მიუზღავს იგი თავის მოწინააღმდეგეთ – მრისხანებით, თავის შემჭირვებელთ – შურისგებით, კუნძულებს სამაგიეროს მიუზღავს.

¹⁹და შეეშინდებათ უფლის სახელისა დასავლეთში და მისი დიდებისა მზის აღმოსავლეთში. თუ მტერი მოვა ნიაღვარივით, უფლის ქარის ქროლვა გადენის მას.

²⁰და მოვა მხსნელი სიონისა და ცოდვას განრიდებულ იაკობის ძეთა, – ამბობს უფალი. –

²¹და ეს არის ჩემი აღთქმა მათთან, – ამბობს უფალი: – ჩემი სული, რომელიც შენზეა, და ჩემი სიტყვები, რომლებიც ჩაგიდე ბაგეებში, არ განდგებიან შენი ბაგეებიდან, არც შენი მოდგმის ბაგეებიდან, არც შენს მოდგმათა მოდგმის ბაგეებიდან, ამიერიდან და უკუნისამდე, – ამბობს უფალი.