Read სბს–2013 იერემია 1 Bible Online

იერემია 1 - სბს–2013 bible

იერემია 1

¹სიტყვები იერემიასი, ხილკიას ძისა, იმ მღვდელთაგანისა, რომლებიც ყანათოთში იყვნენ, ბენიამინის მიწაზე.

²რომლის მიმართაც იყო უფლის სიტყვა იუდას მეფის იოშია ამონის ძის დროს, მისი მეფობის მეცამეტე წელს,

³და იუდეის მეფის იეჰოიაკიმ იოშიას ძის დროს, და იუდას მეფის იოშიას ძის, ცედეკიას მეთერთმეტე წლის ბოლოს, იერუსალიმის ტყვეობამდე, მეხუთე თვეს.

⁴იყო უფლის სიტყვა ჩემს მიმართ თქმული:

⁵სანამ გამოგსახავდი დედაშენის მუცელში, მე გიცნობდი შენ, და სანამ გამოხვიდოდი დედის საშოდან, მე წმიდა-გყავ შენ და ხალხების წინასწარმეტყველად დაგადგინე.

⁶მე ვუპასუხე: ეჰ, უფალო, ღმერთო! მე არ ვიცი ლაპარაკი, რადგან ყმაწვილი ვარ.

⁷და მითხრა მე უფალმა: ნუ ამბობ: ყმაწვილი ვარო, რადგან, ყველგან წახვალ სადაც მიგავლენ, და ყველაფერს ილაპარაკებ, რასაც გიბრძანებ.

⁸ნუ შეგეშინდება მათი, რადგან შენთანა ვარ შენს გადასარჩენად, – ამბობს უფალი.

⁹და გამოიწოდა უფალმა ხელი და შეეხო ჩემს ბაგეებს, და მითხრა მე უფალმა: აჰა, ბაგეებში ჩაგიდე ჩემი სიტყვა.

¹⁰იცოდე, მე დღეს დაგაყენე შენ ხალხებსა და სამეფოებზე, რათა აღმოფხვრა და შემუსრო, მოსპო და დაანგრიო, ააშენო და დარგა.

¹¹და იყო უფლის სიტყვა ჩემს მიმართ ნათქვამი: რას ხედავ შენ, იერემია? და ვუთხარი მე: ნუშის ხის კვერთხს ვხედავ.

¹²და მითხრა მე უფალმა: კარგად ხედავ, რადგან მე ვჩქარობ ჩემი სიტყვის შესრულებას.

¹³და იყო უფლის სიტყვა ჩემს მიმართ მეორედ: რას ხედავ შენ? და ვუთხარი: მოთუხთუხე ქვაბს ვხედავ, ჩრდილოეთიდან რომ ეშვება.

¹⁴და მითხრა მე უფალმა: ჩრდილოეთიდან დაატყდება უბედურება ამ ქვეყნის ყველა მკვიდრს.

¹⁵რადგან მე მოვუხმობ ჩრდილოეთის სამეფოების ყველა ტომს, – ამბობს უფალი, – და მოვლენ და დადგამს თითოეული თავის ტახტს იერუსალიმის კარიბჭეესთან, მისი კედლების ირგვლივ, ყველგან, იუდას ყველა ქალაქში.

¹⁶განაჩენს გამოვუტან ყველა მათი ბოროტების გამო, რადგან მიმატოვეს მე და სხვა ღმერთებს უკმევდნენ და თავიანთ ნახელავს სცემდნენ თაყვანს.

¹⁷შენ კი შემოისარტყლე წელი, ადექ და უთხარი ხალხს ყოველივე, რასაც მე გიბრძანებ, ნუ შეგეშინდება მათი, რომ არ დაგამხო მათ წინაშე.

¹⁸მე გაქციე შენ დღეს გამაგრებულ ქალაქად, რკინის სვეტად და ბრინჯაოს ზღუდედ მთელი ამ ქვეყნის წინააღმდეგ, იუდას მეფეების, მისი მთავრების, მისი მღვდლებისა და მთელი ქვეყნის ხალხის წინააღმდეგ.

¹⁹და შეგებრძოლებიან ისინი, მაგრამ ვერ გძლევენ, რადგან მე შენთანა ვარ – შენს გადასარჩენად! – ამბობს უფალი.