Read სბს–2013 იერემია 39 Bible Online

იერემია 39 - სბს–2013 bible

იერემია 39

¹იუდას მეფის, ცედეკიას, მეფობის მეცხრე წლის მეათე თვეს მოადგა ბაბილონის მეფე ნაბუქოდონოსორი და მთელი მისი ლაშქარი იერუსალიმს და ალყაში მოიქცია.

²ცედეკიას მეფობის მეთერთმეტე წელს, მეოთხე თვის მეცხრე დღეს, გატყდა ქალაქი.

³და შემოვიდა ბაბილონის მეფის ყველა მთავარი და დადგნენ შუა კარიბჭესთან: ნერგალ-სარეცერი, სამგარ-ნებო, სარსექიმი – საჭურისთუხუცესი, ნერგალ-სარეცერი – მოგვთა უხუცესი და ბაბილონის მეფის ყველა დანარჩენი მთავარი.

⁴და როდესაც იუდას მეფე ცედეკიამ და მისმა მეომრებმა დაინახეს ისინი, გაიქცნენ და ღამით გავიდნენ ქალაქიდან მეფის ბაღის გზით, კარიბჭეში, ორ კედელს შორის რომ არის, და დაადგნენ ყარაბას გზას.

⁵მაგრამ უკან დაედევნენ მათ ქალდეველთა მეომრები და ცედეკიას იერიხოს ველზე დაეწივნენ, შეიპყრეს და ბაბილონის მეფე ნაბუქოდონოსორს მიჰგვარეს რიბლაში, ხამათის ქვეყანაში, და მანაც განაჩენი გამოუტანა მას.

⁶რიბლაში თვალწინ დაუხოცა ბაბილონის მეფემ ცედეკიას ძენი; და ასევე იუდას ყველა წარჩინებულნიც დახოცა ბაბილონის მეფემ.

⁷ცედეკიას კი თვალები დასთხარა და ხუნდები დაადო ბაბილონში წასაყვანად.

⁸მეფის სასახლე და ხალხის სახლები ცეცხლს მისცეს ქალდეველებმა და იერუსალიმის კედლები დაანგრიეს.

⁹დანარჩენი ხალხი, ვინც ქალაქში გადარჩა, და ისინი, ვინც მის მხარეზე გადავიდნენ, და სხვა გაქცეულებიც, ბაბილონში გადაასახლა ნებუზარადანმა, ქონდაქართუხუცესმა.

¹⁰ღარიბი ხალხი, რომელთაც არაფერი გააჩნდათ, დატოვა ნებუზარადან ქონდაქართუხუცესმა, იუდეის ქვეყანაში და მალე დაურიგა ადგილ-მამულები.

¹¹იერემიაზე კი ასე უბრძანა ბაბილონის მეფე ნაბუქოდონოსორმა ნებუზარადანს, ქონდაქართუხუცესს:

¹²წაიყვანე იგი და თვალი გეჭიროს მასზე, ცუდი არაფერი უყო, არამედ, როგორც გეტყვის, ისე მოექეცი.

¹³ქონდაქართუხუცესმა ნებუზარადანმა და საჭურისთუხუცესმა ნებუშაზბანმა და მოგვთა უფროსმა ნერგალ-სარეცერმა და ბაბილონის მეფის ყველა მთავარმა,

¹⁴გაგზავნეს იერემიას წამოსაყვანად. წამოიყვანეს იერემია ყარაულთა ეზოდან და გადასცეს გედალიას, ახიკამის ძეს, შაფანის შვილიშვილს, რომ წაეყვანა იგი სახლში; და დარჩა იგი საცხოვრებლად თავის ხალხში.

¹⁵და იყო უფლის სიტყვა იერემიას მიმართ ყარაულთა ეზოში მისი პატიმრობისას:

¹⁶წადი და ასე უთხარი ქუშელ ყებედ-მელექს: ასე ამბობს-თქო ცაბაოთ უფალი, ისრაელის ღმერთი: მოვაწევ ამ ქალაქზე ჩემს სიტყვებს საუბედუროდ და არა სასიკეთოდ; დადგება დღე და ამს შენი თვალითა ნახავ.

¹⁷მაგრამ შენ გადაგარჩენ იმ დღეს, – ამბობს უფალი, – და არ ჩავარდები იმ ხალხის ხელთ, ვისიც გეშინია,

¹⁸რადგან მე გიხსნი შენ. შენ არ დაეცემი მახვილით, და ნადავლად გექნება შენი სული, რადგან შენ ჩემით სასოობდი, – ამბობს უფალი.