Read სბს–2013 იერემია 29 Bible Online

იერემია 29 - სბს–2013 bible

იერემია 29

¹ეს არის სიტყვები წერილისა, რომელიც იერემია წინასწარმეტყველმა გაუგზავნა ნაბუქოდონოსორის მიერ იერუსალიმიდან ბაბილონში გადასახლებული უხუცესების, მღვდლების, წინასწარმეტყველებისა და ხალხის ნატამალს,

²(ეს იყო მას შემდეგ, რაც ბაბილონის მეფემ იერუსალიმიდან გაიყვანა მეფე იექონია, მისი დედა-დედოფალი, კარისკაცნი და იუდასა და იერუსალიმის მთავრები, ხუროები და მჭედლები);

³ელყასა შაფანის ძის, და გემარია ხილკიას ძის ხელით, რომლებიც იუდას მეფე ცედეკიამ გაგზავნა ბაბილონის მეფე ნაბუქოდონოსორთან ბაბილონში, რათა ეთქვათ მისთვის:

⁴ასე ეუბნება ცაბაოთ უფალი, ისრაელის ღმერთი, ყველა გადასახლებულს, რომლებიც მე გადავასახლე იერუსალიმიდან ბაბილონში:

⁵აიშენეთ სახლები და დასახლდით, და გააშენეთ ბაღები და ჭამეთ მისი ნაყოფი,

⁶მოიყვანეთ ცოლები და შობეთ ძენი და ასულნი, და მოუყვანეთ თქვენს ძეებს ცოლები და თქვენი ასულნი გაათხოვეთ, და შვან მათ ძენი და ასულნი და გამრავლდით იქ და არ შემცირდეთ.

⁷და შესთხოვეთ მშვიდობა იმ ქალაქისათვის, სადაც გადაგასახლეთ თქვენ, და ევედრეთ მისთვის უფალს, რადგან მისი მშვიდობით თქვენც გექნებათ მშვიდობა.

⁸რადგან ასე ამბობს ცაბაოთ უფალი, ისრაელის ღმერთი: ნუ გაცდუნებენ თქვენ თქვენი წინასწარმეტყველნი, რომელნიც თქვენს შორის არიან, და თქვენი მისნები, და ნუ დაუჯერებთ თქვენს სიზმრებს, რომლებიც გესიზმრებათ.

⁹რადგან ტყუილს გიწინასწარმეტყველებენ ისინი ჩემი სახელით: მე არ გამომიგზავნია ისინი, – ამბობს უფალი.

¹⁰რადგან ასე ამბობს უფალი: როდესაც შეგისრულდებათ ბაბილონში სამოცდაათწლიანი ტყვეობა, მოგიკითხავთ მე თქვენ და აგისრულებთ ჩემს კეთილ სიტყვას, რომ გითხარით დაგაბრუნებთ-მეთქი ამ ადგილას.

¹¹რადგან მე კარგად ვიცი ის ზრახვები, რაც მე განვიზრახე თქვენთვის, – ამბობს უფალი, – სამშვიდობო ზრახვები, რომ მოგცეთ თქვენ მომავალი და იმედი.

¹²თქვენ მოხვალთ და შემევედრებით, მომიხმობთ და მე მოგისმენთ თქვენ;

¹³მეძიეთ და მიპოვით თუ მთელი გულით დამიწყებთ ძებნას.

¹⁴გამოგეცხადებით მე და დაგაბრუნებთ ტყვეობიდან, და შეგკრებთ ყველა იმ ხალხებიდან და ყველა იმ ადგილიდან, სადაც კი გამიძევებიხართ, – ამბობს უფალი, – და დაგაბრუნებთ იმავე ადგილას, საიდანაც გადაგასახლეთ.

¹⁵რადგან თქვენ ამბობთ: უფალმა ბაბილონშიც აღგვიდგინაო წინასწარმეტყველნი.

¹⁶რადგან ასე ამბობს უფალი დავითის ტახტზე მჯდომ მეფეზე, და ამ ქალაქში მცხოვრებ მთელ ხალხზე, თქვენს ძმებზე, რომლებიც თქვენთან ერთად არ წამოსულან გადასახლებაში;

¹⁷ასე თქვა ცაბაოთ უფალმა: აჰა, მე მოვუვლენ მათ მახვილს, შიმშილსა და შავ ჭირს და ვაქცევ მათ უვარგის ლეღვად, საჭმელად რომ არ ვარგა.

