Read სბს–2013 იერემია 23 Bible Online

იერემია 23 - სბს–2013 bible

იერემია 23

¹ვაი მწყემსებს, რომლებიც ღუპავენ და ფანტავენ ჩემი სამწყსოს ცხვარს! – ამბობს უფალი.

²ამიტომ ასე ამბობს უფალი, ისრაელის ღმერთი, მწყემსებზე, რომლებიც ჩემს ერს მწყემსავენ: თქვენ დაფანტეთ ჩემი ცხვარი, თქვენ გაგიფრთხათ და ყური არ უგდეთ! მე მოგკითხავთ პასუხს თქვენი ბოროტი საქმეების გამო, – ამბობს უფალი.

³მე შევაგროვებ ჩემს გადარჩენილ ცხვრებს ყველა ქვეყნებიდან, სადაც გავფანტე ისინი და დავაბრუნებ თავიანთ ფარეხებში, და დაინერბებიან და გამრავლდებიან.

⁴და დავუყენებ მათ მწყემსებს და ისინი დამწყემსავენ. აღარ შეეშინდებათ და აღარ დაფრთხებიან, და ერთი ბატკანიც არ დააკლდებათ, – ამბობს უფალი.

⁵აჰა, დგება ჟამი, – ამბობს უფალი, – და აღვუდგენ დავითს მართალ მორჩს, და იმეფებს მეფე და მართლად განსჯის, და სამართალსა და სიმართლეს დაამკვიდრებს ქვეყნად.

⁶მის დღეებში თავს დაიხსნის იუდა და ისრაელი უშიშრად იცხოვრებს; და ამ სახელით უწოდებენ მას: „უფალი ჩვენი სიმართლისა!“

⁷ამიტომ დადგება ჟამი, – ამბობს უფალი, – და აღარ იტყვიან: უფალს ვფიცავთ, რომელმაც ისრაელის ძენი ეგვიპტის ქვეყნიდან ამოიყვანაო.

⁸არამედ: უფალს ვფიცავთ, რომელმაც გამოიყვანა და მოიყვანა ისრაელის სახლის თესლი ჩრდილო ქვეყნიდან და ყველა ქალაქიდან, სადაც გავფანტე ისინი, და იცხოვრებენ თავიანთ მიწაზე.

⁹წინასწარმეტყველთა შესახებ ნათქვამი: გული მისკდება მკერდში და ძვლები მიელავს, ღვინომორეულ კაცსა ვგავარ, უფლის გამო და მისი წმიდა სიტყვების გამო.

¹⁰რადგან მეძაობით გაივსო ქვეყანა; მათ გამო მოსთქვამს დედამიწა; გადაიტრუსა ტრამალთა საძოვრები; ბოროტებას ესწრაფიან, ძალას უსამართლობაში ხედავენ,

¹¹რადგან შეიბილწნენ მღვდლებიცა და წინასწარმეტყველნიც; ჩემს სახლშიც კი ვიხილე მათი ნაავკაცარი, – ამბობს უფალი.

¹²ამიტომ მათი სავალი ისეთი იქნება, როგორც მოლიპული გზა წყვდიადში; ხელს კრავენ და დაეცემიან, რადგან მათი განკითხვის წელს უბედურებას მოვაწევ მათ, – ამბობს უფალი.

¹³სამარიის წინასწარმეტყველებშიც ვიხილე უგუნურება: ბაყალის სახელით წინასწარმეტყველებდნენ და აცდუნებდნენ ჩემს ერს – ისრაელს.

¹⁴იერუსალიმის წინასწარმეტყველებშიც ვხედავ საშინელ ამბებს: მრუშობენ და სიცრუით დადიან, უკეთურთა მხარეზე არიან, რათა არავინ მოიქცეს თავისი ბოროტი გზიდან. ყველა სოდომელივით გახდა ჩემთვის და მისი ყველა მკვიდრი – გომორელივით.

¹⁵ამიტომ ასე ამბობს ცაბაოთ უფალი წინასწარმეტყველებზე: აჰა, მე შევაჭმევ მათ აბზინდას და შევასმევ გესლოვან წყალს, რადგან იერუსალიმის წინასწარმეტყველთაგან გამოდის ცდუნება მთელს ქვეყანაზე.

¹⁶ასე ამბობს ცაბაოთ უფალი: ნუ მოუსმენთ წინასწარმეტყველთა სიტყვებს, რომლებიც თქვენ ცუდს გიწინასწარმეტყველებენ; ისინი გატყუებენ, თავიანთი გულის ხილვებით ლაპარაკობენ, და არა იმას, რაც უფლის ბაგეთაგან მოდის.

¹⁷ისინი განუწყვეტლივ ეუბნებიან ჩემს მოძულეთ: უფალმა თქვა, მშვიდობა გექნებათო. და ყველა გულგაკერპებულს ეუბნებიან: არ მოაწევსო უბედურება თქვენს თავს.

¹⁸რადგან ვინ იდგა უფლის საბჭოში და ვინ იხილა და მოისმინა მისი სიტყვები? ვინ უგდებდა ყურს მის სიტყვებს და ვინ მოისმინა?

¹⁹აჰა, უფლის ქარიშხალი რისხვით ამოვარდა! საშინელი ქარბორბალა დაუბერავს და ბოროტეულთ დაატყდებათ თავს.

