Read სბს–2013 ესაია 66 Bible Online

ესაია 66 - სბს–2013 bible

ესაია 66

¹ასე ამბობს უფალი: „ცა ჩემი ტახტია, დედამიწა კვარცხლბეკია ჩემი. სად უნდა ამიგოთ სახლი? და სად არის ჩემი დასავანებელი ადგილი?

²ყველაფერი ეს ჩემმა ხელმა შექმნა და გაჩნდა ყოველივე ეს, – ამბობს უფალი. – აი, ვის მოვხედავ: გლახაკს და სულგამწარებულს, ჩემი სიტყვების მოშიშს.

³უკეთური რომ ზვარაკსა მწირავს, თუნდაც კაცი დაეკლას; კრავს რომ მწირავს, თუნდაც ძაღლი დაეხრჩოს; ძღვენს რომ აღმივლენს, თუნდაც ღორის სისხლი შემოეწიროს; გუნდრუკს რომ მიკმევს, თუნდაც კერპი ეკურთხებინოს; და როგორც მათ თავად აირჩიეს თავიანთი გზები, და სისაძაგლენი სურდა მათ სულს,

⁴მეც აბუჩად ავიგდებ მათ და საშინელებას მოვაწევ მათ, რადგან ვუხმობდი და არ იყო პასუხის გამცემი, ვლაპარაკობდი და არ ისმინეს, ბოროტებას სჩადიოდნენ ჩემს თვალში და, რაც მე არ მსურდა, ის ამოირჩიეს!“

⁵ისმინეთ უფლის სიტყვა, მისი სიტყვის მოშიშნო: „ასე ამბობენ თქვენი თანამოძმენი, რომელთაც მოგიძულეს თქვენ ჩემი სახელის გულისთვის: დაე, გამოჩნდესო უფალი დიდებით, ჩვენ ვნახავთო თქვენს სიხარულს! მაგრამ ისინი შერცხვებიან.“

⁶ხმაურის ხმაა ქალაქიდან, ხმაა ტაძრიდან, ხმაა უფლისა, თავის მტრებს რომ მიაგებს საზღაურს.

⁷ჯერ მშობიარობა არ დაწყებოდა და უკვე შვა, ჯერ არ დაწყებოდა მშობიარობის ტკივილები და უკვე დაბადა ვაჟი.

⁸ვის გაუგონია ასეთი რამ? ვის უნახავს ამის მსგავსი? თუ შობილა რომელიმე ქვეყანა ერთ დღეს? შობილა კი ერი უეცრივ? როგორც სიონმა შვა, როგორც დაეწყო მშობიარობის ტკივილები, უმალ შვა თავისი ძენი.

⁹განა მშობიარობამდე მივაღწევინებ და არ ვამშობიარებ? – ამბობს უფალი. – როგორ დავუხშობ საშოს, როცა მე ვარ მამშობიერებელი? – ამბობს შენი ღმერთი.

¹⁰გაიხარეთ იერუსალიმთან ერთად, და ილხინეთ მისით, ვინც მისი მოყვარულნი ხართ! გაიხარეთ მასთან სიხარულით ყველამ, ვინც მას იგლოვთ!

¹¹რათა მოწოვოთ და გაძღეთ მისი მანუგეშებელი ძუძუთი, რათა წოვოთ და დატკბეთ მისი დიდების სიუხვით.

¹²რადგან ასე ამბობს უფალი: აჰა, მოვაფენ მასზე მშვიდობას მდინარესავით და მოვარდნილი ნიაღვარივით ხალხთა დოვლათს; და გამოიზრდებით, ჩვილებივით იქნებით ხელში ატატებულნი და მუხლებზე ნალოლიავები.

¹³როგორც დედა ანუგეშებს შვილს, ისე განუგეშებთ მე თქვენ და იერუსალიმში იქნებით ნუგეშცემულნი.

¹⁴და დაინახავთ ამას და გაიხარებს თქვენი გული, თქვენი ძვლები ჯეჯილივით აბიბინდება და გამოეცხადება უფლის ხელი მის მონებს, და თავის მტრებს განურისხდება უფალი.

¹⁵რადგან, აჰა, უფალი ცეცხლში მოვა და გრიგალივითაა მისი ეტლები, რათა გაამძვინვაროს თავისი რისხვა და თავისი წყრომა ცეცხლის ენებად აღატყინოს.

¹⁶რადგან უფალი განსჯის ცეცხლითა და მახვილით ყოველ ხორციელს, და ბევრნი იქნებიან უფლის მიერ დახოცილნი.

¹⁷ისინი, ვინც განიწმიდებიან და სუფთავდებიან თავიანთ ჭალებში, ღორის ხორცსა ჭამენ, ჭამენ ყოველგვარ სისაძაგლეს და თაგვებს, ერთიანად მოისპობიან, – ამბობს უფალი.

¹⁸რამეთუ მე ვიცი მათი საქმენი და ფიქრები. მოდის დრო ყველა ხალხებისა და ყველა ენების შეკრებისა, და მოვლენ და იხილავენ ჩემს დიდებას.

¹⁹და მე მივცემ მათ ნიშანს და გავგზავნი მათგან გადარჩენილებს ხალხებთან თარშიშში, ფულში და ლუდში; გავგზავნი მშვილდის მომჭიმელთ თუბალში და იავანში; გავგზავნი შორეულ ნაპირებზე, სადაც არ სმენიათ ჩემი და არ უნახავთ ჩემი დიდება. და აუწყებენ ჩემს დიდებას ხალხებს.

²⁰ისინი წამოიყვანენ თქვენს ყოველ მოძმეს ყველა ხალხებიდან უფლისადმი ძღვნად, ცხენებითა და ეტლებით, ტახტრევნებით, ჯორებითა და აქლემებით ჩემს წმიდა მთაზე, იერუსალიმში, – ამბობს უფალი, – როგორც ისრაელიანებს მოაქვთ ძღვენი სუფთა ჭურჭლით უფლის სახლში.

²¹და მათგანაც ავიყვან მღვდლებად და ლევიანებად, – ამბობს უფალი. –

²²რადგან როგორც ახალი ცა და ახალი მიწა, რომელთაც მე შევქმნი, დადგებიან ჩემს წინაშე, – ამბობს უფალი, – ასევე იქნება თქვენი თესლი და თქვენი სახელი.

²³და ყოველ თვეს და ყოველ შაბათს მოვა ყოველი ხორციელი თაყვანისსაცემად ჩემს წინაშე, – ამბობს უფალი. –

²⁴და გავლენ და დაინახავენ ჩემგან განდგომილ ადამიანთა გვამებს, რადგან მათი მატლი არ მოკვდება და მათი ცეცხლი არ ჩაქრება. და იქნებიან ისინი სისაძაგლედ ყოველი ხორციელისათვის.