Read სბს–2013 იერემია 11 Bible Online

იერემია 11 - სბს–2013 bible

იერემია 11

¹უფლის სიტყვა, თქმული იერემიას მიმართ:

²ისმინეთ ამ აღთქმის სიტყვები და უთხარით იუდას ხალხსა და იერუსალიმის მცხოვრებთ.

³და უთხარი მათ, ასე ამბობს-თქო უფალი, ისრაელის ღმერთი: წყეულია კაცი, რომელიც არ მოუსმენს ამ აღთქმის სიტყვებს,

⁴რომელიც მე ვუბრძანე თქვენს მამებს მათი გამოყვანის დღეს ეგვიპტის ქვეყნიდან – საკირის ცეცხლიდან: ისმინეთ ჩემი ხმა და გააკეთეთ ყოველივე, რასაც მე გიბრძანებთ, და იქნებით ჩემი ერი და მე ვიქნები თქვენი ღმერთი,

⁵რათა დავამტკიცო ფიცი, რომლითაც შევფიცე თქვენს მამებს, რომ მივცემდი მათ ქვეყანას, რძითა და თაფლით მდინარს, როგორც ეს დღესაც არის. და მე ვუპასუხე: ამინ, უფალო!

⁶და მითხრა მე უფალმა: წარმოთქვი ყველა ეს სიტყვა იუდას ქალაქებსა და იერუსალიმის ქუჩებში და თქვი: ისმინეთ-თქო ამ აღთქმის სიტყვები და შეასრულეთ!

⁷რადგან ვაფრთხილებდი თქვენს მამებს ეგვიპტიდან მათი გამოყვანის დღიდან დღევანდლამდე; განთიადიდან ვაფრთხილებდი, უსმინეთ-მეთქი ჩემს ხმას.

⁸მაგრამ არ უსმინეს და ყურიც არ მათხოვეს; და აჰყვა თითოეული თავის ბოროტ გულისთქმას, და მე მოვაწიე მათზე ამ აღთქმის ყველა სიტყვა, რომელიც ვუბრძანე მათ შესასრულებლად და არ შეასრულეს.

⁹და მითხრა უფალმა: შეთქმულნი არიან იუდაელნი და იერუსალიმის მცხოვრებნი.

¹⁰ისინი დაუბრუნდნენ თავიანთი მამების ურჯულოებას, რომლებმაც უარი თქვეს ჩემი სიტყვების მოსმენაზე, სხვა ღმერთებს აჰყვნენ, და ემსახურებოდნენ მათ. ისრაელის სახლმა და იუდას სახლმა დაარღვიეს ჩემი აღთქმა, რომელიც მე აღვუთქვი მათ მამებს.

¹¹ამიტომ ასე ამბობს უფალი: აჰა, მოვაწევ მათზე უბედურებას, რომლისგან თავის დაღწევას ვერ შეძლებენ ისინი, და, როცა შემომღაღადებენ, მე არ მოვუსმენ მათ.

¹²და წავლენ იუდას ქალაქები და იერუსალიმის მცხოვრებნი და შეჰღაღადებენ იმ ღმერთებს, რომელთაც უკმევენ, მაგრამ ვერ იხსნიან ის ღმერთები მათი უბედურების ჟამს.

¹³რადგან რამდენი ქალაქიც გაქვს, იმდენი ღმერთი გყავს, იუდავ! რამდენი ქუჩაც არის იერუსალიმში, იმდენი სისაძაგლის სამსხვერპლო გაქვს აღმართული – ბაყალის საკმევი სამსხვერპლო.

¹⁴ნუ მთხოვ ამ ერისათვის და ნუ აამაღლებ მათზე ლოცვა-ვედრებას, რადგან არ მოვისმენ, როცა შემომღაღადებენ მათი უბედურების ჟამს.

¹⁵რა უნდა ჩემს საყვარელ ხალხს ჩემს ტაძარში, როცა ამდენ ბოროტებას სჩადის? განა უბედურებას აგაშორებს სამსხვერპლო ხორცი, სიავეს რომ სჩადიხარ და ხარობ?

¹⁶ამწვანებული, მშვენიერი და ნაყოფსავსე ზეთისხილი გიწოდა შენ უფალმა, მაგრამ დიდი გრგვინვის ხმაზე აბრიალდა ცეცხლი და რტონი შეემუსრა.

¹⁷და ცაბაოთ უფალმა, შენმა დამნერგავმა, გიწინასწარმეტყველა ბოროტება ისრაელის სახლისა და იუდას სახლის ბოროტების წილ, რომელიც შეიმთხვიეს მათ იმით, რომ ჩემს გასარისხებლად უკმევდნენ ბაყალს.

¹⁸უფალმა მაცოდინა და მე ვიცი; შენ მიჩვენე მე მათი საქმეები.

¹⁹მე კი დასაკლავად მიყვანილი უწყინარი კრავივით ვიყავი და არ ვიცოდი, რას განიზრახავდნენ ჩემს წინააღმდეგ, და თქვეს: შევმუსროთო ხე ვიდრე ნედლიაო, და ამოვძირკვოთო ცოცხალთა ქვეყნიდან, რომ მისი სახელი მეტად აღარ იხსენებოდესო.

²⁰ცაბაოთ უფალო, სამართლიანო მსაჯულო, გამომცდელო გულთა და თირკმელთა, მომასწარი შენს შურისძიებას მათზე, რადგან შენ მოგანდე ჩემი საქმე.

²¹ამიტომ ასე ამბობს უფალი ყანათოთელ კაცებზე, მოკვლას რომ გიპირებენ და გეუბნებიან: ნუ წინასწარმეტყვლებო უფლის სახელით, ჩვენი ხელით რომ არ მოკვდეო.

²²ამიტომ ასე ამბობს ცაბაოთ უფალი: აჰა, მე დავსჯი მათ: მათი ჭაბუკნი მახვილით დაეცემიან, მათი ძენი და ასულნი კი შიმშილით გაწყდებიან.

²³მათი ნატამალი არ დარჩება, რადგან უბედურებას მოვაწევ ყანათოთელებზე სასჯელის წელიწადს.