Read სბს–2013 იერემია 47 Bible Online

იერემია 47 - სბს–2013 bible

იერემია 47

¹უფლის სიტყვა, რომელიც იყო წინასწარმეტყველ იერემიას მიმართ თქმული ფილისტიმელებზე, ვიდრე ფარაონი ღაზას დაამარცხებდა.

²ასე ამბობს უფალი: აჰა, წყლები მოდიდდებიან ჩრდილოეთიდან და წამლეკავ ღვართქაფებად გადაიქცევიან, და წალეკავენ ქვეყანას და ყოველივეს, რაც მასზეა, ქალაქებსა და მის მცხოვრებთ; აკივლდებიან ადამიანები და იქვითინებს ქვეყნის ყოველი მცხოვრები.

³მისი აქაფებული რაშების თქარათქურის, მისი ეტლების გრიალის, მისი ბორბლების გრუხუნის გამო მამები ვეღარ მიუბრუნდებიან შვილებს ასაყვანად, რადგან მკლავები ჩამოსწყდებათ,

⁴მომავალი დღის გამო, როდესაც დასცემენ ყველა ფილისტიმელს, რათა მოუსპონ ცორს და ციდონს ყველა გადარჩენილი შემწე, რადგან დაამხობს უფალი ფილისტიმელთა ნატამალს, ქაფთორის კუნძულზე რომ გადარჩა.

⁵მწუხარებამ მოიცვა ღაზა და თავებს იხოტრავენ ღაზელნი, იღუპება აშკელონი და ყენაკელთა ნატამალი. როდემდე უნდა იკაწრავდე ფრჩხილებით თავს?

⁶ო, უფლის მახვილო, როდემდე უნდა ჰკვეთდე, ჩაეგე შენს ქარქაშში, დასცხერ და დადუმდი!

⁷მაგრამ როგორ გინდა დასცხრე როდესაც უფალმა მიუშვა იგი აშკელონისა და ზღვისპირეთის წინააღმდეგ, იქ განაწესა თავისი მახვილი.