Read სბს–2013 იერემია 43 Bible Online

იერემია 43 - სბს–2013 bible

იერემია 43

¹და იყო, როდესაც იერემიამ დაასრულა ხალხისათვის მათი ღმერთის სიტყვების გადაცემა, ყველა იმ სიტყვისა, რომლითაც უფალმა, მათმა ღმერთმა, მიავლინა მათთან,

²მაშინ ყაზარია ჰოშაყიას ძემ და იოხანან კარეახის ძემ, და აგრეთვე ყველა ბოროტგანმზრახველმა კაცმა უთხრეს იერემიას: ტყუილს ამბობ; უფალს, ჩვენს ღმერთს, არ მოუვლინებიხარ ამის სათქმელად: არ წახვიდეთ ეგვიპტეში იქ საცხოვრებლადო!

³ბარუქ ნერიას ძე გაქეზებს ჩვენს წინააღმდეგ, რომ ქალდეველთა ხელში ჩაგვყაროს და გაგვჟლიტონ მათ, ან რომ ტყვედ წაგვასხან ბაბილონში.

⁴არ ისმინეს იოხანან კარეახის ძემ და ლაშქრის მეთაურებმა და მთელმა ხალხმა უფლის ხმა, რომ დარჩენილიყვნენ იუდეის ქვეყანაში.

⁵და წაიყვანეს იოხანან კარეახის ძემ და ლაშქრის მეთაურებმა იუდაელთა მთელი ნატამალი, რომელიც იუდეის ქვეყანაში დაბრუნდა სხვადასხვა ქვეყნებიდან, სადაც გაფანტულნი იყვნენ ისინი,

⁶კაცები, ქალები და ბავშვები, მეფის ასულები და ყველა, ვინც ნებუზარადან ქონდაქართუხუცესმა დატოვა გედალიასთან, შაფანის ძის, ახიკამის ძესთან; და მათთან ერთად იერემია წინასწარმეტყველი და ბარუქ ნერიას ძეც.

⁷და წავიდნენ ეგვიპტის ქვეყანაში, რადგან არ ისმინეს უფლის ხმა, და მივიდნენ თახფანხესამდე.

⁸და იყო უფლის სიტყვა იერემიას მიმართ თახფანხესში ასე:

⁹აიღე დიდი ქვები და დამალე ისინი მოზელილ თიხაში იმ ადგილას, სადაც აგურს ჭრიან, ფარაონის სახლის შესასვლელთან, თახფანხესში, ისე, რომ იუდაელებმა დაინახონ.

¹⁰და უთხარი მათ: ასე ამბობს ცაბაოთ უფალი, ისრაელის ღმერთი: აჰა, მე ვაგზავნი კაცებს ჩემი მსახურის, ბაბილონის მეფის, ნაბუქოდონოსორის მოსაყვანად, და დავდგამ მის ტახტს ამ ქვებზე, რომლებიც დავმალე, და გადაჭიმავს მათზე თავის სამეფო კარვის ჩარდახს.

¹¹მოვა ის და ააოხრებს ეგვიპტის ქვეყანას: ვინც სასიკვდილოა, მოკვდება, ვინც ტყვედ წასაყვანია, ტყვედ იქნება წაყვანილი, და ვინც მახვილისათვის არის, მახვილით დაეცემა.

¹²და ცეცხლს წავუკიდებ ეგვიპტის ღმერთების სახლებს და ის დაწვავს მათ ან დაატყვევებს მათ კერპებს, და შეიფუთნება ეგვიპტის ქვეყნის ნადავლით, როგორც მწყემსი იფუთნება თავისი ტყაპუჭით; და გამოვა იქიდან მშვიდობით,

¹³და დალეწავს ბეთ-შემეშის სვეტებს, რომლებიც ეგვიპტის ქვეყანაშია, და ეგვიპტის ღმერთების ტაძრებს ცეცხლში დაწვავს.