Read სბს–2013 იერემია 32 Bible Online

იერემია 32 - სბს–2013 bible

იერემია 32

¹და იყო უფლის სიტყვა იერემიას მიმართ იუდას მეფის, ცედეკიას მეფობის მეათე წელს. ეს იყო ნაბუქოდონოსორის მეფობის მეთვრამეტე წელი.

²მაშინ ალყაში მოიქცია ბაბილონის მეფის ლაშქარმა იერუსალიმი და იერემია წინასწარმეტყველი დაპატიმრებული იყო იუდას მეფის სასახლის ყარაულთა ეზოში.

³იუდას მეფე ცედეკიამ დააპატიმრა იგი და უთხრა: რატომ წინასწარმეტყველებ ასე და ამბობ, რომ უფალმა თქვა: აჰა, მე ამ ქალაქს ბაბილონის მეფეს ვაძლევო ხელთ და ის დაიპყრობსო მას.

⁴და იუდას მეფე, ცედეკია, თავს ვერ დააღწევსო ქალდეველთაგან, რადგან გადაეცემაო ბაბილონის მეფის ხელთ და პირისპირ ილაპარაკებსო მასთან, და საკუთარი თვალით შეხედავენო ერთმანეთს.

⁵ბაბილონში წაიყვანსო ის ცედეკიას და იქნება იქ, სანამ არ გავიხსენებო მას, – ამბობს უფალი, – თუ შეებრძოლებით ქალდეველებს, წარმატებას ვერ მიაღწევთო.

⁶და თქვა იერემიამ: იყო უფლის სიტყვა ჩემს მიმართ:

⁷აჰა, ხანამელი, შენი ბიძის, შალუმის, ძე, მოდის შენთან რათა გითხრას: იყიდე ჩემი მინდორი, ყანათოთში რომ მიჭირავს, რადგან გამოსყიდვის უფლებით შენ გეკუთვნის მისი დამკვიდრება.

⁸და მართლაც, უფლის სიტყვისამებრ მოვიდა ჩემთან საპყრობილის ეზოში ხანამელი, ძე ჩემი ბიძისა, და მითხრა: იყიდე ჩემი მინდორი, რომელიც ყანათოთში მიჭირავს, ბენიამინის მიწაზე, რადგან მემკვიდრეობის უფლებაც შენა გაქვს და გამოსყიდვისაც. იყიდე შენთვის. და მე მივხვდი, რომ ეს უფლის ბრძანება იყო.

⁹და მე ვიყიდე მინდორი ჩემი ბიძაშვილის, ხანამელისაგან, ყანათოთში, და მივუწონე მას ფულად – 17 შეკელი ვერცხლი.

¹⁰და ჩავწერე სიგელში, დავბეჭდე, დავისწარი მოწმეები და ვერცხლი ავწონე სასწორზე.

¹¹ავიღე ნასყიდობის სიგელი, წესითა და რიგით ბეჭედდასმული და მისი ბეჭედდაუსმელი პირი.

¹²და მივეცი ნასყიდობის სიგელი ბარუქს, ნერიას ძეს, მახსეიას ძის ძეს, ჩემი ბიძის ძის, ხანამელის, თვალწინ, ყველა მოწმის თვალწინ, რომელთაც ხელი მოაწერეს სიგელზე, ყველა იუდაელის თვალწინ, რომელნიც ყარაულთა ეზოში ისხდნენ.

¹³და ასე ვუბრძანე ბარუქს მათი თანდასწრებით:

¹⁴ასე ამბობს ცაბაოთ უფალი, ისრაელის ღმერთი: აიღე ეს დაწერილები და ეს ბეჭედდასმული და ეს ბეჭედდაუსმელი ნასყიდობის სიგელები და ჩადე ისინი თიხის ჭურჭელში, რათა დიდხანს ინახებოდეს.

