Read სბს–2013 იერემია 35 Bible Online

იერემია 35 - სბს–2013 bible

იერემია 35

¹სიტყვა, რომელიც იყო იერემიას მიმართ უფლისგან იუდას მეფის, იეჰოიაკიმ იოშიას ძის დღეებში:

²წადი რექაბელთა სახლში და დაელაპარაკე მათ, და მოიყვანე ისინი უფლის სახლში, ერთ-ერთ სენაკში, და ასვი მათ ღვინო.

³და წავიყვანე მე იააზანია, ძე იერემიასი, ძისა ხაბაცინიასი, მისი ძმა, და მისი ყველა ძე და რექაბელთა მთელი სახლი.

⁴და მივიყვანე ისინი უფლის სახლში, ღვთისკაცის, ხანან იგდალიას ძეთა სენაკში, რომელიც მთავართა სენაკის გვერდით იყო, მაყასეიას, შალუმის ძის – ზღურბლის დარაჯის – სენაკს ზემოთ.

⁵და დავაწყვე რექაბელთა სახლის ძეთა წინ ღვინით სავსე თასები და ფიალები, და ვუთხარი მათ: შესვით ღვინო.

⁶მათ თქვეს: ჩვენ არ ვსვამთ ღვინოს, რადგან იონადაბმა, რექაბის ძემ, ჩვენმა მამამ, გვიბრძანა: ღვინო არა სვათ არც თქვენ და არც თქვენმა შვილებმაო საუკუნოდ.

⁷სახლები არ აშენოთო, მარცვალი არ თესოთო და ვაზი არ ჩაყაროთო; და არც არაფერი იქონიოთო; მხოლოდ კარვებში იცხოვრეთ მთელი თქვენი დღე და მოსწრება, რათა დიდხანს გაძლოთ მიწაზე, სადაც თქვენა ხიზნობთო.

⁸და გავუგონეთ იონადაბის, რექაბის ძის, ჩვენი მამის, ხმას – ყოველივეს, რაც მან გვიანდერძა, რომ არა ვსვათ ღვინო მთელი ჩვენი დღე და მოსწრება, არც ჩვენ, არც ჩვენმა ცოლებმა, არც ჩვენმა ძეებმა და არც ჩვენმა ასულებმა, –

⁹და რომ არ უნდა ავიშენოთ სახლები საცხოვრებლად, და არა გვაქვს ვენახები, არც მინდორი და არც ხვნა-თესვას ვეწევით;

¹⁰ვცხოვრობთ კარვებში, და ვემორჩილებით იონადაბს, ჩვენს მამას, და ყველაფერს ისე ვაკეთებთ, როგორც მან გვიანდერძა.

¹¹მაგრამ როცა ბაბილონის მეფე ნაბუქოდონოსორი ამ ქვეყანას მოადგა, ჩვენ ვთქვით: მოდით, წავიდეთ იერუსალიმში, ვინაიდან უნდა გავექცეთ ქალდეველთა და არამელთა ლაშქარს. და, აჰა, ჩვენ ვცხოვრობთ იერუსალიმში.

¹²და იყო უფლის სიტყვა იერემიას მიმართ:

¹³ასე ამბობს ცაბაოთ უფალი, ისრაელის ღმერთი: წადი და უთხარი იუდას კაცებს და იერუსალიმის მკვიდრთ: ნუთუ არ მიიღებთ ჩემს დარიგებას და არ გაიგონებთ ჩემს სიტყვებს? – ამბობს უფალი.

¹⁴იონადაბის, რექაბის ძის, სიტყვები, რომელმაც უბრძანა თავის ძეთ, არა სვათო ღვინო, სრულდება, და არ სვამენ ღვინოს, რადგან შეისმინეს თავიანთი მამის ბრძანება. მაგრამ რასაც მე ყოველ ცისმარე გეუბნებოდით, არ მისმენდით.

¹⁵მე გიგზავნიდით ყველა ჩემს მსახურთ – წინასწარმეტყველთ – და გითვლიდით: მოიქცეს ყოველი კაცი თავისი ბოროტი გზიდან, გამოისწორეთ საქციელი, ნუ მიჰყვებით უცხო ღმერთებს, ნუ ემსახურებით მათ, და იცხოვრებთ-მეთქი ამ მიწაზე, რომელიც მე მოგეცით თქვენა და თქვენს მამებს, მაგრამ ყური არ შეიბერტყეთ და არ მომისმინეთ.

¹⁶ხომ შეასრულეს იონადაბ რექაბის ძის ძეთ თავიანთი მამის ბრძანება, რაც უბრძანა მათ, ამ ხალხს კი არ უნდა, რომ მომისმინოს.

¹⁷ამიტომ ასე ამბობს ცაბაოთ უფალი, ღმერთი ისრაელისა: აჰა, მე მოვაწევ იუდასა და იერუსალიმის ყოველ მცხოვრებზე ყველა იმ უბედურებას, რითაც მათ დავემუქრე, რადგან ვეუბნებოდი მათ და არ მისმენდნენ, მოვუხმობდი მათ და პასუხი არ იყო.

¹⁸და უთხრა რექაბელთა სახლს იერემიამ: ასე თქვა ცაბაოთ უფალმა, ისრაელის ღმერთმა: იმის გამო, რომ დაემორჩილეთ იონადაბის, თქვენი მამის, ანდერძს და იცავთ მის ყველა მცნებას, და ასრულებთ ყოველივეს ისე, როგორც მან გიანდერძათ,

¹⁹ამიტომაც ასე ამბობს ცაბაოთ უფალი, ისრაელის ღმერთი: „არასოდეს გაქრება იონადაბ რექაბის ძის მოდგმა ჩემს წინაშე.“