Read სბს–2013 ეზეკიელი 11 Bible Online

ეზეკიელი 11 - სბს–2013 bible

ეზეკიელი 11

¹და ამიყვანა სულმა და მიმიყვანა უფლის ტაძრის აღმოსავლეთის კარიბჭესთან, რომელიც აღმოსავლეთით იყურება. და, აჰა, კარიბჭის შესასვლელში 25 კაცია, და მე დავინახე მათ შორის იააზანია, ძე ყაზურისა და ფელატია ძე ბენაიასი, ხალხის მთავრები.

²და მითხრა: ადამის ძევ, ესენი არიან ადამიანები, მზაკვრობის განმზრახველნი და ბოროტი რჩევის მრჩეველნი ამ ქალაქში.

³ისინი ამბობენ: შორს არის დრო სახლების შენებისა; ეს ქალაქი ქვაბია, ჩვენ კი ხორცი.

⁴ამიტომ იწინასწარმეტყველე მათზე, იწინასწარმეტყველე, ადამის ძევ.

⁵და გადმოვიდა ჩემზე სული უფლისა და მითხრა: თქვი, ასე ამბობს-თქო უფალი: ვიცი, რასაც ამბობ, სახლო ისრაელისა, და რაც ფიქრად მოგდის.

⁶მრავალი მოკლულია ამ ქალაქში და გავსებულია მისი ქუჩები მათი გვამებით.

⁷ამიტომ ასე ამბობს უფალი ღმერთი: თქვენგან მოკლულები, რომლებიც ქუჩებში დაყარეთ, ხორცია, ის ქალაქი კი ქვაბია; მაგრამ მე თქვენ გამოგიყვანთ იქიდან.

⁸მახვილის გეშინიათ თქვენ და მახვილს მოვაწევ მე თქვენზე! – ამბობს უფალი ღმერთი.

⁹მე გამოგიყვანთ იქიდან და გადაგცემთ უცხოთესლთა ხელთ; და მე გამოგიტანთ სასჯელს.

¹⁰ისრაელის საზღვრებზე მოგეწევათ ჩემი მახვილი და მიხვდებით, რომ მე ვარ უფალი.

¹¹ის ქალაქი არ იქნება თქვენთვის ქვაბი და თქვენ არ იქნებით მასში ხორცად. მე თქვენ ისრაელის საზღვარზე განგსჯით.

¹²და მიხვდებით, რომ მე ვარ უფალი; თქვენ კი ჩემი წესებით არ დადიოდით და არც ჩემი სამართლით იქცეოდით; თქვენ იმ ხალხების სამართალს მიჰყვებოდით, თქვენს ირგვლივ რომ არიან. და ისე მოხდა,

¹³რომ როდესაც მე ამას ვწინასწარმეტყველებდი, ბენაიას ძე ფელატია მოკვდა. პირქვე დავემხე და დიდი ხმით შევღაღადე და ვთქვი: ვაგლახ მე, უფალო ღმერთო, ნუთუ სამუდამოდ უნდა მოსპო ისრაელის ნატამალი?

¹⁴და იყო სიტყვა უფლისა ჩემს მიმართ ნათქვამი:

¹⁵ადამის ძევ! შენს ძმებს, ჰო, შენს ძმებს, შენს ნათესავებს და მთელ ისრაელის სახლს, ყველას, რომელთაც ეუბნებიან იერუსალიმის მცხოვრებნი: მოშორდით უფალს, მან ჩვენ მოგვეცა ეს ქვეყანა სამკვიდროდ.

¹⁶ამიტომ უთხარი: ასე ამბობს-თქო უფალი ღმერთი: თუმცა მე განვიშორე ისინი წარმართთა შორის და გავფანტე მთელ ქვეყანაზე, მაინც მე ვიქნები მათთვის თუნდაც მცირე საწმიდარი იმ ქვეყნებში, სადაც შევიდნენ ისინი.

¹⁷ამიტომ უთხარი მათ: ასე ამბობს-თქო უფალი ღმერთი: მე შემოგიკრებთ თქვენ იმ ხალხებიდან და შეგაგროვებთ იმ ქვეყნებიდან, სადაც გაფანტული ხართ, და მოგცემთ ისრაელის მიწას.

¹⁸და შევლენ იქ და მოაცილებენ მას ყოველგვარ სისაძაგლეს.

¹⁹და მე მივცემ მათ სხვა გულსა და ახალ სულს ჩავუდგამ მათ; და ამოვგლეჯ მათ მკერდიდან ქვადქცეულ გულს და მივცემ მათ ცოცხალ გულს,

²⁰რათა ჩემი წესებით იარონ და ჩემი სამართალი დაიცვან და შეასრულონ. და იქნებიან ისინი ჩემი ერი და მე ვიქნები მათი ღმერთი.

²¹ხოლო ვისი გულიც მათი სიბილწისა და სისაძაგლისკენ მიილტვის, მათ საქციელს მათ თავზევე მოვაწევ, – ამბობს უფალი ღმერთი.

²²და გაშალეს ქერუბიმებმა ფრთები და ბორბლებიც თან გაჰყვათ. და ისრაელის ღმერთის დიდება მაღლა იყო, მათ ზემოთ.

²³და აიმართა უფლის დიდება ქალაქის შუაგულიდან და დადგა მთაზე, რომელიც ქალაქის აღმოსავლეთითაა.

²⁴და სულმა ამიტაცა და მიმიყვანა ქალდეველთა ქვეყანაში გადასახლებულებთან ხილვაში ღმერთის სულით. და გამშორდა ხილვა, რომელიც ვიხილე.

²⁵და მე ვუამბე ტყვეებს ყოველი სიტყვა, რაც გამომიცხადა უფალმა.