¹⁵რადგან ასე ამბობს ცაბაოთ უფალი, ისრაელის ღმერთი: კიდევ იყიდიან სახლებს და მინდვრებს და ვენახებს ამ ქვეყანაში!

¹⁶და მას შემდეგ, რაც ნასყიდობის სიგელი მივეცი ბარუქ ნერიას ძეს, ასე შევევედრე უფალს:

¹⁷ო, უფალო ღმერთო! აჰა, შენ შეჰქმენი ცა და დედამიწა შენი დიდი ძალითა და შენი აღმართული მკლავით; არაფერია შენთვის შეუძლებელი!

¹⁸წყალობასა იქმ ათასებზე და მამების ურჯულოებას მათ ძეთა წიაღში მიუზღავ მათ შემდეგ; შენ, დიდო და ძლიერო ღმერთო, რომლის სახელიც ცაბაოთ უფალია.

¹⁹სიტყვაგზიანო და მძლესაქმიანო, თვალს რომ არ აცილებ ადამის ძეთა ყოველ გზას, რათა მიუზღო თითოეულს თავისი გზისამებრ, მათ მოქმედებათა ნაყოფისამებრ;

²⁰რომელმაც მოიმოქმედე ნიშები და სასწაულები ეგვიპტის ქვეყანაში, და დღემდე ახდენ ისრაელსა და კაცთა მოდგმაში, და შეიქმენი სახელი, როგორც დღესა გაქვს.

²¹და გამოიყვანე შენი ერი, ისრაელი, ეგვიპტის ქვეყნიდან ნიშებითა და სასწაულებით, და მტკიცე ხელითა და აღმართული მკლავით და დიდი შიშის ზარით.

²²და მიეცი მათ ეს ქვეყანა, რომელიც შეჰფიცე მათ მამებს, რომ მისცემდი რძითა და თაფლით მდინარ ქვეყანას.

²³და მოვიდნენ ისინი და დაიმკვიდრეს ის, მაგრამ არ ისმინეს შენი ხმა და შენს რჯულზე არ იარეს, და ყოველივე, რისი გაკეთებაც ბრძანე, არ გააკეთეს, და შენ მოაწიე მათზე ყველა ეს უბედურება.

²⁴აჰა, მიწაყრილები შემოადგეს ქალაქს მის დასაპყრობად; და მახვილის, შიმშილისა და შავი ჭირისაგან ღონემიხდილი ქალაქი მის წინააღმდეგ მებრძოლ ქალდეველთა ხელში გადადის; და, რასაც ამბობდი, სრულდება და შენ ხედავ ამას.

²⁵შენ კი, უფალო ღმერთო, მითხარი: იყიდეო შენთვის მინდორი ვერცხლით და მოწმეები დაისწარიო; მაშინ, როცა ქალაქი ქალდეველთა ხელში გადადის.

²⁶და იყო უფლის სიტყვა იერემიას მიმართ:

²⁷მე ვარ უფალი, ღმერთი ყოველი ხორციელისა; განა რაიმე არის ჩემთვის შეუძლებელი?

²⁸ამიტომ ასე ამბობს უფალი: აჰა, მე ამ ქალაქს ხელში ჩავუგდებ ქალდეველებს და ბაბილონის მეფე ნაბუქოდონოსორი დაიპყრობს მას.

²⁹და შემოვლენ ქალდეველნი, ალყაში მოიქცევენ ამ ქალაქს, ცეცხლს მისცემენ მას და გადაბუგავენ, და სახლებს, რომლის ბანებზეც უკმევდნენ ბაყალს და საღვრელს უღვრიდნენ უცხო ღმერთებს ჩემს გასარისხებლად.

