Read სბს–2013 ლევიანნი 18 Bible Online

ლევიანნი 18 - სბს–2013 bible

ლევიანნი 18

¹ელაპარაკებოდა უფალი მოსეს და უთხრა:

²მიმართე ისრაელის ძეთ და უთხარი: მე ვარ უფალი, ღმერთი თქვენი.

³არ მოიქცეთ ეგვიპტის ქვეყნის მცხოვრებთა მსგავსად, ვისთანაც ცხოვრობდით; და არც ქანაანის ქვეყნის ჩვეულებათა მსგავსად, სადაც მე მიმყავხართ თქვენ. მათი წესებით არ იცხოვროთ.

⁴აღასრულეთ ჩემი სამართალი, და დაიცავით ჩემი წესები, იცხოვრეთ მათით; მე ვარ უფალი, ღმერთი თქვენი.

⁵დაიცავით ჩემი წესები და ჩემი სამართალი, რომელთა აღსრულებით იცოცხლებს კაცი; მე ვარ უფალი.

⁶არავინ მიუახლოვდეს თავის სისხლით ნათესავს და არ ახადოს მისი სიშიშვლე; მე ვარ უფალი.

⁷სიშიშვლე მამისა შენისა და სიშიშვლე დედისა შენისა არ გამოაჩინო. იგი დედაა შენი, არ ახადო მისი სიშიშვლე.

⁸სიშიშვლე მამაშენის ცოლისა არ გამოაჩინო. მამაშენის სიშიშვლეა იგი.

⁹არ ახადო სიშიშვლე შენი დისა, მამაშენის ასულისა ან დედაშენის ასულისა, სახლში შობილისა თუ გარეთ შობილისა.

¹⁰სიშიშვლე შენი ძის ასულისა ან შენი ასულის ასულისა, არ ახადო მათი სიშიშვლე, რადგან შენი სიშიშვლეა ისინი.

¹¹სიშიშვლე მამაშენის ცოლის ასულისა, მამაშენისგან შობილისა, შენი და არის იგი, არ ახადო მისი სიშიშვლე.

¹²სიშიშვლე მამაშენის დისა არ ახადო, მამაშენის სისხლი და ხორცია იგი.

¹³სიშიშვლე დედაშენის დისა არ ახადო, რადგან დედაშენის ხორცია იგი.

¹⁴სიშიშვლე მამაშენის ძმისა არ ახადო: მის ცოლს არ მიუახლოვდე, შენი ძალუაა იგი.

¹⁵სიშიშვლე შენი რძლისა არ ახადო: შენი ძის ცოლია იგი.

¹⁶სიშიშვლე შენი ძმის ცოლისა არ ახადო: შენი ძმის სიშიშვლეა იგი.

¹⁷სიშიშვლე შენი ცოლის ასულისა არ ახადო, მისი ძის ასული და მისი ასულის ასული არ ითხოვო სიშიშვლის ასახდელად. ერთი ხორცისანი არიან ისინი. ეს გარყვნილება იქნება.

¹⁸ცოლის დას ნუ ითხოვ მისი სიშიშვლის ასახდელად ცოლის მეტოქედ მის სიცოცხლეში.

¹⁹ქალს წიდოვნების დროს ნუ მიუახლოვდები მისი სიშიშვლის ასახდელად.

²⁰შენი მოყვასის ცოლთან არ დაწვე თესლის დასაღვრელად, რადგან გაუწმიდურდები მისით.

²¹შენს შთამომავალთაგან არ მისცე მოლექისთვის ცეცხლში გასატარებელ მსხვერპლად, და ნუ შებღალავ ამით შენი ღმერთის სახელს; მე ვარ უფალი.

²²არ დაწვე მამაკაცთან, როგორც წვებიან ქალთან. ეს საძაგლობაა.

²³არ დაეცე პირუტყვთან, რადგან გაუწმიდურდები მისით. ქალი არ დადგეს პირუტყვის წინ მასთან დასაცემად, ეს სისაძაგლეა.

²⁴ნუ გაუწმიდურდებით ყოველივე ამით, რადგან ამით გაუწმიდურნენ ერები, რომელთაც თქვენგან ვდევნი მე.

²⁵და გაუწმიდურდა ქვეყანა და დავსაჯე იგი თავისი ცოდვისათვის, და ამოანთხია ქვეყანამ თავისი მცხოვრებნი.

²⁶და თქვენ დაიცავით ჩემი წესები და ჩემი სამართალნი; ამ საძაგლობიდან ნურაფერს ნუ გააკეთებს მკვიდრი და ხიზანი, რომელიც ხიზნობს თქვენთან.

²⁷რადგან ყოველი ეს საძაგლობა ჩაიდინეს ამ ქვეყნის მცხოვრებლებმა, რომლებიც თქვენზე უწინ იყვნენ; და შეიბილწა ქვეყანა;

²⁸რომ არ ამოგანთხიოთ ქვეყანამ, თუ მას გააუწმიდურებთ, როგორც ამოანთხია მან ერი, რომელიც თქვენამდე იყო.

²⁹რადგან მოისპობა ყოველი ამ სისაძაგლის ჩამდენი, მათი ხალხის წიაღიდან.

³⁰დაიცავით ჩემი ბრძანებები, ნუ მოიქცევით იმ საძაგელი წესების მიხედვით, რომლებიც თქვენამდე სრულდებოდა, და არ გაუწმიდურდეთ მათით; მე ვარ უფალი, ღმერთი თქვენი.