Read სბს–2013 იერემია 36 Bible Online

იერემია 36 - სბს–2013 bible

იერემია 36

¹და იყო უფლის სიტყვა იერემიას მიმართ იუდას მეფის, იეჰოიაკიმ იოშიას ძის მეფობის მეოთხე წელს:

²აიღე საწერი გრაგნილი და ზედ დაწერე ყველა ის სიტყვა, რომელთაც მე გეუბნებოდი ისრაელზე და იუდაზე, ყველა ხალხებზე იმ დღიდან, რაც დაგელაპარაკე – იოშიას დღეებიდან დღემდე.

³იქნებ შეაძრწუნოს იუდას სახლი ყველა იმ უბედურებამ, რასაც მე ვპირდები, რომ თავს დავატეხ, და მობრუნდეს თითოეული თავისი ბოროტი გზიდან, და მე ვაპატიო მათი დანაშაული და ცოდვები.

⁴და მოუხმო იერემიამ ბარუქს, ნერიას ძეს, და დაწერა ბარუქმა გრაგნილზე იერემიას პირით ნათქვამი ყოველი სიტყვა, რაც ნათქვამი ჰქონდა მისთვის უფალს.

⁵და უბრძანა იერემიამ ბარუქს ასე: მე დაპატიმრებული ვარ და არ შემიძლია უფლის სახლში მისვლა,

⁶ამიტომ შენ წადი და უფლის სახლში მარხვის დღეს ხალხის გასაგონად წაიკითხე უფლის სიტყვები ამ გრაგნილზე, რომელიც შენ დაწერე ჩემი კარნახით; ასევე მთელი იუდაელებისა და მათი სხვა ქალაქებიდან მოსულთა გასაგონადაც წაიკითხე.

⁷იქნებ მისწვდეს უფალს მათი ვედრება და მოიქცნენ თავისი ბოროტი გზიდან, რადგან დიდია რისხვა და გულისწყრომა, რითაც უფალმა დააშინა ეს ხალხი.

⁸და ბარუქ ნერიას ძემ გააკეთა ყოველივე ისე, როგორც უბრძანა იერემია წინასწარმეტყველმა, რომ წაეკითხა გრაგნილიდან უფლის სიტყვები უფლის სახლში.

⁹და იყო, იუდას მეფის, იეჰოიაკიმ იოშიას ძის მეფობის მეხუთე წლის მეცხრე თვეს, მარხვა გამოუცხადეს უფლის წინაშე იერუსალიმის მთელ ხალხს და იუდეის ქალაქებიდან იერუსალიმში მოსულთ.

¹⁰და ხმამაღლა წაიკითხა ბარუქმა გრაგნილიდან იერემიას სიტყვები უფლის სახლში, გემარიას, შაფან მწიგნობრის ძის დარბაზში, ზემო ეზოში, უფლის ტაძრის ახალი კარიბჭის შესასვლელში, მთელი ხალხის გასაგონად.

¹¹და ესმა მიქაიას, შაფანის ძის, გემარიას ძეს, გრაგნილზე წაკითხული უფლის ყოველი სიტყვა,

¹²და ჩავიდა მეფის სახლში, მწიგნობრის სენაკში, სადაც შეკრებილიყო ყველა მთავარი: ელიშამაყ მწიგნობარი და დელაია შემაყიას ძე, ელნათან ყაქბორის ძე და გემარია შაფანის ძე, ცედეკია ხანანიას ძე და ყველა სხვა მთავარი.

¹³და გადასცა მიქაიამ მათ ყველა ის სიტყვა, რომელიც მოისმინა, როდესაც ბარუქი გრაგნილს კითხულობდა ხალხის გასაგონად.

¹⁴და გაგზავნეს მთავრებმა ბარუქთან იეჰუდი, ძე ნეთანიასი, ძისა შელემიასი, ძისა ქუშისა და შეუთვალეს: გრაგნილი, რომელიც შენ წაიკითხე ხალხის გასაგონად, ხელში აიღე და აქ მოდიო. და აიღო ბარუქ ნერიას ძემ გრაგნილი ხელში და მივიდა მათთან.

¹⁵და უთხრეს მას: დაჯექი და წაიკითხე ჩვენს გასაგონად. და წაიკითხა ბარუქმა მათ გასაგონად.

