Read სბს–2013 იერემია 27 Bible Online

იერემია 27 - სბს–2013 bible

იერემია 27

¹იუდას მეფის ცედეკიას, იოშიას ძის, მეფობის დასაწყისში ეს სიტყვა იყო იერემიას მიმართ უფლისაგან.

²ასე მითხრა მე უფალმა: გაიკეთე უღელი და აპეურები და დაიდგი ქედზე.

³და ისეთივე გაუგზავნე ედომის მეფეს, მოაბის მეფეს, ყამონელთა მეფეს, ცორის მეფეს და ციდონის მეფეს იმ მოციქულთა ხელით, რომლებიც იერუსალიმში მოვიდნენ იუდას მეფე ცედეკიასთან.

⁴და უბრძანე მათ უთხრან თავიანთ ბატონებს: ასე თქვა ცაბაოთ უფალმა, ისრაელის ღმერთმა: უთხარით-თქო თქვენს ბატონებს:

⁵მე შევქმენი ეს ქვეყანა და ადამიანი და პირუტყვი, რაც კი დედამიწის ზურგზეა, ჩემი დიდი ძალით და აღმართული მკლავით, და მივეცი მათ, ვინც ღირსად ჩავთვალე.

⁶და ახლა ყველა ეს ქვეყნები მე მივეცი ჩემს მსახურს, ბაბილონის მეფე ნაბუქოდონოსორს, და თვით ველის ნადირთაც მას ვაბარებ რათა ემსახურონ.

⁷და ყველა ხალხები დაემორჩილებიან მას და მის ძეებს და მის ძეთა ძეთ; სანამ დაუდგება მის ქვეყანასა და მას ჟამი უფლის რისხვისა, მანამ მორჩილებაში ეყოლება მას მრავალრიცხოვანი ხალხები და დიდი მეფენი.

⁸და თუ რომელიმე ხალხი ან სამეფო უარს ეტყვის მორჩილებაზე ბაბილონის მეფე ნაბუქოდონოსორს და ქედს ასწევს მისი უღლიდან, მახვილით, შიმშილით და შავი ჭირით დავსჯი იმ ხალხსა და სამეფოს, – ამბობს უფალი, – ვიდრე არ მოვსპობ მათ მისი ხელით.

⁹და თქვენ ნუ მოუსმენთ თქვენს წინასწარმეტყველთ და თქვენს მისნებს, და თქვენს მესიზმრეებს და თქვენს მკითხავებს და თქვენს გრძნეულებს, რომლებიც გეუბნებიან: არ ემსახუროთო ბაბილონის მეფეს.

¹⁰რადგან ტყუილს გიწინასწარმეტყველებენ ისინი, რათა მოგაშორონ თქვენი მიწიდან, და მე გაგაძეოთ და დაიღუპოთ.

¹¹ხოლო, იმ ხალხს, რომელიც ქედს მოუხრის ბაბილონის მეფის უღელს და დაემორჩილება, დავტოვებ თავის მიწაზე, – ამბობს უფალი, – და დაამუშავებენ მას და იცხოვრებენ იქ.

¹²ცედეკიას, იუდას მეფეს, ვუთხარი იგივე სიტყვები, რომ მოუხარეთ-მეთქი ქედი ბაბილონის მეფის უღელს, დაემორჩილეთ მას და მის ხალხს, და ცოცხალი გადარჩებით-მეთქი.

¹³რისთვის უნდა მოისრათ შენ და შენი ერი მახვილით, შიმშილითა და შავი ჭირით, როგორც დაემუქრა უფალი იმ ხალხს, რომელიც არ დაემორჩილიება ბაბილონის მეფეს?

¹⁴ნუ მოუსმენთ წინასწარმეტყველთა სიტყვებს, რომლებიც ასე გეუბნებიან: არ ემსახუროთო ბაბილონის მეფეს! სიცრუეს გიწინასწარმეტყველებენ ისინი,

¹⁵რადგან მე არ გამომიგზავნია ისინი, – ამბობს უფალი, – სიცრუეს წინასწარმეტყველებენ ჩემი სახელით, რათა განგდევნოთ მე და დაიღუპოთ თქვენს წინასწარმეტველებთან ერთად.

¹⁶მღვდლებსა და მთელ ამ ხალხს ველაპარაკე და ვუთხარი: ასე ამბობს-მეთქი უფალი: ნუ დაიჯერებთ თქვენს წინასწარმეტყველთა სიტყვებს, რომ გიქადაგებენ: აჰა, სადაც არის დაბრუნდებაო ბაბილონიდან უფლის ტაძრის ჭურჭელი; რადგან სიცრუეს გიწინასწარმეტყველებენ ისინი.

¹⁷ნუ დაუჯერებთ მათ, ემსახურეთ ბაბილონის მეფეს და ცოცხლები გადრჩებით. რატომ უნდა აოხრდეს ეს ქალაქი?

¹⁸თუ წინასწარმეტყველნი არიან ისინი და თუ უფლის სიტყვა არის მათ შორის, შეევედრონ ცაბაოთ უფალს, რომ უფლის სახლში, იუდას მეფის სახლსა და იერუსალიმში დარჩენილი ჭურჭელიც არ წავიდეს ბაბილონში.

¹⁹რადგან ასე ამბობს ცაბაოთ უფალი სვეტებზე, ბრინჯაოს ზღვაზე, კვარცხლბეკებსა და ამ ქალაქში დარჩენილ სხვა ჭურჭელზე,

²⁰რაც არ წაუღია ნაბუქოდონოსორს, ბაბილონის მეფეს, როცა იერუსალიმიდან ბაბილონში გადაასახლა იუდას მეფე იექონია, იეჰოიაკიმის ძე, იუდეისა და იერუსალიმის მთავრებთან ერთად.

²¹რადგან ასე თქვა ცაბაოთ უფალმა, ისრაელის ღმერთმა, უფლის სახლში, იუდას მეფის სასახლესა და იერუსალიმში დარჩენილ ჭურჭელზე:

²²ბაბილონში გავზიდავ მას, და იქ დარჩება ის, ვიდრე არ ვიზრუნებ მასზე, – ამბობს უფალი, – და არ გამოვატანინებ და არ დავაბრუნებინებ ამ ადგილზე.