Read სბს–2013 გოდება იერემიასი 5 Bible Online

გოდება იერემიასი 5 - სბს–2013 bible

გოდება იერემიასი 5

¹გაიხსენე, უფალო, რა დაგვემართა ჩვენ, გადმოიხედე და იხილე როგორ გვათრევენ და გვაგინებენ.

²ჩვენი სამკვიდრო უცხოებს დარჩათ, ჩვენი სახლები – გადამთიელებს.

³დავობლდით, უმამოდ დავრჩით; ჩვენი დედები ქვრივებად სხედან.

⁴ჩვენსავე წყალს ვერცხლის ფასადა ვსვამთ; ჩვენი ტყის შეშაც სასყიდელი გაგვიხდა.

⁵ქედზე უღელდადგმულებს გვერეკებიან; ქანცი გაგვწყდა და შვება არსაიდანაა.

⁶ეგვიპტისკენ ხელს ვიწვდით კავშირის შესაკვრელად; აშურისკენ – პურით გასაძღომად.

⁷ჩვენმა მამებმა შესცოდეს, ისინი ახლა ცოცხლები აღარ არიან და ჩვენ უნდა ვზიდოთ მათი ცოდვის ტვირთი.

⁸მონები გაგვიბატონდნენ და არავინ არის, რომ მათი ხელიდან დაგვიხსნას.

⁹მახვილის საფრთხის ფასად ვშოულობთ პურს უდაბნოში.

¹⁰თონესავით გვიხურს კანი შიმშილის ცხელებით.

¹¹გააუპატიურეს ჩვენი ქალები სიონში და ქალწულები – იუდეის ქალაქებში.

¹²მთავრები ჩამოახრჩვეს და უხუცესებს პატივი აჰყარეს.

¹³ჭაბუკებს დოლაბებს ატრიალებინებენ და ყმაწვილებს შეშის ზიდვით სულს ხდიან.

¹⁴მოხუცები კარიბჭესთან აღარ სხედან და ჭაბუკებმა შეწყვიტეს სიმღერა.

¹⁵შეწყდა მხიარულება ჩვენი გულისა, გლოვად იქცა ჩვენი ფერხულები.

¹⁶გვირგვინები მოგვეხადა თავზე, ვაი ჩვენ, რომ შევცოდეთ!

¹⁷ამიტომაც წუხს ჩვენი გული, ამიტომაც დაგვიბნელდა თვალები,

¹⁸რომ აოხრდა სიონის მთა და მელები დაშლიგინებენ იქ.

¹⁹შენ კი საუკუნოდ მყოფობ უფალო, შენი ტახტი – თაობიდან თაობამდე.

²⁰რატომ დაგვივიწყე სამუდამოდ, რატომ დაგვტოვე ასე დიდხანს?

²¹მოგვაქციე, უფალო, შენსკენ და ჩვენც მოვბრუნდებით; განაახლე ჩვენი დღეები, როგორც უწინ იყო!

²²ნუთუ საბოლოოდ მოგვიძულე და მეტისმეტად მრისხანებ ჩვენზე?