²⁰არ მიიქცევა უფლის რისხვა, სანამ არ აღისრულებს გულის ზრახვებს; უკანასკნელ დღეებში ბოლომდე მიხვდებით ამას.

²¹არ მომივლინებია ეს წინასწარმეტყველნი და თავად მორბოდნენ, მე არაფერი მითქვამს მათთვის და თავისით წინასწარმეტყველებდნენ.

²²ჩემს საბჭოში რომ მდგარიყვნენ, აუწყებდნენ ჩემს სიტყვებს ჩემს ხალხს, და მოაქცევდნენ მათ ბოროტი გზიდან და მათი ბოროტი საქმეებიდან.

²³მხოლოდ მაშინა ვარ ღმერთი, როცა ახლოს ვარ? – ამბობს უფალი, – შორს მყოფი აღარა ვარ ღმერთი?

²⁴განა ვინმე შეძლებს დაიმალოს საიდუმლო ადგილას, სადაც მე ვერ დავინახავ მას? – ამბობს უფალი; – განა ცასა და მიწას მე არ ვავსებ? – ამბობს უფალი.

²⁵მესმა, რასაც ამბობენ წინასწარმეტყველნი, ჩემი სახელით რომ ცრუდ წინასწარმეტყველებენ: მე დამესიზმრაო მე, დამესიზმრაო.

²⁶როდემდე ექნებათ ეს წინასწარმეტყველთა გულში, სიცრუეს რომ წინასწარმეტყველებენ, და ქადაგებენ თავიანთ გულის ნაფიქრალს.

²⁷იქნებ ჰგონიათ მათ, რომ დაავიწყებენ ჩემს ხალხს ჩემს სახელს თავიანთი სიზმრებით, რომლებსაც ისინი უყვებიან ერთმანეთს, როგორც მათმა მამებმა დაივიწყეს ჩემი სახელი ბაყალის გამო?

²⁸წინასწარმეტყველმა, რომელმაც სიზმარი ნახა, იამბოს ის, როგორც სიზმარი; ხოლო მან, ვისთანაც ჩემი სიტყვაა, ჭეშმარიტად იამბოს ჩემი სიტყვა. სად ბზე და სად ხორბალი? ასეა ჩემი სიტყვებიც, – ამბობს უფალი.

²⁹განა ცეცხლივით არაა ჩემი სიტყვა, – ამბობს უფალი, – უროსავით რომ ანგრევს კლდეებს!

³⁰ამიტომ, აჰა, მე ვარ წინასწარმეტყველთა წინააღმდეგ, – ამბობს უფალი, – ჩემს სიტყვებს რომ ერთმანეთს პარავენ.

³¹აჰა, მე ვარ წინასწარმეტყველთა წინააღმდეგ, – ამბობს უფალი, – რომლებიც თავიანთი ენის გამონაგებს მე მაბრალებენ და ამბობენ: მანა თქვაო.

³²აჰა, მე ვარ ცრუ სიზმრებით მოწინასწარმეტყველეთა წინააღმდეგ, – ამბობს უფალი, – რომლებიც მოუთხრობენ ამ სიზმრებს და აცდუნებენ ჩემს ერს თავიანთი ტყუილებითა და ლაზღანდარობით. მე კი არ გამომიგზავნია ისინი და არც არაფერი მიბრძანებია მათთვის, და არავითარი სარგებელი არ მოაქვთ მათ ამ ერისათვის, – ამბობს უფალი.

³³და თუ გკითხავს შენ ეს ხალხი, ან წინასწარმეტყველი, ან მღვდელი: რა არისო უფლის ტვირთი? უთხარი მათ: თქვენა ხართ-თქო ტვირთი, და მე მოგისვრით-თქო თქვენ, – ამბობს უფალი.

³⁴თუ წინასწარმეტყველი, მღვდელი ან ვინმე იტყვის: უფლის ტვირთიაო, შურს ვიძიებ იმ კაცზე და მის სახლზე.

³⁵ასე უთხრას ყოველმა კაცმა მოყვასსა თვისსა და ყოველმა კაცმა ძმასა თვისსა: რა მოგიგო უფალმა? და რა თქვა უფალმა?

³⁶ხოლო უფლის ტვირთი აღარ ახსენოთ, რადგან ტვირთად ექნება იმ კაცს თავისი სიტყვა, რადგან თქვენ დაამახინჯეთ ცოცხალი ღმერთის, ცაბაოთ უფლის, ჩვენი ღმერთის, სიტყვები.

³⁷ასე უთხარი წინასწარმეტყველს: რა გიპასუხა-თქო უფალმა, და რას ამბობს-თქო უფალი?

³⁸და თუ იტყვით: უფლის ტვირთი არისო, – ასე ამბობს უფალი, – რადგან თქვენ თქვით ეს სიტყვა: უფლის ტვირთი, მე კი შემოგითვალეთ, რომ აღარ გეთქვათ: უფლის ტვირთი.

³⁹ამიტომ მე დაგივიწყებთ თქვენ; მოგიცილებთ ჩემს თვალთაგან და დაგამხობთ თქვენ და დავამხობ თქვენს ქალაქს, რომელიც მე მოგეცით თქვენ და თქვენს მამებს.

⁴⁰და მოვაწევ თქვენზე სამუდამო სირცხვილსა და სამუდამო დამცირებას, რომელიც არასოდეს დაივიწყება.