Read სბს–2013 იერემია 33 Bible Online

იერემია 33 - სბს–2013 bible

იერემია 33

¹და იყო უფლის სიტყვა იერემიას მიმართ მეორედ, როდესაც ის ჯერ ისევ დამწყვდეული იყო ყარაულთა ეზოში.

²ასე ამბობს უფალი, რომელმაც შექმნა მიწა, უფალი, რომელმაც მოაწყო და დააფუძნა იგი, – უფალია მისი სახელი.

³მომიხმე მე და გიპასუხებ, და გაუწყებ დიდსა და მიუწვდომელს, რაც არ იცი შენ,

⁴რადგან ასე ამბობს უფალი, ისრაელის ღმერთი, ამ ქალაქის სახლებზე და იუდას მეფეთა სახლებზე, რომლებიც დაინგრა მიწაყრილთა და მახვილის წინაშე,

⁵როცა მოვიდნენ ქალდეველები საომრად და მათ ასავსებად ადამიანთა გვამებით, რომლებიც მე გავწყვიტე ჩემი გულისწყრომითა და რისხვით, რადგან მათი ბოროტების გამო გარე-მივაქციე პირი ჩემი ამ ქალაქს.

⁶აჰა, მე შევუხვევ მას ჭრილობებს და განვკურნავ, და ვყოფ მისთვის მშვიდობისა და ჭეშმარიტების სიუხვეს,

⁷და დავაბრუნებ იუდასა და ისრაელის ტყვეებს და ძველებურად ავაშენებ მათ.

⁸და განვწმედ მათ ყველა მათი უწმიდურებისაგან, რითაც ცოდავდნენ ჩემს წინაშე, და მივუტევებ ყველა ურჯულოებას, რითაც ცოდავდნენ ჩემს წინაშე და განმიდგნენ მე.

⁹და იქნება ჩემთვის იერუსალიმი სიხარულის სახელი, საქებრად და სადიდებლად ქვეყნის ყველა ხალხების წინაშე, რომლებიც მოისმენენ ყველა იმ სიკეთეს, რასაც მე გავუკეთებ მას, და გაოცდებიან და შეძრწუნდებიან ყველა იმ სიკეთისა და კეთილდღეობის გამო, რასაც მას მოვუტან.

¹⁰ასე ამბობს უფალი: ამ ადგილას, რომელზეც თქვენ ამბობთ: აოხრებულიაო და არც კაცი და არც პირუტყვი არ ჭაჭანებსო, – იუდას ქალაქებსა და იერუსალიმის ქუჩებში, რომლებიც დაცარიელებულია, უკაცრიელია, სადაც არც კაცი და არც პირუტყვი ჭაჭანებს, კვლავაც გაისმება

¹¹მხიარულებისა და ლხენის ხმა, ნეფის ხმა და საპატარძლოს ხმა, ხმა, რომელიც იტყვის: ადიდეთ ცაბაოთ უფალი, რამეთუ კეთილია უფალი, რადგან უკუნისამდეა წყალობა მისი! და ხმა უფლის სახლში სამადლობელო მსხვერპლის მომტანთა; რადგან დავაბრუნებ მათ ტყვეობიდან, როგორც უწინ იყვნენ, – ამბობს უფალი.

¹²ასე ამბობს ცაბაოთ უფალი: ამ გაუდაბურებულ ადგილზე და მის ქალაქებში, სადაც არ ჭაჭანებს არც კაცი, არც პირუტყვი, კვლავ გაჩნდება მწყემსთა ბინები, მათი ფარების სადგომები.

¹³მთის ქალაქებსა და ბარის ქალაქებში, სამხრეთის ქალაქებსა და ბენიამინის მიწაზე, იერუსალიმის გარეუბნებში და იუდას ქალაქებში კიდევაც გაივლის ფარები მწყემსის კომბლის ქვეშ დასათვლელად, – ამბობს უფალი.

¹⁴აჰა, დგება დღეები, – ამბობს უფალი, – როცა მე აღვასრულებ იმ სასიკეთო სიტყვას, რომელიც ისრაელის სახლსა და იუდას სახლს აღვუთქვი.

¹⁵იმ დღეებში და იმ ჟამს ჩემი ნებით აღმოცენდება ჭეშმარიტი მორჩი, დავითის მემკვიდრე, და ის იქმს სამართალსა და სიმართლეს ქვეყანაზე.

¹⁶იმ დღეებში გადარჩება იუდა და იერუსალიმი უსაფრთხოდ დასახლდება. და მისი სახელი იქნება: „უფალი ჩვენი ხსნა!“

¹⁷რადგან ასე ამბობს უფალი: არ დაელევა დავითს ისრაელის სახლის ტახტზე მჯდომი,

¹⁸და ლევიანთა მღვდლებს არ დაელევათ კაცი ჩემს წინაშე, ყოველდღიურად სრულადდასაწველის აღმავლენელი და ძღვენის მკმეველი და მსხვერპლის შემწირველი.

¹⁹და იყო უფლის სიტყვა იერემიას მიმართ:

²⁰ასე ამბობს უფალი: თუ შეძლებთ ჩემი აღთქმის დარღვევას დღისა და ღამის მონაცვლეობაზე, რომ დღე და ღამე აღარ იწყებოდეს თავის დროზე,

²¹მაშინ შესაძლებელი იქნება ჩემი აღთქმის დარღვევაც დავითთან, ჩემს მონასთან, რომ აღარ ეყოლება მას ძე მის ტახტზე გასამეფებლად, და ასევე ლევიან მღვდლებთან – ჩემს მსახურებთან.

²²როგორც უთვალავია ცის მხედრობა და ზღვაში ქვიშაა აღურიცხველი, ისე გავამრავლებ დავითის, ჩემი მონის, თესლ-ტომს და ლევიანებს, ჩემს მსახურთ.

²³და იყო უფლის სიტყვა იერემიას მიმართ:

²⁴ნუთუ ვერ ხედავ, რას ამბობს ეს ხალხი: ის ორი ტომი, რომელიც უფალმა ამოირჩია, მანვე უარყოო? და ამის გამო მათ მოიძულეს ჩემი ერი ისე, თითქოს ის არ ყოფილიყოს ხალხი მათ თვალში.

²⁵ასე ამბობს უფალი: რომ არ დამედო აღთქმა დღესთან და ღამესთან, და არ დამემტკიცებინა განჩინებანი ცისა და მიწისა,

²⁶მაშინ იაკობისა და დავითის, ჩემი მონის, მოდგმასაც უკუვაგდებდი და არ ავიყვანდი ხელმწიფეებს მისი თესლიდან აბრაამის, ისააკისა და იაკობის თესლისათვის; რადგან დავაბრუნებ მათ ტყვეობიდან და შევიწყალებ.