Read სბს–2013 იერემია 18 Bible Online

იერემია 18 - სბს–2013 bible

იერემია 18

¹სიტყვა, რომელიც თქვა უფალმა იერემიას მიმართ:

²ადექი და ჩადი მეთუნის სახლში და იქ გაუწყებ ჩემს სიტყვას.

³მე ჩავედი მეთუნის სახლში, მეთუნე თავის მორგვთან მუშაობდა.

⁴და ქოთანი, რომელსაც ის აკეთებდა თიხისგან, ხელში გაუფუჭდა. მიუბრუნდა და იმავე თიხით სხვა გააკეთა, როგორიც მოიფიქრა.

⁵და იყო უფლის სიტყვა ჩემს მიმართ ნათქვამი:

⁶განა ამ მეთუნესავით არ შემიძლია მოგექცეთ თქვენ, ისრაელის სახლო? – ამბობს უფალი, – აჰა, როგორც თიხაა მეთუნის ხელში, ისე ხართ თქვენ ჩემს ხელში, ისრაელის სახლო.

⁷ზოგჯერ ვიტყვი რომელიმე ხალხზე ან სამეფოზე, რომ აღმოვფხრა იგი, გავაცამტვერო და მოვსპო;

⁸და ის ხალხი, რომელზეც ეს ვთქვი, თუ მოიქცევა ბოროტებისგან, მაშინ შევინანებ და არ ვუზამ ბოროტებას, რაც განზრახული მქონდა.

⁹ზოგჯერ ვიტყვი რომელიმე ხალხზე და სამეფოზე, რომ ავაშენო ის და გავამყარო;

¹⁰და თუ ჩაიდენს ბოროტს ჩემს თვალში, არ მოუსმენს ჩემს ხმას, მაშინ მე გავაქარწყლებ იმ სიქველეს, რომელიც უნდა გამეკეთებინა მის სასიკეთოდ.

¹¹და ახლა, უთხარი იუდას კაცებს და იერუსალიმის მკვიდრთ: ასე ამბობს-თქო უფალი: აჰა, მე მოგაწევთ უბედურებას და ბოროტი განზრახვა განვიზრახე თქვენზე, მოიქეცით თითოეული თქვენი ბოროტი გზიდან და გამოასწორეთ თქვენი გზები და საქციელი!

¹²ისინი კი ამბობენ: არც იფიქროო! რადგან ჩვენს განზრახვებს მივყვებით და თითოეული ჩვენი ბოროტი გულის შეუპოვრობით ვიქცევითო.

¹³ამიტომ ასე ამბობს უფალი: იკითხეთ წარმართთა შორის, თუ სმენია ვინმეს ასეთი რამ? დიდი საზარელი საქმეები ჩაიდინა ისრაელის ქალწულმა.

¹⁴განა მოაკლდება თოვლი ლიბანის მთის თხემებს, განა შეწყდება უცხო ადგილებიდან მოწანწკარე ცივი წყლები?

¹⁵მე კი მიმატოვა ჩემმა ერმა; ამაო ღმერთებს უკმევენ, ბორძიკობენ თავიანთ გზებზე, მიატოვეს ძველთაძველი გზები, რათა ევლოთ გაუკვალავი ბილიკებით,

¹⁶რათა საშინელებად ექციათ თავიანთი ქვეყანა, სამუდამო სამასხროდ, ისე, რომ ყოველ იქ გამვლელს შეძრწუნებულს გაექნია თავი.

¹⁷ხორშაკი ქარივით მიმოვფანტავ მათ მათი მტრების წინაშე; ზურგს ვუჩვენებ მათ და არა სახეს მათი უბედურების დღეს.

¹⁸და თქვეს მათ: მოდით და პირი შევკრათ იერემიას წინააღმდეგ, რათა არ დაეკარგოს რჯული მღვდელს, რჩევა – ბრძენს და სიტყვა წინასწარმეტყველს! მოდით და დავცეთ ის ენით, რომ არ გავიგონოთ არც ერთი მისი სიტყვა.

¹⁹ყური მომაპყარ, უფალო! და ჩემს მოდავეთა ხმაც მოისმინე.

²⁰განა სიკეთეს ბოროტებით უნდა მიეზღოს? ისინი ორმოს უმზადებენ ჩემს სულს. გაიხსენე: შენს წინაშე ვიდექი, სიკეთეს გთხოვდი მათთვის, რათა ამეცილებინა მათთვის შენი გულისწყრომა.

²¹მაშ მიეცი მათი შვილები შიმშილს და მოაწიე მათზე მახვილი; და დარჩნენ მათი ცოლები უშვილოდ და ქვრივებად, მათი ქმრები სიკვდილით მოისრნენ, მათი ჭაბუკნი კი მახვილით დაეცნენ ბრძოლაში.

²²და გაისმას კივილი მათი სახლებიდან, როცა ანაზდად მიუსევ ურდოებს, რადგან თხრილს თხრიან ჩემს შესაპყრობად და მახეს მიგებენ ფეხებში.

²³შენ კი, უფალო, იცი მათი ყველა განზრახვა ჩემს წინააღმდეგ, ჩემს მოსაკლავად; ნუ მიუტევებ მათ ურჯულოებას და მათ ცოდვებზე თვალს ნუ დახუჭავ; დაე, დაემხონ ისინი შენს წინაშე, გაუსწორდი მათ შენი რისხვის ჟამს.