Read სბს–2013 იერემია 46 Bible Online

იერემია 46 - სბს–2013 bible

იერემია 46

¹უფლის სიტყვა, რომელიც იყო წინასწარმეტყველ იერემიასადმი ნათქვამი ხალხებზე.

²ეგვიპტეზე და ეგვიპტის მეფის, ფარაონ ნექოს, ლაშქარზე, რომელიც მდინარე ევფრატზე ქარქემიშში დაამარცხა ბაბილონის მეფე ნაბუქოდონოსორმა იუდეის მეფის, იეჰოიაკიმ იოშიას ძის, მეფობის მეოთხე წელს.

³მოამზადეთ ფარ-შუბები და წადით საომრად.

⁴შეკაზმეთ ცხენები და ამხედრდით, მხედრებო, და გამოეწყვეთ მუზარადებში, გალესეთ შუბები და ჩაიცვით ჯაჭვ-ჯავშანი.

⁵ეს რასა ვხედავ! ნუთუ იძლივნენ და უკან იხევენ? მათი მამაცნი კი შეიმუსრნენ და გარბიან უკანმოუხედავად? საშინელებაა ირგვლივ, – ამბობს უფალი.

⁶ვერც ფეხმარდი გაიქცევა, ვერც მამაცი დააღწევს თავს; ჩრდილოეთით, მდინარე ევფრატთან, წაიბორძიკებენ და დაეცემიან ისინი.

⁷ვინაა ეს ნილოსივით რომ ადიდებულა, ღვარცოფივით რომ მოჰქუხს?

⁸ეგვიპტე ნილოსივით ადიდებულა და ღვარცოფივით მოჰქუხს. და ამბობს ის: მე გადმოვხეთქავ ნაპირებს და წავლეკავ ქვეყანას, დავღუპავ ქალაქებსა და იქ მცხოვრებთ.

⁹გაჭენდით ცხენებო და გაქროლდით ეტლებო! და გამოდით, მამაცო ფარისმტვირთველო ქუშელნო და ფუტელნო, ლუდელნო, მოისარნო და მშვილდის მომჭიმელნო!

¹⁰რადგან ეს დღე არის ცაბაოთ უფლის, ჩვენი ღმერთის, შურისგების დღე, რათა შური იძიოს თავის მტრებზე; და მახვილი შეჭამს და გაძღება მათი სისხლით; რადგან ეს იქნება უფლის მსხვერპლშეწირვა ჩრდილოეთის ქვეყანაში, ევფრატის პირას.

¹¹ადი გალაადზე და აიღე ბალზამი, ქალწულო, ეგვიპტის ასულო; ამაოდ ახვავებ წამლებს, აღარაფერი გეშველება.

¹²გაიგონეს ხალხებმა შენი შერცხვენა და შენმა კივილმა აავსო ქვეყანა, როცა მამაცი მამაცს შეეჯახა და ორივენი ერთად დაეცნენ.

¹³სიტყვა, რომელიც უფალმა უთხრა იერემია წინასწარმეტყველს ეგვიპტის ქვეყნის დასამხობად ბაბილონის მეფე ნაბუქოდონოსორის მოსვლაზე:

¹⁴აუწყეთ ეგვიპტეში და ასმინეთ მიგდოლში, გააგონეთ ნოფში და თახფანხესში, და თქვით: წამოდექი და მოემზადე, რადგან მახვილი შეჭამს შენს ირგვლივ ყველაფერს.

¹⁵რატომ დაეცა შენი მამაცი? ვერ გაუძლო, რადგან უფალმა უკუაქცია.

¹⁶მან გაამრავლა დაცემულნი, ერთმანეთზე ეცემოდნენ და ამბობდნენ: ადექით და დავუბრუნდეთ ჩვენს ხალხს და ჩვენს სამშობლო ქვეყანას, გავერიდოთ ბასრ მახვილს.

¹⁷და გაჰყვირიან იქ: ფარაონი, ეგვიპტის მეფე, გახელდა; მას გამოეპარა დათქმული ჟამი.

¹⁸ისე მე ვიცოცხლო, – ამბობს მეფე, – რომლის სახელია ცაბაოთ უფალი; რადგან, როგორც თაბორი დგას მთებს შორის და როგორც ქარმელია ზღვასთან, ისე ვიცი, რომ მოვა ის.

¹⁹გადასახლებულის ბარგი დაიმზადე, ეგვიპტის ასულის მკვიდრო, რადგან ნოფი აოხრდება და გაჩანაგდება, კაცის ჭაჭანება არ დარჩება იქ.

²⁰ჩრდილოეთიდან მტერი დაეცემა მშვენიერ ეგვიპტეს, ვით კრაზანა დეკეულს.

²¹მისი დაქირავებული ჯარიც, ნასუქალი ხბორებივით რომ იყვნენ, ვერ დადგა, უკუიქცა და გაიქცა, რადგან მათი დაღუპვის დღე მოვიდა, ჟამი მათი დასჯისა.

²²მისი ხმა გველის სისინის მსგავსი იქნება, რადგან ლაშქრით დადიან და ცულებით მოადგნენ, ხის მჭრელებივით.

²³გაჩეხავენ მის ტყეს, – ამბობს უფალი, – რადგან გაუვალია ის; რადგან კალიაზე მეტად გამრავლდნენ, სათვალავი არა აქვთ.

²⁴შერცხვენილია ეგვიპტის ასული, ჩრდილოელთ ჩაუვარდა ხელში.

²⁵და ამბობს ცაბაოთ უფალი, ისრაელის ღმერთი: აჰა, მე დავსჯი ამონს თებეში, და ფარაონს და ეგვიპტეს და მის ღმერთებს და მის მეფეებს, ფარაონს და მასზე მინდობილთ!

²⁶და გადავცემ მათ მათი სულის მაძიებელთა ხელთ, და ბაბილონის მეფის, ნაბუქოდონოსორის, ხელთ, და მის მსახურთა ხელთ და ამის შემდეგ დასახლდება ის, როგორც პირვანდელ დღეებში. – ამბობს უფალი.

²⁷შენ კი ნუ გეშინია, ჩემო მსახურო იაკობ, და ნუ დაფრთხები, ისრაელ, რადგან მე გიხსნი შენ შორიდან და შენს მოდგმას მისი ტყვეობის ქვეყნიდან. დაბრუნდება იაკობი და იცხოვრებს წყნარად და მშვიდად, და არ ეყოლება შემშინებელი.

²⁸ნუ გეშინია, ჩემო მსახურო იაკობ, – ამბობს უფალი, – რადგან მე შენთანა ვარ. მე მოვსპობ ყველა ხალხს, რომლებთანაც გაგაძევე, შენ კი არ მოგსპობ, მხოლოდ მოგარჯულებ სამართლისამებრ, მაგრამ დაუსჯელიც არ დამრჩები.