Read სბს–2013 იერემია 6 Bible Online

იერემია 6 - სბს–2013 bible

იერემია 6

¹გაიქეცით, ბენიამინის ძენო, იერუსალიმიდან, და თეკოაყში ჰკარით ბუკს, ბეთ-ჰაქერემს კოცონით ანიშნეთ, რადგან უბედურება და დიდი დაღუპვა მოდის ჩრდილოეთიდან.

²შევადრი სიონის ასულს მშვენიერ საძოვარს.

³მწყემსები მოვლენ მასთან და მორეკავენ ფარებს, გაშლიან მის ირგვლივ კარვებს და თითოეული თავის საძოვარზე დამწყესავს.

⁴მოემზადეთ მასთან საომრად; ადექით და ავიდეთ შუადღისას. ვაი ჩვენ, რადგან მიილია დღე, წაგრძელდა საღამოს ჩრდილები.

⁵ადექით და ავიდეთ ღამით და გავანადგუროთ მისი დარბაზები!

⁶რადგან ასე ამბობს ცაბაოთ უფალი: გაჩეხეთ მისი ხეები და გააკეთეთ იერუსალიმის წინ მიწაყრილი, ეს ქალაქი უნდა დაისაჯოს – ძალადობით სავსეა იგი.

⁷როგორც წყაროს ნაკადი ამოხეთქავს წყალს, ისე ამოანთხევს ის თავის ბოროტებას, ძარცვისა და ძალადობის ხმა ისმის იქ, ჩემს წინაშე მუდამ სნეულებაა და ჭრილობები.

⁸გონთ მოდი, იერუსალიმ, რომ არ განგიდგეს ჩემი სული, უდაბურ და უკაცრიელ ქვეყნად რომ არ გაქციო.

⁹ასე ამბობს ცაბაოთ უფალი: ვენახივით მოიმცვრევენ ისრაელის ნარჩენს; გაიწოდე ხელი ვაზისაკენ, როგორც ყურძნის მკრეფავი იწვდის გოდრისაკენ.

¹⁰ვის ველაპარაკო? ვინ გავაფრთხილო, რომ მოისმინოს? აჰა, წინადაუცვეთელია მათი ყური და არ შეუძლია გაგონება. აჰა, უფლის სიტყვა სამასხროდ ჰქონდათ მათ, არ სიამოვნებდათ.

¹¹სავსე ვარ უფლის რისხვით, ვეღარ ვიტევ! გადმოანთხიე იგი ქუჩაში ყმაწვილებზე და ერთად თავშეყრილ ჭაბუკებზე, რადგან ქმარსაც ცოლთან ერთად შეიპყრობენ და ჭარმაგს – ხანდაზმულთან ერთად.

¹²და მათი სახლები სხვებს დარჩებათ, ასევე მათი ცოლები და ყანები, რადგან მე ხელს გავიწვდი ამ ქვეყნის მცხოვრებლებზე, – ამბობს უფალი.

¹³რადგან დიდიან-პატარიანად ყველა ანგარებით არის შეპყრობილი და წინასწარმეტყველიდან მღვდლამდე ყველა სიცრუის მოქმედია.

¹⁴ჩემი ხალხის ჭრილობებს კი ზერელედ კურნავენ, რომ ამბობენ: მშვიდობაა! მშვიდობააო! მაგრამ არ არის მშვიდობა.

¹⁵რცხვენიათ კი მათ, როცა სისაძაგლეს აკეთებენ? სრულიადაც არა და არც წითლდებიან, ამიტომ დაეცემიან ისინი დაცემულთა შორის. წაიფორხილებენ, როცა დავსჯი მათ, – ამბობს უფალი.

¹⁶ასე ამბობს უფალი: შეჩერდით გზებზე და მიმოიხედეთ, და იკითხეთ ძველი ბილიკები, რომელი გზაა უკეთესი, და იარეთ მასზე და შვებას მოუპოვებთ თქვენს სულებს. მაგრამ მათ თქვეს: არ ვივლითო.

¹⁷მცველები დავუყენე მე მათ და ვუთხარი: ყური დაუგდეთ-მეთქი ბუკის ხმას! მაგრამ მათ თქვეს: არ მოვუსმენთო.

¹⁸ამიტომ ისმინეთ, ხალხებო, და იცოდე, საზოგადოებავ, რაც მოუვა მათ.

¹⁹ისმინე, დედამიწავ: აჰა, მე მომაქვს უბედურება ამ ხალხებისთვის, ნაყოფი მათი ზრახვებისა, რადგან ჩემს სიტყვებს არ მოუსმინეს და ჩემი რჯული მოიძულეს.

²⁰რად მინდა მე გუნდრუკი, შებადან რომ მოაქვთ, და სურნელოვანი ლერწამი შორეული ქვეყნიდან? თქვენი სრულადდასაწველი მიუღებელია ჩემთვის და თქვენი მსხვერპლები უამური.

²¹ამიტომაც ასე ამბობს უფალი: აჰა, მე ამ ხალხს ფეხწამოსაკრავებს ვუწყობ წინ და დაბრკოლდებიან მათზე მამები და შვილები ერთად, მეზობელი და მისი მოყვასი, ფეხს წამოჰკრავენ და დაიღუპებიან.

²²ასე ამბობს უფალი: აჰა, ხალხი მოდის ჩრდილოეთის ქვეყნიდან და დიდი ერი აღიძვრის ქვეყნის კიდეებიდან.

²³მშვილდი და შუბი უჭირავთ მათ; სასტიკნი არიან და დაუნდობელნი, მათი ხმა აბობოქრებული ზღვასავითაა; ცხენებზე ამხედრებული მოდიან; როგორც ერთი, ყველა მზადაა შენთან საომრად, სიონის ასულო.

²⁴მათი ამბავი მოგვესმა და მკლავები ჩამოგვცვივდა, ტანჯვებმა შეგვიპყრეს, როგორც ქალი მშობიარობის ტკივილებმა.

²⁵ველად ნუ გახვალთ და გზას ნუ დაადგებით, რადგან მტრის მახვილს საშინელება მოაქვს ყოველი მხრიდან.

²⁶ჩემი ერის ასულო, შემოირტყი ძაძა და ნაცარი გადაიყარე თავზე; იგლოვე, თითქოს დედისერთა მოგკვდომოდეს, მწარედ ატირდი, რადგან უეცრივ დაგვეცემა შემმუსვრელი.

²⁷გამომკვლევად განგაწესე ჩემს ერში, რათა გცოდნოდა მათი გზები და გამოგეკვლია.

²⁸ყველანი ჯიუტი განდგომილნი არიან, ცილისწამებით მცხოვრებნი; ბრინჯაო და რკინა, ყველა წარწყმედილია.

²⁹ქშინავს საბერველი, ტყვია ჩაიკარგა ცეცხლში; ამაოდ ადნობდა მქანდაკებელი, რადგან მათი უკეთურება არ დადნა.

³⁰გამოუხურვებელ ვერცხლს დაარქმევენ მათ, რადგან უფალმა უარყო ისინი.