Read სბს–2013 იერემია 26 Bible Online

იერემია 26 - სბს–2013 bible

იერემია 26

¹იუდას მეფის, იეჰოიაკიმ იოშიას ძის მეფობის დასაწყისში იყო უფლის სიტყვა:

²ასე ამბობს უფალი: დადექი უფლის ტაძრის ეზოში და უთხარი იუდას ყველა ქალაქს, უფლის სახლში რომ მოდიან თაყვანის საცემად, ყოველი ეს სიტყვა, რომელიც მე გიბრძანე, რომ გეთქვა მათთვის; ერთი სიტყვაც არ დააკლო.

³იქნებ ისმინონ და მოიქცნენ თითოეული თავისი ბოროტი გზიდან, მაშინ მე შევინანებ იმ უბედურებებს, რაც მე განვიზრახე მათზე მოსაწევად მათი ბოროტი საქმეების გამო.

⁴უთხარი მათ: ასე ამბობს-თქო უფალი: თუ არ მომისმენთ მე და არ ივლით ჩემი რჯულის მიხედვით, რომელიც მე მოგეცით თქვენ,

⁵თუ არ შეისმენთ სიტყვებს ჩემს მსახურ წინასწარმეტყველთა, რომელთაც მე დღენიადაგ ვაგზავნიდი თქვენთან, თქვენ კი არ უსმენდით,

⁶მე გავხდი ამ სახლს შილოსავით და ქვეყნის ყველა ხალხების საწყევარად ვაქცევ მას!

⁷და უსმენდნენ მღვდელნი და წინასწარმეტყველნი, და მთელი ერი იერემიას, როცა ის ამ სიტყვებს წარმოთქვამდა უფლის სახლში.

⁸და როდესაც დაასრულა იერემიამ ყოველივე იმის თქმა, რაც უფალმა უბრძანა მთელი ერისათვის სათქმელად, დაიჭირეს ის მღვდლებმა და წინასწარმეტყველებმა და მთელმა ერმა, და უთხრეს: შენ უნდა მოკვდე!

⁹რატომ წინასწარმეტყველებ უფლის სახელით და ამბობ: შილოსავით იქნებაო ეს სახლი, ეს ქალაქი კი აოხრდება და უკაცური დარჩებაო? და მთელი ხალხი იერემიას მიუხდა უფლის სახლში.

¹⁰და გაიგეს იუდას მთავრებმა ეს ამბავი და მეფის სასახლიდან უფლის სახლში ავიდნენ, და დასხდნენ უფლის ტაძრის ახალ კარიბჭეში.

¹¹და მიმართეს მღვდლებმა და წინასწარმეტყველებმა მთავრებს და მთელ ხალხს: სასიკვდილო განაჩენი ამ კაცს, რადგან ამ ქალაქს განადგურება უწინასწარმეტყველა, როგორც თქვენი ყურით გაიგონეთ!

¹²და უთხრა იერემიამ ყველა მთავარს და მთელ ხალხს: უფალმა გამომაგზავნა, რომ მეწინასწარმეტყველა ამ სახლზე და ამ ქალაქზე ყველა ის სიტყვა, რომელიც თქვენ მოისმინეთ.

¹³და ახლა გამოასწორეთ თქვენი გზები და თქვენი საქმეები, და უსმინეთ უფლის, თქვენი ღმერთის ხმას, მაშინ გადაიფიქრებს უფალი იმ უბედურებას, რასაც გიპირებთ.

¹⁴მე კი, აჰა, თქვენს ხელთა ვარ და ისე მომექეცით, როგორც სწორად და სამართლიანად მიიჩნიოთ.

¹⁵მაგრამ უნდა იცოდეთ, რომ, თუ მომკლავთ, უდანაშაულო სისხლს დაიდებთ თქვენცა და ეს ქალაქიც და მთელი მისი მკვიდრნიც, რადგან ნამდვილად უფალმა მომავლინა თქვენთან, რომ მეთქვა ყველა ეს სიტყვა თქვენს გასაგონად.

¹⁶მაშინ უთხრეს მთავრებმა და მთელმა ხალხმა მღვდლებსა და წინასწარმეტყველთ: ეს კაცი არ იმსახურებს სასიკვდილო განაჩენს, რადგან უფლის, ჩვენი ღმერთის, სახელით გველაპარაკებოდა.

¹⁷და წამოდგნენ ხალხის უხუცესთაგან და უთხრეს მთელი ხალხის კრებულს:

¹⁸მორეშეთელი მიქაც წინასწარმეტყველებდა იუდეის მეფის, ხიზკიას, დღეებში და ასე უთხრა მთელ იუდაელთ: ასე თქვა ცაბაოთ უფალმა: სიონი მინდორივით გადაიხვნება, და იერუსალიმი ნანგრევთა გროვად იქცევა, ეს ტაძრის მთა კი – უღრან ტყედო.

¹⁹მაგრამ განა მოკლეს იგი იუდეის მეფე ხიზკიამ და იუდაელებმა? განა არ შეეშინდა მას უფლისა? ხომ შესთხოვა უფალს, და გადაიფიქრა უფალმა ის უბედურება, რომელიც წარმოთქვა მათზე? ჩვენ კი თვით გვსურს მოვიწიოთ დიდი უბედურება ჩვენს სულებზე!

²⁰სხვა კაციც წინასწარმეტყველებდა უფლის სახელით – ურია, შემაყიას ძე, კირიათ-იეყარიმელი, და წინასწარმეტყველებდა ამ ქალაქზე და ამ ქვეყანაზე ყველა იმ სიტყვებით, რომლებითაც იერემია წინასწარმეტყველებდა.

²¹როცა გაიგეს მისი სიტყვები მეფე იეჰოიაკიმმა, მისმა დიდებულებმა და მისმა მთავრებმა, მოითხოვა მეფემ მისი მოკვლა. გაიგო ეს ურიამ, შეეშინდა და გაიქცა ეგვიპტეში.

²²და გაგზავნა მეფე იეჰოიაკიმმა ეგვიპტეში თავისი კაცები: ელნათან ყაქბორის ძე და სხვები.

²³და მათ გამოიყვანეს ურია ეგვიპტიდან და მიუყვანეს მეფე იეჰოიაკიმს, და მან დასცა ის მახვილით, მისი გვამი კი მდაბიოთა სასაფლაოზე გადააგდეს.

²⁴ხოლო იერემიას ახიკამ შაფანის ძის ხელი მფარველობდა, რომ ხალხის ხელში არ ჩაეგდოთ მოსაკლავად.