¹⁶და, როცა მოისმინეს მათ ყველა ის სიტყვა, შიშით გადახედეს ერთმანეთს და უთხრეს ბარუქს: მეფეს გადავცემთო ყველა ამ სიტყვას.

¹⁷და ჰკითხეს ბარუქს: გვაუწყე, როგორ დაწერეო ყველა ეს სიტყვა?

¹⁸და უთხრა მათ ბარუქმა: თავისი პირით მკარნახობდა იერემია ამ სიტყვებს, მე კი მელნით ვწერდი გრაგნილზე.

¹⁹და უთხრეს მთავრებმა ბარუქს: წადით და დაიმალეთ შენ და იერემია და ნურავის ეცოდინება, სად იმყოფებით.

²⁰და წავიდნენ მთავრები მეფის სასახლეში, გრაგნილი კი შესანახად დატოვეს ელიშამაყ მწიგნობრის დარბაზში და აუწყეს მეფეს ყოველი სიტყვა.

²¹და გაგზავნა მეფემ იეჰუდი გრაგნილის წამოსაღებად და წამოიღო მან ელიშამაყ მწიგნობრის დარბაზიდან გრაგნილი; და წაიკითხა იეჰუდიმ მეფის გასაგონად და მეფესთან მდგომი ყველა მთავრის გასაგონად.

²²და იჯდა მეფე საზამთრო სახლში (მეცხრე თვე იყო), და ცეცხლი ენთო მის წინ.

²³და როდესაც იეჰუდი წაიკითხავდა სამ ან ოთხ კეფას, მეფე მოაჭრიდა მას გრაგნილს მწიგნობრის დანით და ცეცხლში აგდებდა, სანამ მთელი გრაგნილი ასე არ დაიწვა ცეცხლში.

²⁴და არც შეშინდნენ და არც სამოსელი შემოუგლეჯიათ ტანზე არც მეფეს და არც ერთ მის მსახურს, რომლებიც ისმენდნენ ამ სიტყვებს.

²⁵და ემუდარებოდნენ მეფეს ელნათანიც, დელაიაც და გემარიაც, რომ არ დაეწვა გრაგნილი, მაგრამ არ მოუსმინა მათ.

²⁶და უბრძანა მეფემ იერახმეელს, მეფის ძეს, სერაია ყაზრიელის ძეს, და შელემია ყაბდეელის ძეს, შეეპყროთ მწიგნობარი ბარუქი და წინასწარმეტყველი იერემია, მაგრამ უფალმა დაიფარა ისინი.

²⁷და იყო უფლის სიტყვა იერემიას მიმართ მას შემდეგ, რაც დაწვა მეფემ გრაგნილი და ის სიტყვები, რომელიც ბარუქმა დაწერა იერემიას კარნახით:

²⁸აიღე სხვა გრაგნილი და დაწერე მასზე ყველა წინანდელი სიტყვა, რომელიც პირველ გრაგნილში იყო, და რომელიც იეჰოიაკიმმა, იუდას მეფემ, დაწვა.

²⁹და თქვი იეჰოიაკიმზე, იუდას მეფეზე: ასე ამბობს უფალი: შენ დაწვი ეს გრაგნილი და თქვი: რატომ დაწერეო გრაგნილზე ასე, რომ მოვა ბაბილონის მეფე და ააოხრებს ამ ქვეყანას და მოსპობსო ადამიანისა და პირუტყვის სახსენებელს?

³⁰ამიტომ ასე ამბობს უფალი იეჰოიაკიმზე, იუდას მეფეზე: არ ეყოლებაო მას დავითის ტახტზე მჯდომი, მისი მძორი კი ეგდება დღის ხვატში და ღამის ყინვაში.

³¹და დავსჯი მას და მის მოდგმას და მის მსახურთ მათი ურჯულოების გამო, და მოვაწევ მათზე – იერუსალიმისა და იუდას მცხოვრებლებზე – ყველა იმ ბოროტებას, რაზეც ველაპარაკებოდი მათ და არ მისმინეს.

³²და აიღო იერემიამ სხვა გრაგნილი და მისცა ბარუქ ნერიას ძეს, მწიგნობარს, და მან დაწერა მასზე იერემიას პირით ნათქვამი ყველა სიტყვა იმ გრაგნილისა, რომელიც იეჰოიაკიმმა, იუდას მეფემ, დაწვა ცეცხლში. და დაემატა მას სხვა მრავალი მათი მსგავსი სიტყვა.