Read სბს–2013 იერემია 12 Bible Online

იერემია 12 - სბს–2013 bible

იერემია 12

¹შენ მართალი ხარ, უფალო, როცა დავას დაგიწყებ, მაგრამ მაინც ვილაპარაკებ შენს სამართალზე. რატომაა ბოროტმოქმედთა გზა წარმატებული და ცრუნი რატომ არიან უზრუნველად?

²შენ დანერგე ისინი, ფესვები გაიდგეს, გაიზარდნენ და ნაყოფიც გამოიღეს; ახლოსა ხარ შენ მათ ბაგეთაგან, მათი გულისაგან კი შორსა ხარ.

³ხოლო მე მიცნობ, უფალო, მხედავ მე და სცდი ჩემს გულს, როგორაა შენს მიმართ. გადაარჩიე ისინი დასაკლავი ცხვრებივით და მოამზადე დაკვლის დღისათვის.

⁴როდემდე უნდა გლოვობდეს მიწა და ხმებოდეს მინდვრის ბალახი? მოისრა საქონელი და ფრინველი – მიწის მკვიდრთა უკეთურების გამო, რომ ამბობენ: ის ვერ იხილავსო ჩვენს გზებს.

⁵თუ შენ ქვეითებთან დარბოდი და მათ დაგქანცეს, როგორღა შეეჯიბრები ცხენებს? თუ ქვეყანაში, სადაც საშიშროება არაა, საფრთხე გაშინებს, მაშ როგორღა მოიქცევი იორდანეს აბობოქრებისას?

⁶შენი ძმებიც და შენი მამისსახლიც კი გღალატობს, ისინიც სტვენით დაგდევენ უკან. ნუ ერწმუნები მათ, თუნდაც სასიკეთოს გელაპარაკებოდნენ.

⁷მე დავტოვე ჩემი სახლი; დავაგდე ჩემი სამკვიდრო; ჩემი სულის სასურველი მის მტრებს ჩავუგდე ხელთ.

⁸ჩემი სამკვიდრო ტყის ლომად მექცა, შემომღრიალებს; ამიტომაც მოვიძულე ის.

⁹ჩემი სამკვიდრო ჭრელ ფრინველს დაემსგავსა, მტაცებელი ფრინველები ეხვევიან გარს. წადით, შეჰყარეთ ველის მხეცები, მოიყვანეთ მის შესაჭმელად.

¹⁰მრავალმა მწყემსებმა ააოხრეს ჩემი ვენახი, გათელეს ჩემი ნაკვეთი, ჩემი დავარცხნილი ხოდაბუნები ცარიელ უდაბნოდ აქციეს,

¹¹გააუკაცრიელეს, იგლოვს ჩემს წინაშე გაუკაცრიელებული; გაუკაცურდა მთელი ქვეყანა, რადგან არავის მიაქვს ეს გულთან.

¹²უდაბნოს ყველა ხრიოკ გორაკს მოესივნენ მძარცველნი, რადგან უფლის მახვილი ყველაფერს ჭამს ქვეყნის ერთი კიდიდან მეორემდე. ყოველმა ხორციელმა დაკარგა მშვიდობა.

¹³ხორბალი დათესეს და ეკალი მოიმკეს; დაშვრნენ და სარგებელი ვერ ნახეს. შეგრცხვეთ თქვენი მოსავლისა – უფლის აგიზგიზებული რისხვის.

¹⁴ასე ამბობს უფალი: ჩემს ყველა მეზობელს, რომლებიც აზიანებენ იმ სამკვიდრებელს, რომელიც მე დავუმკვიდრე ჩემს ერს, ისრაელს, წარვხოცავ მათი მიწიდან და იუდას მოდგმასაც გამოვიყვან მათგან.

¹⁵და, როცა გამოვიყვან, კვლავ შევიწყალებ მათ, და დავაბრუნებ თითოეულს თავის სამკვიდრებელზე და თითოეულს თავის ქვეყანაში.

¹⁶და თუ ისინი ისწავლიან ჩემი ხალხის გზებს, რათა დაიფიცონ ჩემი სახელით: „ცოცხალ არს უფალი!“, როგორც ბაყალის დაფიცება ასწავლეს ჩემს ერს, მაშინ ისინიც აშენდებიან ჩემს ერთან ერთად.

¹⁷ხოლო თუ არ მომისმენენ, მაშინ სრულიად აღმოვფხვრი ამ ხალხს და მოვსპობ! – ამბობს უფალი.