¹⁸დავედევნები მათ მახვილით, შიმშილითა და შავი ჭირით, და საფრთხობელად ვაქცევ მათ ქვეყნიერების ყველა სამეფოსათვის, შესაჩვენებლად, შესაზარად, სამასხროდ და სასირცხვოდ ყველა ხალხში, სადაც კი გამიძევებია ისინი.

¹⁹იმის სანაცვლოდ, რომ არ უსმინეს ჩემს სიტყვებს, – ამბობს უფალი, – რომლებსაც ვუთვლიდი მათთან მივლინებული ჩემი მსახურების – წინასწარმეტყველების პირით, მაგრამ მათ არ უსმინეს მათ, – ამბობს უფალი.

²⁰თქვენ მაინც ისმინეთ უფლის სიტყვა, ყველა გადასახლებულო, ვინც კი გაგაგზავნეთ იერუსალიმიდან ბაბილონში.

²¹ასე ამბობს ცაბაოთ უფალი, ისრაელის ღმერთი, ახაბზე, კოლაიას ძეზე და ცედეკიაზე, მაყასეიას ძეზე, რომლებიც ჩემი სახელით ტყუილს გიწინასწარმეტყველებდნენ: აჰა, მე მივცემ მათ ბაბილონის მეფეს ნაბუქოდონოსორს ხელში და ის დახოცავს მათ თქვენს თვალწინ.

²²და ასე დაიწყევლის ბაბილონში გადასახლებული ყველა იუდაელი: „უფალმა გიყოს, რაც ცედეკიასა და ახაბს დამართა ბაბილონის მეფემ – ცეცხლზე რომ შეწვა!“

²³იმის გამო, რომ სისაძაგლე ჩაიდინეს მათ ისრაელში და მრუშობდნენ თავიანთ მოყვასთა ცოლებთან და ტყუილს ამბობდნენ ჩემი სახელით, რაც მე არ დამივალებია მათთვის. მე კარგად ვიცი, რასაც ისინი აკეთებდნენ და მოწმეცა ვარ, – ამბობს უფალი.

²⁴და შემაყია ნეხელამელს უთხარი:

²⁵ასე ამბობს-თქო ცაბაოთ უფალი, ისრაელის ღმერთი: იმის გამო, რომ შენი სახელით უგზავნიდი წერილებს იერუსალიმის მთელ ერს და მღვდელ ცეფანია მაყასეიას ძეს, და ყველა სხვა მღვდლებს, რომ

²⁶„უფალმა დამადგინაო მე მღვდლად იეჰოიადაყის ნაცვლად, რათა თვალი ვადევნო უფლის ტაძარში ყოველ ბნედიანს, წინასწარმეტყველი რომ ჰგონია თავი და ჩავსვა საპყრობილესა და საკანში.“

²⁷მაშ ახლა რატომ არ ურისხდებით იერემია ყანათოთელს, რომელიც თქვენ გიწინასწარმეტყველებთ?

²⁸იმიტომ, რომ მან ჩვენთანაც შემოთვალა ბაბილონში: ხანგრძლივი იქნებაო დევნილობა; აიშენეთ სახლები და დასახლდით და გააშენეთ ბაღები და ჭამეთ მისი ნაყოფი.

²⁹და წაიკითხა მღვდელმა ცეფანიამ ეს წერილი იერემია წინასწარმეტყველის გასაგონად;

³⁰და იყო უფლის სიტყვა იერემიას მიმართ:

³¹შეუთვალე ყველა გადასახლებულს: ასე ამბობს-თქო უფალი შემაყია ნეხელამელზე: იმის გამო, რომ შემაყია გიწინასწარმეტყველებთ თქვენ, მე კი არ გამომიგზავნია ის თქვენთან, და ტყუილებით გაიმედებთ,

³²ამიტომ ასე ამბობს უფალი: აჰა, მე დავსჯი შემაყია ნეხელამელს და მის მოდგმას; ვერ დარჩება მისი მოდგმა ამ ხალხში, და ვერ იხილავს ის იმ სიკეთეს, რასაც მე ჩემს ერს მივაგებ, – ამბობს უფალი, – რადგან უფლისაგან განდგომას ქადაგებდა.