Read სბს–2013 ესაია 62 Bible Online

ესაია 62 - სბს–2013 bible

ესაია 62

¹სიონის გამო არ დავდუმდები და იერუსალიმის გამო არ დავმშვიდდები, ვიდრე ნათელივით არ გამოვა მისი სიმართლე და მისი ხსნა ანთებული ჩირაღდანივით.

²და დაინახავენ ხალხები შენს სიმართლეს და ყოველი მეფე – შენს დიდებას, და გიწოდებენ ახალ სახელს, რომელსაც წარმოსთქვამენ უფლის ბაგენი.

³და იქნები დიდების გვირგვინად უფლის ხელში და სამეფო დიადემად შენი ღმერთის მარჯვენაში.

⁴აღარ დაგიძახებენ მიტოვებულს და შენს ქვეყანას აღარ დაერქმევა უკაცრიელი, რადგან გეწოდება: „ჩემი სასურველი“, და შენს ქვეყანას – „დაწინდული“, რადგან შენ მოგისურვა უფალმა და შენს ქვეყანას „დამწინდავი“ გაუჩნდება.

⁵როგორც ჭაბუკი ქორწინდება ქალწულზე, ისე დაქორწინდებიან შენზე შენი ძენი; და როგორც ნეფე ხარობს თავის საპატარძლოთი, ისე შენი ღმერთი იხარებს შენით.

⁶იერუსალიმ, შენს კედლებზე მეციხოვნენი დავაყენე, რომლებიც არასოდეს დადუმდებიან, არც დღე და არც ღამე. და თქვენ, უფლის გამხსენებელნო, ნუ დადუმდებით, –

⁷ნუ დადუმდებით მის წინაშე, ვიდრე არ აღადგენს იერუსალიმს და არ აქცევს მას ქვეყნის დიდებად.

⁸დაიფიცა უფალმა თავისი მარჯვენა და ძალა თავისი მკლავისა: „არ მივცემ მეტად ხორბალს საზრდოდ შენს მტრებს და არ შესვამენ უცხოთა შვილები შენს ღვინოს, რომელიც ოფლით მოიწიე,

⁹რადგან მისი მომკელნი შეჭამენ მას და მადლს შესწირავენ უფალს, და მისი დამკრეფნი შესვამენ მას ჩემი საწმიდრის ეზოებში.“

¹⁰შედით, შედით კარიბჭეებში, განუმზადეთ გზა ხალხს! მოასწორეთ, მოასწორეთ სავალი, წამოკრიფეთ ქვები, ბაირაღი აღუმართეთ ხალხებს!

¹¹აჰა, უფალი იუწყება დედამიწის კიდეებამდე: „უთხარით სიონის ასულს: ‘ჰა, მოდის შენი ხსნა! და მისი საზღაური მასთანაა და მისი მისაგებელი მის წინაშეა.’“

¹²და უწოდებენ მათ წმიდა ერს, უფლის მიერ გამოსყიდულს; შენ კი გიწოდებენ სასურველ ქალაქს, მიუტოვებელს.