Read სბს–2013 იერემია 38 Bible Online

იერემია 38 - სბს–2013 bible

იერემია 38

¹და მოისმინეს შეფატია მათანის ძემ, გედალია ფაშხურის ძემ, იუქალ შელემიას ძემ და ფაშხურ მალქიას ძემ ის სიტყვები, რომელთაც იერემია ეუბნებოდა მთელ ერს:

²ასე ამბობს უფალი: ვინც ამ ქალაქში დარჩებიან, მახვილით, შიმშილითა და შავი ჭირით გაწყდებიანო, და ვინც ქალდეველებთან გადავა, ცოცხალი გადარჩება, და თავისი სული ექნება მას ნადავლად და იცოცხლებსო.

³ასე ამბობს უფალი: აუცილებლად ჩაუვარდებაო ეს ქალაქი ბაბილონის მეფის ლაშქარს ხელში და ისინი დაიპყრობენო მას.

⁴და უთხრეს მთავრებმა მეფეს: სიკვდილით უნდა დაისაჯოს ეს კაცი, რადგან ის ძალას აცლის ამ ქალაქში დარჩენილ მებრძოლთა და მთელი ერის მკლავებს ამგვარი ლაპარაკით, რადგან ეს კაცი მშვიდობას კი არ ეძებს ამ ხალხისათვის, არამედ უბედურებას.

⁵და თქვა მეფე ცედეკიამ: აჰა, თქვენს ხელთაა იგი, რადგან მეფე უძლურია თქვენს წინაშე.

⁶და წაიყვანეს იერემია და ჩააგდეს მალქია უფლისწულის დილეგში, რომელიც ყარაულთა ეზოში იყო, და საბელებით ჩაუშვეს იერემია ჭაში. ჭაში კი წყალი არ იყო, არამედ შლამი. და ჩაეფლო იერემია შლამში.

⁷გაიგო ყებედ-მელექმა, ქუშელმა საჭურისმა, რომელიც მეფის სასახლეში იყო, რომ დილეგში ჩააგდეს იერემია; მეფე კი ბენიამინის კარიბჭეში იჯდა.

⁸გამოვიდა ყებედ-მელექი მეფის სასახლიდან და ასე უთხრა მეფეს:

⁹მეფე-ბატონო, ამ კაცებმა დიდი ბოროტება ჩაიდინეს იერემია წინასწარმეტყველის წინაშე, რომელიც დილეგში ჩააგდეს. იქ ხომ შიმშილით მოკვდება, რადგან პური აღარაა ქალაქში.

¹⁰და უბრძანა მეფემ ქუშელ ყებედ-მელექს: წაიყოლე 30 კაცი აქედან და ამოიყვანე იერემია წინასწარმეტყველი დილეგიდან, ვიდრე არ მომკვდარა.

¹¹და წაიყვანა ყებედ-მელექმა ის კაცები და მივიდა მეფის სახლში, საგანძურის ქვეშ, მოკრიფა იქ ძონძები და ჩვრები და ჩააწოდა ისინი იერემიას დილეგში საბლებით.

¹²და უთხრა ქუშელმა ყებედ-მელექმა იერემიას: ამოიდე ძველი ძონძები და ჩვრები იღლიებში, საბელებს ქვეშ. და ასე გააკეთა იერემიამ.

¹³და ამოსწიეს იერემია საბელებით და ამოიყვანეს დილეგიდან; და დაჯდა იერემია ყარაულთა ეზოში.

¹⁴და კაცი გაგზავნა მეფე ცედეკიამ და მოაყვანინა იერემია წინასწარმეტყველი უფლის ტაძრის მესამე შესასვლელთან, და უთხრა მეფემ იერემიას: „ერთ რამეს გკითხავ და ნურაფერს დამიმალავ.“

¹⁵და უთხრა იერემიამ ცედეკიას: „რომ გითხრა, ხომ არ მომკლავ? და კიდევაც რომ გირჩიო რამე, მაინც არ მომისმენ.“

¹⁶და საიდუმლოდ შეჰფიცა მეფე ცედეკიამ იერემიას ასე: „უფალს ვფიცავ, რომელმაც შექმნა ჩვენი სული, რომ მე არ მოგკლავ და არც იმ კაცთა ხელთ გადაგცემ, ვინც შენს სულს ეძიებენ.“

¹⁷და უთხრა იერემიამ ცედეკიას: ასე ამბობს უფალი, ცაბაოთ ღმერთი, ღმერთი ისრაელისა: თუ ჩაბარდები ბაბილონის მეფის მთავრებს, მაშინ იცოცხლებს შენი სული და ეს ქალაქი არ დაიწვება ცეცხლით; და იცოცხლებთ შენცა და შენი სახლიც;

¹⁸მაგრამ თუ არ ჩაბარდები ბაბილონის მეფის მთავრებს, მაშინ ეს ქალაქი ქალდეველთა ხელში ჩავარდება და ცეცხლით დაბუგავენ მას, და შენ თავს ვეღარ დაიხსნი მათი ხელიდან.

¹⁹და უთხრა მეფე ცედეკიამ იერემიას: მეშინია იუდაელებისა, რომლებიც ქალდეველთ ჩაუვარდნენ ხელთ, რომ არ გადამცენ მე მათ ხელთ და არ შეურაცხმყონ.

²⁰და უთხრა იერემიამ: არ გადაგცემენ; ოღონდ უსმინე უფლის ხმას, როგორც მე გეუბნები, და უკეთესად წაგივა საქმე, და იცოცხლებსო შენი სული;

²¹ხოლო თუ არ ისურვებ გადასვლას, ეს არის სიტყვა, რომელიც მესმა უფლისაგან:

²²აჰა, ყველა ქალი, რომლებიც იუდას მეფის სახლში დარჩნენ, ბაბილონის მეფის სარდლებს მიჰგვრიან და იტყვიან ის ქალები: მოგატყუეს შენ და გძლიეს შენმა მეგობრებმა, ხოლო როდესაც ტალახში ჩაგეფლო ფეხები, მიგატოვეს და წავიდნენ.

²³და შენს ყველა ცოლს და შენს ძეთ ქალდეველებს მიჰგვრიან, და შენც თავს ვერ დააღწევ მათი ხელიდან, რადგან ბაბილონის მეფის ხელით იქნები დაჭერილი და იმას გააკეთებ, რომ ეს ქალაქი ცეცხლით გადაიბუგება.

²⁴და უთხრა ცედეკიამ იერემიას: არავინ უნდა გაიგოს ეს ამბავი და არ მოკვდები;

²⁵მაგრამ თუ მთავრები გაიგებენ, რომ მე გელაპარაკებოდი, და მოვლენ და გეტყვიან: რა უთხარიო მეფეს და რა გითხრაო მეფემ, ნუ დაგვიმალავ და არ მოგკლავთო,

²⁶უთხარი: მე ვევედრებოდი მეფეს, რომ არ დამაბრუნონ იონათანის სახლში, თორემ იქ მოვკვდები-მეთქი.

²⁷და მოვიდა ყველა მთავარი იერემიასთან და გამოკითხვა დაუწყეს, და მანაც აუწყა მათ ყოველივე ისე, როგორც მეფემ უბრძანა მას, და მათ შეწყვიტეს მასთან ლაპარაკი, რადგან ვერაფერი შეიტყვეს.

²⁸და იჯდა იერემია ყარაულთა ეზოში, ვიდრე იერუსალიმი დაეცემოდა. და იქვე დარჩა იერუსალიმის აღების შემდეგაც.