Read სბს–2013 იერემია 30 Bible Online

იერემია 30 - სბს–2013 bible

იერემია 30

¹უფლის სიტყვა, რომელიც იყო იერემიას მიმართ:

²ასე ამბობს უფალი, ისრაელის ღმერთი: გრაგნილში ჩაიწერე ყველა ის სიტყვა, რაც გითხარი.

³რადგან, აჰა, დგება ჟამი, – ამბობს უფალი, – როცა მე დავაბრუნებ ჩემს ერს – ისრაელსა და იუდას – ტყვეობიდან. დავაბრუნებ მათ იმ ქვეყანაში, რომელიც მივეცი მათ მამებს და ისინი დაიმკვიდრებენ მას.

⁴ეს ის სიტყვებია, რომლებიც თქვა უფალმა ისრაელსა და იუდაზე.

⁵ასე ამბობს უფალი: შიშის ხმა გვესმის ჩვენ, ძრწოლისა და არა მშვიდობისა.

⁶იკითხეთ და ნახეთ, თუ სადმე გაგონილა, რომ კაცი შობდეს? მაშ რატომ ვხედავ, რომ კაცებს მშობიარე დედაკაცებივით ხელით უჭირავთ თეძოები? და რატომ გაფითრებია ყველას სახე?

⁷ვაი, რა დიდია ის დღე, არ ყოფილა მისი მსგავსი. უბედურების ჟამია ის იაკობისთვის, მაგრამ ის გადარჩება.

⁸და იქნება იმ დღეს, – ამბობს ცაბაოთ უფალი – რომ დავლეწავ მის უღელს შენ რომ გადგას ქედზე, და დავწყვეტ შენს აპეურებს; და აღარ მოემსახურებიან უცხოთესლთ.

⁹არამედ მოემსახურებიან ისინი უფალს, თავიანთ ღმერთს, და დავითს, თავიანთ მეფეს, რომელსაც მე აღვუდგენ მათ.

¹⁰და ნუ გეშინია, იაკობ, ჩემო მონავ! – ამბობს უფალი, – და ნუ შეშინდები, ისრაელ, რადგან, აჰა, მე დაგიხსნი შენ შორეთიდან და შენს თესლს – მათი ტყვეობის ქვეყნიდან. და დაბრუნდება იაკობი და იცხოვრებს წყნარად და მშვიდად და ვეღარავინ შეაშინებს მას.

¹¹რადგან შენთანა ვარ მე, – ამბობს უფალი, – რომ გიხსნა, რადგან ბოლოს მოვუღებ ყველა ხალხებს, რომელთა შორისაც გაგფანტე შენ, მაგრამ შენ არ მოგიღებ ბოლოს; შენ სამართლიანად დაგსჯი, დაუსჯელს კი არ დაგტოვებ.

¹²რადგან ასე ამბობს უფალი: უკურნებელია შენი ჭრილობა, მძიმეა შენი წყლული.

¹³არავინ არის შენი საქმის განმკითხველი, შესახორცებელი სალბუნი არ მოიძიება შენთვის.

¹⁴ყველა შენმა მეგობარმა დაგივიწყა, არ გკითხულობენ, რადგან მტრის ჭრილობით დაგჭერი მე, სასტიკი სატანჯველით – შენი მრავალი ურჯულოების გამო, რადგან გამრავლდა შენი ცოდვები.

¹⁵რას კვნესი შენს ჭრილობებზე, შენს უწყალო სატკივარზე? შენი მრავალი ურჯულოების გამო გიყავი მე ეს, იმის გამო, რომ გამრავლდა შენი ცოდვები.

¹⁶ამიტომ ყველა შენს შემჭმელს შეჭამენ; და ყველა შენს მოძალადეს ტყვედ წაიყვანენ; ყველა შენს ამაოხრებელს ააოხრებენ, და ყველა შენს მძარცველს გავაძარცვინებ.

¹⁷მე მინდა მოგივლინო კურნება მძიმე წყლულებისაგან და განგკურნო, – ამბობს უფალი, – რადგან მოკვეთილი გიწოდეს და ამბობდნენ: ეს არისო სიონი, რომელსაც აღარავინ კითხულობსო.

¹⁸ასე ამბობს უფალი: მე დავაბრუნებ იაკობის კარვებიდან ტყვეობაში წაყვანილთ და შევიწყალებ მის დაბებს; და აშენდება ქალაქი თავის ბორცვებზე და ტაძარი თავის ძველ ადგილზე მოეწყობა.

¹⁹და გამოვა მათგან სამადლობელი და სიცილის ხმა; განვადიდებ მათ და არ დამცირდებიან.

²⁰და იქნებიან მათი ძენი უწინდელივით, მისი თემი ჩემს წინაშე წარსდგება და მე დავსჯი ყველა მის დამთრგუნველს.

²¹მისგანვე იქნება მისი მბრძანებელი და მისივე წიაღიდან გამოვა მისი მთავარი. და მე მოვიახლოვებ მას და ის მოვა ჩემთან, რადგან თავისით ვინ გაბედავს, რომ მომიახლოვდეს მე? – ამბობს უფალი.

²²და თქვენ იქნებით ჩემი ერი და მე ვიქნები თქვენი ღმერთი.

²³აჰა, მძვინვარე ქარბორბალა წამოვიდა უფლისგან, მრისხანე ქარბორბალა, ბოროტეულთ დაატყდება თავს.

²⁴უკუ არ იქცევა უფლის გულისწყრომის რისხვა, ვიდრე არ შეისრულებს თავისი გულისნადებს. უკანასკნელ დღეებში მიხვდებით ამას.