Read სბს–2013 იერემია 40 Bible Online

იერემია 40 - სბს–2013 bible

იერემია 40

¹სიტყვა, რომელიც იყო იერემიას მიმართ უფლისაგან მას შემდეგ, რაც ნებუზარადან ქონდაქართუხუცესმა, გაათავისუფლა იგი რამადან; როცა გამოიყვანა, ბორკილებდადებული იყო იგი დატყვევებულ სხვა იერუსალიმელებსა და იუდაელებს შორის, რომლებიც ბაბილონში უნდა გადაესახლებინათ.

²და გამოიყვანა ქონდაქართუხუცესმა იერემია და უთხრა მას: უფალმა, შენმა ღმერთმა, წარმოთქვა ის უბედურება, რაც აქაურობას მოელოდა.

³და მოაწია და შეასრულა უფალმა, რაც თქვა; რადგან შესცოდეთ თქვენ უფლის წინაშე და არ შეისმინეთ მისი ხმა, და ამიტომაც ჩაცვივდით ამ დღეში.

⁴და ახლა, აჰა, დღეს გათავისუფლებ ბორკილებისგან, ხელებზე რომ გადევს; თუ მოინდომებ ჩემთან წამოსვლას ბაბილონში, წამოდი, და მე ვიზრუნებ შენზე. და, თუ არ გსურს ჩემთან წამოსვლა ბაბილონში, დარჩი. აჰა, მთელი ქვეყანა შენს წინაშეა, სადაც გერჩიოს და სწორად მიგაჩნდეს შენი წასვლა, იქ წადი.

⁵წასვლის წინ კი ნებუზარადანმა უთხრა: ან დაბრუნდი გედალიასთან, შაფანის ძის ახიკამის ძესთან, რომელსაც ბაბილონის მეფემ იუდას ქალაქები ჩააბარა, და იქ იცხოვრე შენს ხალხში, ან სადაც სწორად მიგაჩნდეს შენი წასვლა, იქ წადი. და მისცა მას ქონდაქართუხუცესმა საგზალი და საჩუქარი და გაისტუმრა.

⁶მივიდა იერემია გედალიასთან, ახიკამის ძესთან, მიცფაში და ცხოვრობდა მასთან ერთად ქვეყანაში დარჩენილ ხალხში.

⁷და როდესაც გაიგეს ველზე დარჩენილმა ჯარების მხედართმთავრებმა და მათმა კაცებმა, რომ ბაბილონის მეფეს გედალია ახიკამის ძისთვის ჩაუბარებიაო ქვეყანა და ხალხი კაციან ქალიანად და პატარა ბავშვები, და აგრეთვე ქვეყნის ღარიბები, ვინც ტყვედ არ წაიყვანეს ბაბილონში,

⁸მივიდნენ გედალიასთან მიცფაში: იშმაყელ ნეთანიას ძე, იოხანანი და იონათანი, კარეახის ძენი, სერაია თანხუმეთის ძე, ნეტოფათელი ეფაის ძენი და იეზანია მაყაქათელის ძე და მათი კაცები.

⁹და ასე ეფიცებოდა გედალია, ახიკამ შაფანის ძის ძე, მათ და მათ კაცებს: ნუ შეგაშინებთ ქალდეველთა სამსახური, დასახლდით ქვეყანაში და დაემორჩილეთ ბაბილონის მეფეს; უკეთესი იქნებაო თქვენთვის.

¹⁰ხოლო მე დავრჩები მიცფაში, რომ ვიდგე ქალდეველთა წინაშე, როცა ჩვენთან მოვლენ; თქვენ კი შეაგროვეთ ღვინო და საზაფხულო ხილი და ზეთი, და შეინახეთ თქვენს ჭურჭლებში; და იცხოვრეთ თქვენს ქალაქებში, რომლებიც გიჭირავთ.

¹¹ასევე ყველა იუდაელმა, რომლებიც მოაბის მიწაზე იყვნენ და ყამონიანებში და ედომში და ყველა სხვა ქვეყანაში, გაიგეს, რომ ბაბილონის მეფემ დატოვა იუდაელთა ნაწილი და რომ გედალია, ძე ახიკამისა, ძისა შაფანისა, დაუნიშნაო განმგებლად.

¹²და დაბრუნდა ყველა იუდაელი იმ ქვეყნებიდან, სადაც გაძევებულნი იყვნენ, და მივიდნენ იუდეის ქვეყანაში გედალიასთან, მიცფაში, და შეაგროვეს ძალზე ბევრი ღვინო და საზაფხულო ხილი.

¹³და იოხანან კარეახის ძე და ყველა მხედართმთავარი, რომლებიც ველზე იყვნენ, მივიდნენ გედალიასთან მიცფაში

¹⁴და უთხრეს: იცი შენ, რომ ბაყალისმა, ყამონიანთა მეფემ, გამოაგზავნა შენს მოსაკლავად იშმაყელ ნეთანიას ძე? მაგრამ არ დაუჯერა მათ გედალიამ, ახიკამის ძემ.

¹⁵და იოხანან კარეახის ძემ, საიდუმლოდ ასე უთხრა გედალიას მიცფაში: გამიშვი და მოვკლავ იშმაყელს, ნეთანიას ძეს, და კაციშვილი ვერ გაიგებს; რატომ უნდა მოგისწრაფოს სიცოცხლე და დაიფანტოს შენთან შეკრებილი ყველა იუდაელი, და დაიღუპოს იუდეის ნატამალი?

¹⁶და უთხრა გედალიამ, ახიკამის ძემ, იოხანანს, კარეახის ძეს: „ნუ იქმ ამ საქმეს, რადგან სიცრუეს ლაპარაკობ იშმაყელზე.“