Read სბს–2013 იერემია 16 Bible Online

იერემია 16 - სბს–2013 bible

იერემია 16

¹და იყო უფლის სიტყვა ჩემს მიმართ ნათქვამი:

²ნუ მოიყვან აქ ცოლს და ნუ იყოლიებ ძეთა და ასულთ.

³რადგან ასე ამბობს უფალი აქ შობილ ძეებსა და ასულებზე, მათ მშობელ დედებსა და შემქმნელ მამებზე:

⁴საზარელი ტკივილებით გაწყდებიან ისინი; არ ეყოლებათ მოზარე და დამმარხველი; ფუნასავით ეყრებიან ველზე; მახვილითა და შიმშილით აღესრულებიან, და მათი მძორები ცის ფრინველთა და ტყის ნადირთა საჯიჯგნი გახდება.

⁵ასე ამბობს უფალი: ნუ შეხვალ მგლოვიარეთა სახლში. ნუ მიხვალ მათ სატირალზე და სამძიმარზე, რადგან განვაშორე ჩემი მშვიდობა ამ ხალხს, წავართვი ჩემი წყალობა და შებრალება.

⁶და მოისრებიან დიდიან-პატარიანად ამ ქვეყანაში, არავინ დამარხავს და არავინ დაიტირებს მათ, სახეს არავინ ჩამოიხოკავს და ნაწნავებს არავინ დაიჭრის მათთვის;

⁷პურს არავინ გატეხს ჭირისუფლის სანუგეშებლად, დედ-მამის შესანდობარ თასს არავინ შეასმევს მათ.

⁸ნადიმის სახლში ნუ მიხვალ მათთან დასაჯდომად სმა-ჭამისთვის.

⁹რადგან ასე ამბობს ცაბაოთ უფალი, ისრაელის ღმერთი: აჰა, მე შევწყვეტ თქვენს თვალწინ და თქვენს დღეებში ამ ადგილიდან შვების ხმასა და სიხარულის ხმას, ნეფის ხმასა და პატარძლის ხმას.

¹⁰როდესაც ეტყვი ამ ერს ყველა ამ სიტყვას და ისინი გკითხავენ: რატომ გვიქადისო უფალი ჩვენ ამ დიდ უბედურებას? ან: რა ბრალი მიგვიძღვისო მის წინაშე და რა არისო ჩვენი ცოდვა, რომლითაც ჩვენ შევცოდეთო უფალს, ჩვენს ღმერთს?

¹¹ასე უთხარი მათ: უფალი ამბობს-თქო: ის, რომ თქვენმა მამებმა მიმატოვეს და სხვა ღმერთებს გაჰყვნენ და ემსახურებოდნენ მათ, და თაყვანს სცემდნენ, მე კი განმიდგნენ და ჩემი რჯული არ დაიცვეს.

¹²და თქვენც თქვენს მამებზე მეტ ბოროტებას შვრებით: ყოველი თქვენგანი თავის ბოროტ გულისთქმას აჰყოლია და მე აღარ მისმენს.

¹³ამიტომ მე გადაგყრით ამ ქვეყნიდან იმ ქვეყანაში, რომელსაც არ იცნობთ არც თქვენ და არც თქვენი მამები იცნობდნენ; და მოემსახურებით იქ სხვა ღმერთებს დღე და ღამე, რადგან მე არ შეგიწყალებთ თქვენ.

¹⁴ამიტომ აჰა, დადგება ჟამი, – ამბობს უფალი, – როცა აღარ იტყვიან: „ვფიცავთ უფალს, რომელმაც ისრაელიანები გამოიყვანა ეგვიპტის ქვეყნიდან!“

¹⁵არამედ: „ვფიცავთ უფალს, რომელმაც გამოიყვანა ისრაელიანები ჩრდილოეთის ქვეყნიდან და ყველა ქვეყნიდან, სადაც გაფანტა ისინი!“ და მე კვლავ დავაბრუნებ მათ თავიანთ მიწაზე, რომელიც მივეცი მათ მამებს.

¹⁶მე გამოვგზავნი ბევრ მეთევზეს, – ამბობს უფალი, – მათ დასაჭერად. ამის შემდეგ გავგზავნი მრავალ მონადირეს და ჩამორეკავენ ისინი მათ ყოველი მთიდან, ყოველი ბორცვიდან და კლდეთა ნაპრალებიდან,

¹⁷რადგან თვალი მიჭირავს ყველა მათ გზაზე, ვერ დამემალებიან და არც მათი დანაშაული გამოეპარება ჩემს თვალს.

¹⁸და ორმაგად მივაგებ მათ მათი დანაშაულისა და ცოდვების გამო, რადგან შებილწეს ჩემი მიწა, თავის სისაძაგლეთა გვამებით და თავის საზიზღრობებით გაავსეს ჩემი სამკვიდრებელი.

¹⁹უფალო, ძალო ჩემო და შემწევ ჩემო, შესავედრებელო ჩემო გაჭირვების ჟამს! შენთან მოვლენ ხალხები ქვეყნის კიდეებიდან და იტყვიან: მხოლოდ სიცრუე დაიმკვიდრეს ჩვენმა მამებმა, მხოლოდ ამაოება, და ის, რასაც სარგებლობა არ ჰქონდა.

²⁰განა შეძლებს კაცი, რომ გაიკეთოს ღმერთები, რომლებიც სინამდვილეში ღმერთები არ არიან?

²¹ამიტომ, აჰა, მე ახლა ვუჩვენებ მათ ჩემსმკლავსა და ძლიერებას, და გაიგებენ ისინი, რომ: ჩემი სახელი არის უფალი.