Read სბს–2013 იერემია 42 Bible Online

იერემია 42 - სბს–2013 bible

იერემია 42

¹ამის შემდეგ მივიდა ყველა მხედართმთავარი და იოხანან კარეახის ძე და აზარია ჰოშაყიას ძე, და მათთან ერთად მთელი ხალხი დიდიან-პატარიანად,

²და უთხრეს იერემია წინასწარმეტყველს: შეისმინე ჩვენი ხვეწნა და შეევედრე უფალს, შენს ღმერთს, ჩვენთვის, მთელი ამ დარჩენილი ხალხისთვის, რადგან, როგორც შენი თვალით ხედავ, მრავალთაგან მცირედნიღა დავრჩით.

³გვაჩვენოს უფალმა, შენმა ღმერთმა, რა გზით ვიაროთ და რა გავაკეთოთ.

⁴და უთხრა მათ იერემია წინასწარმეტყველმა: მესმის, და შევევედრები უფალს, თქვენს ღმერთს, თქვენი სიტყვისამებრ, და ყველაფერს, რასაც უფალი მიპასუხებს, გეტყვით, არაფერს დაგიმალავთ.

⁵და მათ უთხრეს იერემიას: უფალი იყოს ჩვენს წინააღმდეგ ჭეშმარიტი და მტკიცე მოწმე, თუ არ შევასრულებთ ყოველივე იმას, რასაც უფალი, შენი ღმერთი, იტყვის ჩვენს გასაკეთებლად;

⁶კარგი იქნება თუ ცუდი, მოვუსმენთ უფლის, ჩვენი ღმერთის ხმას, რომელთანაც გაგზავნით, რათა სიკეთე გვეწიოს, როდესაც მოვუსმენთ უფლის, ჩვენი ღმერთის, ხმას.

⁷და ათმა დღემ რომ გაიარა, უფლის სიტყვა იყო იერემიას მიმართ.

⁸და მოიხმო იოხანან კარეახის ძე და ყველა მხედართმთავარი, რომლებიც მასთან იყვნენ, და მთელი ერი დიდიან-პატარიანად.

⁹და უთხრა მათ: ასე ამბობს უფალი, ისრაელის ღმერთი, რომელთანაც გამაგზავნეთ მე, რომ წარმედგინა მის წინაშე თქვენი მუდარა:

¹⁰თუ დასახლდებით ამ ქვეყანაში, მაშინ მე აგაშენებთ თქვენ და არ დაგანგრევთ, დაგნერგავთ და არ აღმოგფხვრით, რადგან ვნანობ მე იმ უბედურების გამო, რომელიც თქვენზე მოვაწიე.

¹¹ნუ შეგეშინდებათ ბაბილონის მეფისა, რომლისაც გეშინიათ, ნუ შეგეშინდებათ მისი, – ამბობს უფალი, – რადგან მე თქვენთანა ვარ, რათა დაგიფაროთ და გიხსნათ მისი ხელიდან.

¹²მე წყალობას მოგფენთ და ის შეგიწყალებთ თქვენ და დაგაბრუნებთ თქვენს მიწაზე.

¹³მაგრამ თუ იტყვით: არ გვინდაო ამ ქვეყანაში დარჩენა! და არ მოუსმენთ უფლის, თქვენი ღმერთის, ხმას,

¹⁴და იტყვით: წავალთო ეგვიპტის ქვეყანაში, სადაც არ ვიხილავთო არც ომსა და არც ბუკისცემის ხმას გავიგონებთ და არც ვიშიმშილებთ, და იქ ვიცხოვრებთო,

¹⁵მაშ ისმინე უფლის სიტყვა, იუდეის ნატამალო! ასე ამბობს ცაბაოთ უფალი, ისრაელის ღმერთი: თუ თქვენ პირს იზამთ ეგვიპტისკენ წასასვლელად და მიხვალთ იქ საცხოვრებლად,

¹⁶მაშინ მახვილი, რომლისაც გეშინიათ, ეგვიპტის ქვეყანაშიც მოგწვდებათ და შიმშილი, რომელიც გაწუხებთ, დაგედევნებათ და იქ დაიხოცებით.

¹⁷და ყოველი კაცი, რომელიც პირს მიიქცევს ეგვიპტეში წასასვლელად და იქ დარჩენას გადაწყვეტს, მახვილით, შიმშილითა და შავი ჭირით მოკვდება, და ვერავინ გადაურჩება იმ უბედურებას, რასაც მე მოვაწევ მათ.

¹⁸რადგან ასე ამბობს ცაბაოთ უფალი, ისრაელის ღმერთი: როგორც ჩემი რისხვა და მძვინვარება გადმოინთხა იერუსალიმის მკვიდრებზე, ისე გადმოინთხევა ჩემი მძვინვარება თქვენზე, ეგვიპტეში რომ ჩახვალთ. და იქნებით იქ საწყევარი, საშინელება, საგინებელი და შესარცხვენელი, და მეტად ვეღარ იხილავთ ამ ადგილს.

¹⁹თქვენზე წარმოთქვა უფალმა, იუდეის ნატამალო: ნუ წახვალთ ეგვიპტეში, იცოდეთ, მე თქვენ გამიფრთხილებიხართ დღეს!

²⁰რადგან თქვენ თვითონ შესცოდეთ თქვენს წინაშე! თქვენ გამაგზავნეთ უფალთან, თქვენს ღმერთთან, და მითხარით: შეევედრეო ჩვენზე უფალს, ჩვენს ღმერთს, და ყოველივეს, რასაც უფალი, ჩვენი ღმერთი, იტყვის, გავაკეთებთო.

²¹მე გამოგიცხადეთ დღეს თქვენ, მაგრამ თქვენ არ მოუსმინეთ უფლის, თქვენი ღმერთის ხმას და ყოველივე იმას, რითაც მან გამომაგზავნა თქვენთან.

²²ახლა იცოდეთ, რომ მახვილით, შიმშილითა და შავი ჭირით დაიხოცებით იმ ადგილას, სადაც თქვენ საცხოვრებლად გინდათ წასვლა.