³⁰რადგან ისრაელის ძენი და იუდას ძენი მხოლოდ ბოროტის მოქმედნი იყვნენ ჩემს თვალში მათი სიყმაწვილიდან, რადგან ისრაელის ძენი მხოლოდ მაბოროტებდნენ მე თავიანთი ხელის ნაკეთებით, – ამბობს უფალი;

³¹რადგან ჩემს რისხვას და გულისწყრომას იწვევდა ეს ქალაქი მისი აგების დღიდან დღემდე. ამიტომაც მოვიშორებ მას ჩემს თვალთაგან –

³²ისრაელის ძეთა და იუდას ძეთა ყველა ბოროტების გამო, რომელიც მათ ჩაიდინეს ჩემს გასარისხებლად, მათ, მათმა მეფეებმა, მათმა მთავრებმა, მათმა მღვდლებმა და მათმა წინასწარმეტყველებმა, იუდას კაცებმა და იერუსალიმის მკვიდრებმა.

³³მათ ზურგი მომაქციეს და არა სახე; და როცა მათ ვასწავლიდი, სისხამ დილიდან ვასწავლიდი, მაგრამ არ შეისმინეს ჩემი დარიგება.

³⁴და სახლში, რომელიც ჩემი სახელით იწოდება, დადგეს თავიანთი კერპები, რათა შეებილწათ იგი.

³⁵და მოაწყვეს ბაყალის საკერპო ბენ-ჰინომის ველზე, რათა გაეტარებინათ ცეცხლში თავიანთი ძენი და ასულნი მოლექის მსხვერპლად, რაც მე არ მიბრძანებია მათთვის და გულშიც არ გამივლია გამეკეთებინა ეს სისაძაგლე იუდას საცდუნებლად.

³⁶და ამიტომ ასე ამბობს უფალი, ისრაელის ღმერთი ამ ქალაქზე, რომელზეც თქვენ ლაპარაკობთ: ბაბილონის მეფის ხელში ჩავარდებაო ის მახვილით, შიმშილითა და შავი ჭირით, –

³⁷აჰა, მე შევკრებ მათ ყველა ქვეყნიდან, სადაც გავაძევე ისინი ჩემი რისხვით და ჩემი გულისწყრომით და დიდი მძვინვარებით; და დავაბრუნებ მათ ამ ადგილას და დავასახლებ მათ უსაფრთხოდ.

³⁸და ისინი იქნებიან ჩემი ერი და მე ვიქნები მათი ღმერთი.

³⁹და მივცემ მათ ერთ გულს და ერთ გზას, რათა ეშინოდეთ ჩემი ყოველთვის, მათ სასიკეთოდ და მათ ძეთა სასიკეთოდ მათ შემდეგ.

⁴⁰და დავუდებ მათ საუკუნო აღთქმას, რომ ზურგს აღარ შევაქცევ მათ, რათა სიკეთე ვუყო და მივცე მათ გულებს ჩემი შიში და აღარ განდგნენ ჩემგან.

⁴¹გავიხარებ მათთვის სიკეთის ქმნით, და დავნერგავ მათ ამ ქვეყანაში მყარად მთელი ჩემი გულითა და მთელი ჩემი სულით,

⁴²რადგან ასე ამბობს უფალი: როგორც მოვუტანე ამ ხალხს ყველა დიდი უბედურება, ასევე მოვუტან მათ ყველა იმ სიკეთეს, რომელიც აღვუთქვი მათ.

⁴³და იყიდიან მინდვრებს ამ ქვეყანაში, რომელზეც თქვენ ამბობთ: ცარიელიაო, კაცისა და პირუტყვის ჭაჭანება არა ჩანსო, ქალდეველთ ჩაუვარდათო ხელთ.

⁴⁴მინდვრებს ვერცხლით იყიდიან და ნასყიდობის სიგელებს დაწერენ, და ბეჭდებს დაუსვამენ, და მოწმეებს დაისწრებენ ბენიამინის ქვეყანაში, იერუსალიმის შემოგარენსა და იუდას ქალაქებში, მთის ქალაქებში და ბარის ქალაქებში, და სამხრეთის ქალაქებში, რადგან დავაბრუნებ მათ ტყვეობიდან, – ამბობს უფალი.