Read სბს–2013 ეზეკიელი 10 Bible Online

ეზეკიელი 10 - სბს–2013 bible

ეზეკიელი 10

¹და ვიხილე, აჰა, ცის თაღზე, ქერუბიმების თავს ზემოთ, რაღაც ლოდი საფირონისა – მსგავსი ტახტისა, მათ მაღლა.

²და ეუბნებოდა იმ სელით შემოსილ კაცს: შემოდი ბორბლებს შუა, ქერუბიმების ქვეშ, და მუჭები გაივსე ნაკვერჩხლებით, ქერუბიმებს შორის რომ არის, და ქალაქს გადააყარე. და შევიდა იგი ჩემს თვალწინ.

³ქერუბიმები იდგნენ უფლის ტაძრის მარჯვენა მხარეს, როცა ის კაცი შედიოდა, და ღრუბელმა გაავსო შიდა ეზო.

⁴და აიწია უფლის დიდება ქერუბიმიდან ტაძრის ზღურბლისაკენ და გაივსო ტაძარი ღრუბლით და გაივსო ტაძრის ეზო უფლის დიდების ნათლით.

⁵ქერუბიმების ფრთების შრიალის ხმა გარეთა ეზომდე ისმოდა, როგორც ხმა ყოვლადძლიერი ღმერთისა, როდესაც ის ლაპარაკობს.

⁶და როდესაც მან უბრძანა სელით შემოსილ კაცს: „აიღე ცეცხლი ბორბლებს შორის, ქერუბიმებს შორის“ და შევიდა ის და დადგა ბორბლებთან,

⁷გაიწოდა ერთმა ქერუბიმმა ხელი ცეცხლისაკენ, რომელიც ქერუბიმებს შორის ენთო, აიღო იქიდან და მუჭაში ჩაუდო სელით შემოსილ კაცს. და მანაც აიღო და გავიდა.

⁸და მოუჩანდათ ქერუბიმებს ადამიანის ხელის მსგავსი რამ ფრთებქვეშ.

⁹და დავინახე ოთხი ბორბალი ქერუბიმებთან: თითო ბორბალი თითო ქერუბიმთან და ის ბორბლები თითქოს ქრიზოლითისგან იყო ნაჭედი.

¹⁰და ოთხივე ბორბალი ერთმანეთს ისე ჰგავდა, თითქოს ბორბალი ბორბალში ჩაუსვამთო.

¹¹სვლისას ოთხივე მხარეს მიდიოდნენ; სვლისას არ ბრუნავდნენ, რადგან იმ მიმართულებით მიდიოდნენ, საითკენაც თავი ჰქონდათ მიქცეული.

¹²სვლისას არ ბრუნავდნენ. და მთელი მათი ტანი, მათი ზურგი, მათი ხელები, მათი ფრთები და მათი ბორბლები ირგვლივ სავსე იყო თვალებით, ოთხივე მათგანის ბორბალი.

¹³და როგორც ჩემი ყურით გავიგონე, გრიგალი ერქვა მათ.

¹⁴და თითოეულს ოთხი სახე ჰქონდა: ერთი სახე – ქერუბიმის, მეორე – ადამიანის, მესამე – ლომის და მეოთხე – ორბის.

¹⁵და აღიმართნენ ქერუბიმები, ეს ის ცოცხალი არსებები იყვნენ, რომლებიც ვიხილე მდინარე ქებარის პირას.

¹⁶ქერუბიმების სვლისას ბორბლებიც მიდიოდნენ მათთან ერთად; და, როდესაც ქერუბიმები ფრთებს გაშლიდნენ, რომ მიწიდან აწეულიყვნენ, ბორბლები არ ცილდებოდნენ მათ, არამედ მათთან ერთად იყვნენ.

¹⁷მათი გაჩერებისას ისინიც იდგნენ, და მათი აწევისას ისინიც აიწევდნენ ხოლმე მათთან ერთად, რადგან ცოცხალი სული იყო მათში.

¹⁸და კვლავ გავიდა უფლის დიდება ტაძრის ზღურბლიდან და ზედ დაადგა ქერუბიმებს.

¹⁹და გაშალეს ქერუბიმებმა ფრთები და ჩემს თვალწინ აიმართნენ მიწიდან; და როდესაც ისინი გადიოდნენ, ბორბლებიც მათთან იყო; და დადგნენ უფლის ტაძრის აღმოსავლეთის კარიბჭის შესასვლელთან და ისრაელის ღმერთის დიდება იყო მაღლა, მათ ზემოთ.

²⁰ეს ის არსებანი იყვნენ, რომლებიც მე ვიხილე მდინარე ქებარის პირას, ისრაელის ღმერთის ტახტის ქვეშ რომ იდგნენ, და მივხვდი, რომ ქერუბიმები იყვნენ ისინი.

²¹ყოველ მათგანს ოთხი სახე ჰქონდა და ოთხი ფრთა, და თითოეულს ფრთებქვეშ ადამიანის ხელის მსგავსი რამ.

²²და შესახედაობა მათი სახისა მსგავსი იყო იმ სახეთა, რომლებიც მე ვიხილე მდინარე ქებარის პირას, – მათი გამოსახულებაც და თვითონაც. თითოეული თავისი სახის მიმართულებით მიდიოდა.