Read სბს–2013 ესაია 60 Bible Online

ესაია 60 - სბს–2013 bible

ესაია 60

¹ადექი, განათდი, იერუსალიმ, რადგან მოვიდა შენი ნათელი და უფლის დიდება შენზე ამობრწყინდა.

²რადგან, აჰა, წყვდიადი დაფარავს დედამიწას, და ბნელი – ხალხებს; შენზე კი უფალი ინათებს და მისი დიდება შენზე გამოჩნდება.

³და მოვლენ ხალხები შენს ნათელზე და მეფენი – შენი სხივების ნათებაზე.

⁴თვალი მოატარე ირგვლივ და იხილე: ყველანი იკრიბებიან, შენთან მოდიან; შენი ძენი შორიდან მოდიან და შენი ასულნი მხრებით მოჰყავთ.

⁵მაშინ დაინახავ და გაიხარებ, აგიძგერდება გული და გაგეხსნება, რადგან შენსკენ მოიქცევა ზღვის სიმდიდრე, ხალხთა დოვლათი შენთან მოვა.

⁶აქლემთა სიმრავლე დაგფარავს შენ – მიდიანისა და ეფას კოზაკები; ყველანი შებადან მოვლენ, ოქროსა და გუნდრუკს მოიტანენ და უფლის დიდებას გააცხადებენ.

⁷კედარის მთელ ფარებს შენთან მორეკავენ; ვერძნი ნებაიოთისა შენს ხელთ იქნებიან: სასურველ მსხვერპლად ავლენ ჩემს სამსხვერპლოზე, და ჩემი დიდების სახლს გავუთქვამ სახელს.

⁸ვინ არიან ესენი, რომ ღრუბლებივით დაცურავენ, და ფრენენ, როგორც მტრედები, თავიანთ სამტრედესთან?

⁹მე მელიან კუნძულები და თარშიშის ხომალდები პირველნი მოცურავენ აქეთ! შორიდან მოჰყავთ შენი ძენი, მოაქვთ მათი ოქრო-ვერცხლი – შენი უფალი ღმერთისა და ისრაელის წმიდის სასახელოდ, რადგან მან განგადიდა შენ.

¹⁰უცხოტომელთა ძენი აგიშენებენ გალავნებს და მათი მეფენი მოგემსახურებიან, რადგან ჩემი მრისხანებისას გგვემდი შენ, ხოლო ჩემი სათნოებისას მოწყალე ვიქნები შენს მიმართ.

¹¹და ღია იქნება მუდამ შენი კარიბჭე, არც დღისით და არც ღამით არ დაიკეტება, რათა მოიტანონ შენთან ხალხთა დოვლათი და შემოიყვანონ მათი მეფეები.

¹²რადგან ხალხი და სამეფონი, რომელნიც არ დაგემორჩილებიან, – დაიღუპებიან; და ის ხალხები სრულიად გაქრებიან.

¹³ლიბანის დიდება შენთან მოვა, კვიპაროსი და ნეკერჩხალი და ფიჭვი მათთან ერთად, რათა დამიმშვენონ ჩემი საწმიდრის ადგილი, და მე განვადიდებ ჩემს კვარცხლბეკს.

¹⁴მოგივლენ ქედმოდრეკილნი შენს შემაჭირვებელთა ძენი, და თაყვანს სცემენ შენს ფერხთა მტვერს ყველა შენი მოძულენი, და გიწოდებენ საუფლო ქალაქს, ისრაელის წმიდის სიონს.

¹⁵იმის წილ, რომ მიტოვებული და მოძულებული იყავი და არავინ გადიოდა შენს გზებზე, მე გაქცევ საუკუნო სიამაყედ, სიხარულად თაობიდან თაობამდე.

¹⁶შენ გაძღები ხალხების რძით და მეფეთა ძუძუს მოსწოვ, და გაიგებ, რომ მე ვარ უფალი – შენი მხსნელი და შენი გამომსყიდველი, იაკობის ძლიერი.

¹⁷ბრინჯაოს ნაცვლად მოგიტან ოქროს და რკინის ნაცვლად ვერცხლს, ხის ნაცვლად – ბრინჯაოს და ქვის ნაცვლად – რკინას; და განმგებლად დაგიყენებ მშვიდობას და შენს ზედამხედველად – სიმართლეს.

¹⁸ვეღარ გაიგონებენ ძალადობის ხმას შენს ქვეყანაში, ძარცვისა და ნგრევისას – შენს საზღვრებში; და უწოდებ შენს გალავნებს ხსნას და შენს კარიბჭეებს – დიდებას.

¹⁹მზე აღარ გექნება დღის სინათლედ და მთვარის ციალი არ გაგინათებს, არამედ უფალი იქნება შენი საუკუნო ნათელი, და შენი ღმერთი – შენი დიდება.

²⁰აღარ ჩავა მეტად შენი მზე და შენი მთვარე არ დაცხრება, რადგან უფალი იქნება შენი საუკუნო ნათელი, და დასრულდება დღენი შენი გლოვისა.

²¹და შენი ერი ერთიანად მართალი იქნება; საუკუნოდ დაიმკვიდრებს ქვეყანას, ყლორტს – ჩემი მორჩისას, ჩემი ხელის ქმნილებას, ჩემს სადიდებლად.

²²მცირედი ათასეულად იქცევა და უმრწემესი – ძლიერ ხალხად. მე, უფალი, თავის დროზე დავაჩქარებ ამას.